BSF jawans pile : ਖਾਲੜਾ : ਭਾਰਤ-ਪਾਕਿ ਸਰਹੱਦ ਨੇੜੇ ਖਾਲੜਾ ਸੈਕਟਰ ਅਧੀਨ ਆਉਂਦੇ ਏਰੀਏ ਵਿਚ ਬੀ. ਐਸ. ਐਫ . ਦੇ ਜਵਾਨਾਂ ਵਲੋਂ ਇਕ ਪਾਕਿਸਤਾਨੀ ਸਮੱਗਲਰ ਨੂੰ ਢੇਰ ਕਰਨ ਦੀ ਖਬਰ ਮਿਲੀ ਹੈ। ਘਟਨਾ ਵਾਲੀ ਸਥਾਨ ‘ਤੇ ਬੀ. ਐਸ. ਐਫ . ਵਲੋਂ ਤਲਾਸ਼ੀ ਮੁਹਿੰਮ ਜਾਰੀ ਹੈ। ਇਹ ਘੁਸਪੈਠੀਏ ਰੇਕੀ ਕਰਨ ਦੇ ਇਰਾਦੇ ਨਾਲ ਭਾਰਤੀ ਖੇਤਰ ਵਿਚ ਦਾਖਲ ਹੋਇਆ। ਨਾਈਟ ਵਿਜ਼ਨ ਕੈਮਰਿਆਂ ਦੀ ਮਦਦ ਨਾਲ ਸੈਕਟਰ ਖਾਲੜਾ ਵਿੱਚ ਤਾਇਨਾਤ ਬੀਐਸਐਫ ਦੇ 103 ਬਟਾਲੀਅਨ ਦੇ ਜਵਾਨਾਂ ਨੇ ਐਤਵਾਰ ਰਾਤ ਨੂੰ 9.30 ਵਜੇ ਵੇਖਿਆ ਕਿ ਇੱਕ ਘੁਸਪੈਠੀਏ ਪਾਕਿ ਸਾਈਡ ਤੋਂ ਭਾਰਤੀ ਖੇਤਰ ਵਿੱਚ ਅੱਗੇ ਵਧ ਰਿਹਾ ਸੀ। ਸਿਪਾਹੀਆਂ ਨੇ ਉਸ ਨੂੰ ਰੁਕਣ ਦੀ ਚੇਤਾਵਨੀ ਦਿੱਤੀ, ਪਰ ਉਸ ਨੇ ਪਾਕਿਸਤਾਨ ਵੱਲ ਦੌੜਨਾ ਸ਼ੁਰੂ ਕਰ ਦਿੱਤਾ। ਬੀਐਸਐਫ ਨੇ ਇਸ ‘ਤੇ ਗੋਲੀ ਮਾਰ ਦਿੱਤੀ ਅਤੇ ਢੇਰ ਕਰ ਦਿੱਤਾ।
ਇਹ ਘਟਨਾ ਬੁਰਜੀ ਨੰਬਰ 129 ਦੇ ਨੇੜੇ ਵਾਪਰੀ, ਜੋ ਕਿ ਇੰਡੀਅਨ ਜ਼ੀਰੋ ਲਾਈਨ ਦੇ 150 ਮੀਟਰ ਦੇ ਅੰਦਰ ਪੈਂਦੀ ਹੈ। ਜਦੋਂ ਜਵਾਨਾਂ ਨੇ ਮੁਲਜ਼ਮ ਦੀ ਤਲਾਸ਼ੀ ਲਈ ਤਾਂ 10-10 ਰੁਪਏ ਦੀ ਪਾਕਿਸਤਾਨ ਕਰੰਸੀ ਦੇ ਤਿੰਨ ਨੋਟ, 20 ਗ੍ਰਾਮ ਤੰਬਾਕੂ ਬਰਾਮਦ ਹੋਇਆ। ਲਗਭਗ 40 ਤੋਂ 45 ਸਾਲ ਦੇ ਘੁਸਪੈਠੀਏ ਦੀ ਪਛਾਣ ਨਹੀਂ ਹੋ ਸਕੀ, ਕਿਉਂਕਿ ਉਸ ਕੋਲੋਂ ਕੋਈ ਦਸਤਾਵੇਜ਼ ਬਰਾਮਦ ਨਹੀਂ ਹੋਇਆ। ਪਿਛਲੇ ਦਿਨ ਬੀਐਸਐਫ ਦੇ ਜਵਾਨਾਂ ਨੇ ਪਾਕਿ ਰੇਂਜਰਸ ਨਾਲ ਗੱਲ ਕੀਤੀ ਸੀ, ਪਰ ਰੇਂਜਰਾਂ ਨੇ ਮ੍ਰਿਤਕ ਦੇਹ ਨੂੰ ਲੈਣ ਤੋਂ ਇਨਕਾਰ ਕਰਦਿਆਂ ਕਿਹਾ ਕਿ ਮ੍ਰਿਤਕ ਦੇਹ ਦਾ ਪਾਕਿਸਤਾਨ ਨਾਲ ਕੋਈ ਸਬੰਧ ਨਹੀਂ ਹੈ। ਸੂਤਰਾਂ ਮੁਤਾਬਕ ਪਾਕਿਸਤਾਨੀ ਘੁਸਪੈਠੀਆ ਨਸ਼ੀਲੇ ਪਦਾਰਥਾਂ ਅਤੇ ਹਥਿਆਰਾਂ ਦੀ ਸਪੁਰਦਗੀ ਲਈ ਰੇਕੀ ਆਇਆ ਸੀ। ਐਸਐਸਪੀ ਧੁਰਮਨ ਐਚ ਨਿੰਬਾਲੇ ਦਾ ਕਹਿਣਾ ਹੈ ਕਿ ਇਸ ਕੇਸ ਦੀ ਜਾਂਚ ਅਜੇ ਜਾਰੀ ਹੈ। ਲਾਸ਼ ਨੂੰ ਖਾਲੜਾ ਪੁਲਿਸ ਦੇ ਹਵਾਲੇ ਕਰ ਦਿੱਤਾ ਗਿਆ ਹੈ। ਪੁਲਿਸ ਨੇ ਉਸਨੂੰ 72 ਘੰਟੇ ਮੋਰਚੇਰੀ ਵਿੱਚ ਰੱਖਿਆ ਹੈ।
