ਪਹਿਲੀ ਵਾਰ ਹਿੰਦੀ ਨਾਵਲ ਨੂੰ ਮਿਲਿਆ ਬੁਕਰ ਐਵਾਰਡ, ਗੀਤਾਂਜਲੀ ਸ਼੍ਰੀ ਦੇ ‘ਟੋਂਬ ਆਫ਼ ਸੈਂਡ’ ਨੇ ਜਿੱਤਿਆ ਖਿਤਾਬ

ਭਾਰਤ ਦੀ ਲੇਖਿਕਾ ਗੀਤਾਂਜਲੀ ਸ਼੍ਰੀ ਨੇ ਇਸ ਸਾਲ ਦਾ ਵੱਕਾਰੀ ਬੁਕਰ ਐਵਾਰਡ ਜਿੱਤਿਆ ਹੈ। ਇਹ ਪੁਰਸਕਾਰ ਉਨ੍ਹਾਂ ਦੇ ਨਾਵਲ ‘ਟੋਂਬ ਆਫ਼ ਸੈਂਡ’ ਲਈ ਦਿੱਤਾ ਗਿਆ ਹੈ। ਗੀਤਾਂਜਲੀ ਸ਼੍ਰੀ ਦਾ ਨਾਵਲ ਹਿੰਦੀ ਵਿੱਚ ‘ਰੇਤ ਸਮਾਧੀ’ ਦੇ ਨਾਂ ਹੇਠ ਪ੍ਰਕਾਸ਼ਿਤ ਹੋਇਆ ਸੀ।

ਖਾਸ ਗੱਲ ਇਹ ਹੈ ਕਿ ‘ਟੋਂਬ ਆਫ ਸੈਂਡ’ ਹਿੰਦੀ ਭਾਸ਼ਾ ਦੀ ਪਹਿਲੀ ਕਿਤਾਬ ਹੈ ਜਿਸ ਨੇ ਇਹ ਐਵਾਰਡ ਜਿੱਤਿਆ ਹੈ। ਇਹ ਕਿਸੇ ਵੀ ਭਾਰਤੀ ਭਾਸ਼ਾ ਵਿੱਚ ਐਵਾਰਡ ਜਿੱਤਣ ਵਾਲੀ ਪਹਿਲੀ ਕਿਤਾਬ ਵੀ ਹੈ।

ਲੇਖਿਕਾ ਗੀਤਾਂਜਲੀ ਸ਼੍ਰੀ ਨੂੰ ਵੀਰਵਾਰ ਨੂੰ ਲੰਡਨ ‘ਚ ਬੁਕਰ ਐਵਾਰਡ ਦਿੱਤਾ ਗਿਆ। ਗੀਤਾਂਜਲੀ ਨੂੰ 50,000 ਪੌਂਡ ਦੀ ਇਨਾਮੀ ਰਾਸ਼ੀ ਮਿਲੀ, ਜਿਸ ਨੂੰ ਉਹ ਡੇਜ਼ੀ ਰੌਕਵੈਲ ਨਾਲ ਸਾਂਝਾ ਕਰਨਗੇ। ਇਸ ਦਾ ਅੰਗਰੇਜ਼ੀ ਵਿੱਚ ਅਨੁਵਾਦ ਅਮਰੀਕੀ ਲੇਖਕ-ਪੇਂਟਰ ਡੇਜ਼ੀ ਰੌਕਵੈਲ ਨੇ ਕੀਤਾ ਸੀ।

ਗੀਤਾਂਜਲੀ ਸ਼੍ਰੀ ਦਾ ਨਾਵਲ ਦੁਨੀਆ ਦੀਆਂ ਉਨ੍ਹਾਂ 13 ਕਿਤਾਬਾਂ ਵਿੱਚੋਂ ਇੱਕ ਸੀ ਜੋ ਐਵਾਰਡਾਂ ਦੀ ਸੂਚੀ ਵਿੱਚ ਸ਼ਾਮਲ ਸੀ। ਇਨਾਮ ਦਾ ਐਲਾਨ 7 ਅਪ੍ਰੈਲ 2022 ਨੂੰ ਲੰਡਨ ਬੁੱਕ ਫੇਅਰ ਵਿੱਚ ਕੀਤਾ ਗਿਆ ਸੀ, ਪਰ ਜੇਤੂ ਦਾ ਐਲਾਨ ਹੁਣ ਹੋਇਆ ਹੈ।

ਉੱਤਰ ਪ੍ਰਦੇਸ਼ ਦੇ ਮੈਨਪੁਰੀ ਦੀ ਗੀਤਾਂਜਲੀ ਸ਼੍ਰੀ ਨੇ ਪੁਰਸਕਾਰ ਪ੍ਰਾਪਤ ਕੀਤਾ, ਖੁਸ਼ੀ ਜ਼ਾਹਰ ਕਰਦਿਆਂ ਕਿਹਾ ਕਿ ਮੈਂ ਕਦੇ ਬੁਕਰ ਦਾ ਸੁਪਨਾ ਨਹੀਂ ਦੇਖਿਆ ਸੀ। ਇਹ ਬਹੁਤ ਵੱਡੀ ਪ੍ਰਾਪਤੀ ਹੈ। ਮੈਂ ਹੈਰਾਨ ਹਾਂ, ਮੈਂ ਕਦੇ ਨਹੀਂ ਸੋਚਿਆ ਸੀ ਕਿ ਮੈਂ ਅਜਿਹਾ ਕਰ ਸਕਦੀ ਹਾਂ। ਉਨ੍ਹਾਂ ਕਿਹਾ ਕਿ ਮੈਂ ਹਿੰਦੀ-ਅੰਗਰੇਜ਼ੀ ਅਤੇ ਫਰਾਂਸੀਸੀ ਪ੍ਰਕਾਸ਼ਕਾਂ ਸਣੇ ਆਪਣੇ ਫਰਾਂਸੀਸੀ ਅਨੁਵਾਦਕ ਅਨੀਮਾਂਟੋ ਦੀ ਵੀ ਧੰਨਵਾਦੀ ਹਾਂ।

