eknath khadse joins ncp: ਮੁੰਬਈ: 21 ਅਕਤੂਬਰ ਨੂੰ ਭਾਜਪਾ ਛੱਡਣ ਦਾ ਐਲਾਨ ਕਰਨ ਵਾਲੇ ਸੀਨੀਅਰ ਨੇਤਾ ਏਕਨਾਥ ਖੜਸੇ ਅੱਜ ਨੈਸ਼ਨਲਿਸਟ ਕਾਂਗਰਸ ਪਾਰਟੀ (ਐਨਸੀਪੀ) ਵਿੱਚ ਸ਼ਾਮਿਲ ਹੋ ਗਏ ਹਨ। ਇਸ ਮੌਕੇ ਐਨਸੀਪੀ ਮੁਖੀ ਸ਼ਰਦ ਪਵਾਰ ਵੀ ਮੌਜੂਦ ਸਨ। ਐਨਸੀਪੀ ਵਿੱਚ ਸ਼ਾਮਿਲ ਹੋਣ ਤੋਂ ਬਾਅਦ ਖੜਸੇ ਨੇ ਕਿਹਾ ਕਿ ਜੇ ਭਾਜਪਾ ਨੇ ਈਡੀ (ਇਨਫੋਰਸਮੈਂਟ ਡਾਇਰੈਕਟੋਰੇਟ) ਨੂੰ ਸਾਡੇ ਪਿੱਛੇ ਲਗਾ ਦਿੱਤਾ ਤਾਂ ਅਸੀਂ ਸੀਡੀ ਚਲਾਵਾਂਗੇ। ਖੜਸੇ ਨੇ ਹਾਲ ਹੀ ਵਿੱਚ ਕਿਹਾ ਸੀ ਕਿ ਉਨ੍ਹਾਂ ਨੇ ਭਾਜਪਾ ਛੱਡ ਕੇ ਐਨ ਸੀ ਪੀ ਵਿੱਚ ਸ਼ਾਮਿਲ ਹੋਣ ਦਾ ਫੈਸਲਾ ਕੀਤਾ ਹੈ ਕਿਉਂਕਿ ਉਨ੍ਹਾਂ ਨੂੰ ਲਗਦਾ ਹੈ ਕਿ ਜਿੰਨਾ ਚਿਰ ਭਾਜਪਾ ਵਿੱਚ ਦੇਵੇਂਦਰ ਫੜਨਵੀਸ ਹਨ, ਉਨ੍ਹਾਂ ਨੂੰ “ਕਦੇ ਨਿਆਂ ਨਹੀਂ ਮਿਲੇਗਾ”। ਉਨ੍ਹਾਂ ਨੇ ਫੜਨਵੀਸ ਉੱਤੇ ਆਪਣੇ ਨਾਲ “ਗੰਦੀ ਰਾਜਨੀਤੀ” ਕਰਨ ਦਾ ਦੋਸ਼ ਵੀ ਲਗਾਇਆ ਹੈ। ਇਸ ਸੀਨੀਅਰ ਆਗੂ ਨੇ ਦੋਸ਼ ਲਾਇਆ ਕਿ ਸਮਾਜ ਸੇਵਕ ਅੰਜਲੀ ਦਮਾਨੀਆ ਨੇ ਉਸ ਖ਼ਿਲਾਫ਼ ਛੇੜਛਾੜ ਦੀ ਸ਼ਿਕਾਇਤ ਦਰਜ ਕਰਵਾਈ ਸੀ ਅਤੇ ਫੜਨਵੀਸ ਦੇ ਨਿਰਦੇਸ਼ਾਂ ’ਤੇ ਪੁਲੀਸ ਨੇ ਇਸ ਸਬੰਧ ਵਿੱਚ ਕੇਸ ਦਰਜ ਕਰ ਲਿਆ ਸੀ।
ਖੜਸੇ ਨੇ ਦੋਸ਼ ਲਾਇਆ, “ਫੜਨਵੀਸ ਨੇ ਮੰਨਿਆ ਕਿ ਉਸ ਨੇ ਖੁਦ ਸਥਾਨਕ ਪੁਲਿਸ ਨੂੰ ਦਮਨਿਆ ਦੇ ਦੋਸ਼ਾਂ ਦੇ ਅਧਾਰ ‘ਤੇ ਮੇਰੇ ਖਿਲਾਫ ਐਫਆਈਆਰ ਦਰਜ ਕਰਨ ਲਈ ਕਿਹਾ ਸੀ। ਮੈਂ ਮੁੰਬਈ ਵਿੱਚ ਨਹੀਂ ਸੀ, ਫਿਰ ਵੀ ਮੇਰੇ ਵਿਰੁੱਧ ਉੱਥੇ ਇੱਕ ਐਫਆਈਆਰ ਦਰਜ ਕੀਤੀ ਗਈ। ਮੈਂ ਆਪਣੇ ਚਾਰ ਦਹਾਕਿਆਂ ਦੀ ਭਾਜਪਾ ਯਾਤਰਾ ਵਿੱਚ ਇਸ ਕਿਸਮ ਦੀ ਗੰਦੀ ਰਾਜਨੀਤੀ ਕਦੇ ਨਹੀਂ ਵੇਖੀ।” ਉਨ੍ਹਾਂ ਕਿਹਾ, “ਮੈਂ 2014 ਦੀਆਂ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਵਿਰੋਧੀ ਧਿਰ ਦਾ ਨੇਤਾ ਸੀ, ਜਦੋਂ ਭਾਜਪਾ ਨੇ 123 ਸੀਟਾਂ ਜਿੱਤੀਆਂ ਸਨ।” ਪਰ ਦੇਖੋ 2019 ਵਿੱਚ ਕੀ ਹੋਇਆ। ਸਾਰੇ ਸਰੋਤਾਂ ਦੇ ਬਾਵਜੂਦ, ਭਾਜਪਾ ਫੜਨਵੀਸ ਦੀ ਅਗਵਾਈ ਵਿੱਚ ਸਿਰਫ 105 ਸੀਟਾਂ ਹੀ ਜਿੱਤ ਸਕੀ। ਖੜਸੇ ਦੇ ਇਸ ਬਿਆਨ ‘ਤੇ ਫੜਨਵੀਸ ਨੇ ਕਿਹਾ ਕਿ ਏਕਨਾਥ ਖੜਸੇ ਸਿਰਫ ‘ਅੱਧਾ ਸੱਚ’ ਬੋਲ ਰਹੇ ਹਨ ਅਤੇ ਉਨ੍ਹਾਂ ਨੂੰ ‘ਖਲਨਾਇਕ’ ਬਣਾ ਰਹੇ ਹਨ।