ਗੀਤਾਂਜਲੀ ਸ਼੍ਰੀ ਨੇ ਹੁਣ ਤੱਕ ਤਿੰਨ ਨਾਵਲ ਅਤੇ ਕਹਾਣੀਆਂ ਦੇ ਸੰਗ੍ਰਹਿ ਲਿਖੇ ਹਨ। ਉਨ੍ਹਾਂ ਦੇ ਨਾਵਲ ਅਤੇ ਗਲਪ ਸੰਗ੍ਰਹਿ ਅੰਗਰੇਜ਼ੀ, ਜਰਮਨ, ਸਰਬੀਅਨ, ਫ੍ਰੈਂਚ ਅਤੇ ਕੋਰੀਅਨ ਭਾਸ਼ਾਵਾਂ ਵਿੱਚ ਅਨੁਵਾਦ ਕੀਤੇ ਗਏ ਹਨ।

ਦੱਸ ਦੇਈਏ ਕਿ ‘ਰੇਤ ਸਮਾਧੀ’ ਇੱਕ ਅੱਸੀ ਸਾਲਾ ਔਰਤ ਦੀ ਕਹਾਣੀ ਹੈ ਜੋ ਵੰਡ ਦਾ ਦਰਦ ਝੱਲਦੀ ਹੈ। ਉਹ ਬਹੁਤ ਸਾਰੀਆਂ ਮੁਸੀਬਤਾਂ ਲੈ ਕੇ ਪਾਕਿਸਤਾਨ ਜਾਂਦੀ ਹੈ। ਜਿਊਰੀ ਨੇ ਇਸ ਨਾਵਲ ਨੂੰ ਭਾਵਨਾਵਾਂ ਦਾ ਸਮੁੰਦਰ ਕਿਹਾ ਹੈ। ਜਿਊਰੀ ਨੇ ਮੰਨਿਆ ਕਿ ਇਸ ਵਿਚ ਔਰਤ ਦੀਆਂ ਭਾਵਨਾਵਾਂ ਨੂੰ ਬੜੀ ਮਿਹਨਤ ਨਾਲ ਲਿਖਿਆ ਗਿਆ ਹੈ। ਹਰ ਪਾਠਕ ਇਸ ਨੂੰ ਮਹਿਸੂਸ ਕਰ ਸਕਦਾ ਹੈ।

ਜ਼ਿਕਰਯੋਗ ਹੈ ਕਿ ਬੁਕਰ ਐਵਾਰਡ ਦਾ ਪੂਰਾ ਨਾਮ ਬੁਕਰ ਐਵਾਰਡ ਫਾਰ ਫਿਕਸ਼ਨ ਹੈ। ਇਸ ਦੀ ਸਥਾਪਨਾ 1969 ਵਿੱਚ ਇੰਗਲੈਂਡ ਦੀ ਬੁਕਰ ਮੈਕਕੋਨਲ ਕੰਪਨੀ ਵੱਲੋਂ ਕੀਤੀ ਗਈ ਸੀ। ਇਸ ਵਿੱਚ ਜੇਤੂ ਨੂੰ 60 ਹਜ਼ਾਰ ਪੌਂਡ ਦੀ ਰਾਸ਼ੀ ਦਿੱਤੀ ਜਾਂਦੀ ਹੈ। ਇਹ ਖਿਤਾਬ ਹਰ ਸਾਲ ਬ੍ਰਿਟੇਨ ਜਾਂ ਆਇਰਲੈਂਡ ਵਿੱਚ ਪ੍ਰਕਾਸ਼ਿਤ ਜਾਂ ਅੰਗਰੇਜ਼ੀ ਵਿੱਚ ਅਨੁਵਾਦ ਕੀਤੀ ਗਈ ਕਿਤਾਬ ਨੂੰ ਦਿੱਤਾ ਜਾਂਦਾ ਹੈ। ਪਹਿਲਾ ਬੁਕਰ ਪੁਰਸਕਾਰ ਅਲਬਾਨੀਅਨ ਨਾਵਲਕਾਰ ਇਸਮਾਈਲ ਕਾਦਰੇ ਨੂੰ ਦਿੱਤਾ ਗਿਆ ਸੀ।

ਵੀਡੀਓ ਲਈ ਕਲਿੱਕ ਕਰੋ -:

“ਘਰੋਂ ਚੁੱਕਣ ਆਈ ਪੁਲਿਸ ਤਾਂ ਭੱਜ ਗਿਆ ਕਾਂਗਰਸੀ ਆਗੂ ਅੰਗਦ ਦੱਤਾ, ਪੌੜੀ ਲਗਾਕੇ ਘਰ ਅੰਦਰ ਵੜੀ ਪੁਲਿਸ ਤਾਂ ਦੇਖੋ ਫਿਰ ਕੀ ਹੋਇਆ?”