Railways to operate 392 festival special trains: ਤਿਉਹਾਰਾਂ ਦੇ ਸੀਜ਼ਨ ਵਿੱਚ ਭਾਰਤੀ ਰੇਲਵੇ ਨੇ ਯਾਤਰੀਆਂ ਨੂੰ ਇੱਕ ਵੱਡਾ ਤੋਹਫਾ ਦਿੱਤਾ ਹੈ। ਰੇਲਵੇ ਨੇ ਹੋਰ ਵਿਸ਼ੇਸ਼ ਟ੍ਰੇਨਾਂ ਚਲਾਉਣ ਦਾ ਫੈਸਲਾ ਲਿਆ ਹੈ। ਅੱਜ ਤੋਂ ਯਾਤਰੀਆਂ ਦੀ ਸਹੂਲਤ ਲਈ 392 ਵਿਸ਼ੇਸ਼ ਟ੍ਰੇਨਾਂ ਚਲਾਈਆਂ ਜਾਣਗੀਆਂ । ਪੱਛਮੀ ਰੇਲਵੇ ਅਨੁਸਾਰ ਇਨ੍ਹਾਂ 392 ਵਿਸ਼ੇਸ਼ ਟ੍ਰੇਨਾਂ ਵਿੱਚੋਂ ਪੰਜ ਜੋੜੀ ਬ੍ਰਾਂਦਾ ਟਰਮੀਨਸ ਤੋਂ, ਦੋ-ਦੋ ਜੋੜੀ ਇੰਦੌਰ ਅਤੇ ਊਧਾਨਾ ਤੋਂ ਚੱਲਣਗੀਆਂ। ਉੱਥੇ ਹੀ ਇਕ-ਇੱਕ ਜੋੜੀ ਓਖਾ, ਪੋਰਬੰਦਰ ਅਤੇ ਗਾਂਧੀਧਾਮ ਸਟੇਸ਼ਨਾਂ ਤੋਂ ਚੱਲਣਗੀਆਂ। ਰੇਲਵੇ ਅਨੁਸਾਰ ਇਹ ਸਾਰੀਆਂ ਟ੍ਰੇਨਾਂ ਰਾਖਵੀਆਂ ਹੋਣਗੀਆਂ ।
ਇਸ ਤਰ੍ਹਾਂ ਕਰਾ ਸਕਦੇ ਹੋ ਬੁਕਿੰਗ
ਦਰਅਸਲ, ਰੇਲਵੇ ਵੱਲੋਂ ਇਨ੍ਹਾਂ ਸਾਰੀਆਂ ਵਿਸ਼ੇਸ਼ ਟ੍ਰੇਨਾਂ ਦਾ ਕਿਰਾਇਆ ਵਸੂਲਿਆ ਜਾਵੇਗਾ। ਜੇ ਤੁਸੀਂ ਵੀ ਯਾਤਰਾ ਕਰਨਾ ਚਾਹੁੰਦੇ ਹੋ, ਤਾਂ ਯਾਦ ਰੱਖੋ ਕਿ ਇਸ ਦੀ ਬੁਕਿੰਗ 20 ਅਕਤੂਬਰ ਯਾਨੀ ਕਿ ਅੱਜ ਤੋਂ 22 ਅਕਤੂਬਰ ਦੇ ਵਿਚਾਲੇ ਹੀ ਕੀਤੀ ਜਾ ਸਕਦੀ ਹੈ। ਹਾਲਾਂਕਿ, ਯਾਤਰਾ ਦੌਰਾਨ ਸੁਰੱਖਿਆ ਦੇ ਸਾਰੇ ਨਿਯਮਾਂ ਦੀ ਪਾਲਣਾ ਕਰਨਾ ਲਾਜ਼ਮੀ ਹੋਵੇਗਾ। ਰੇਲਵੇ ਨੇ ਘੋਸ਼ਣਾ ਕੀਤੀ ਹੈ ਕਿ ਦੁਰਗਾਪੂਜਾ, ਦੁਸਹਿਰਾ, ਦੀਵਾਲੀ ਅਤੇ ਛੱਠ ਦੇ ਮੱਦੇਨਜ਼ਰ ਅਕਤੂਬਰ ਅਤੇ ਨਵੰਬਰ ਦੇ ਵਿਚਕਾਰ ਰੇਲਵੇ 392 ਤਿਉਹਾਰ ਵਿਸ਼ੇਸ਼ ਟ੍ਰੇਨਾਂ ਚਲਾਈਆਂ ਜਾਣਗੀਆਂ । ਇਹ ਟ੍ਰੇਨਾਂ 20 ਅਕਤੂਬਰ (ਅੱਜ) ਤੋਂ 30 ਨਵੰਬਰ ਦੇ ਵਿਚਕਾਰ ਚੱਲਣਗੀਆਂ। ਵਿਸ਼ੇਸ਼ ਟ੍ਰੇਨਾਂ ਕੋਲਕਾਤਾ, ਪਟਨਾ, ਵਾਰਾਣਸੀ, ਲਖਨਊ ਵਰਗੇ ਸ਼ਹਿਰਾਂ ਲਈ ਚੱਲਣਗੀਆਂ।
ਆਮ ਟ੍ਰੇਨਾਂ ਨਾਲੋਂ 30 ਫ਼ੀਸਦੀ ਜ਼ਿਆਦਾ ਕਿਰਾਇਆ
ਦੱਸ ਦੇਈਏ ਕਿ ਰੇਲਵੇ ਇਨ੍ਹਾਂ ਵਿਸ਼ੇਸ਼ ਟ੍ਰੇਨਾਂ ਵਿੱਚ ਸਧਾਰਣ ਕਿਰਾਏ ਤੋਂ ਵੱਧ ਵਸੂਲ ਕਰੇਗਾ। ਇਨ੍ਹਾਂ ਵਿਸ਼ੇਸ਼ ਟ੍ਰੇਨਾਂ ਦਾ ਕਿਰਾਇਆ ਆਮ ਟ੍ਰੇਨਾਂ ਦੇ ਮੁਕਾਬਲੇ 30% ਵਧੇਰੇ ਹੋਵੇਗਾ । ਯਾਨੀ ਇਨ੍ਹਾਂ ਟ੍ਰੇਨਾਂ ਵਿੱਚ ਯਾਤਰਾ ਕਰਨ ਲਈ ਯਾਤਰੀਆਂ ਨੂੰ ਵਧੇਰੇ ਖਰਚ ਕਰਨਾ ਪਵੇਗਾ। ਦੱਸ ਦੇਈਏ ਕਿ ਰੇਲਵੇ ਆਮ ਦਿਨਾਂ ਵਿੱਚ ਹਰ ਰੋਜ਼ ਲਗਭਗ 12 ਹਜ਼ਾਰ ਟ੍ਰੇਨਾਂ ਚਲਾਉਂਦਾ ਰਿਹਾ ਹੈ, ਪਰ ਕੋਰੋਨਾ ਸੰਕਟ ਦੇ ਮੱਦੇਨਜ਼ਰ ਮੰਗ ਦੇ ਅਨੁਸਾਰ ਹੌਲੀ-ਹੌਲੀ ਟ੍ਰੇਨਾਂ ਸ਼ੁਰੂ ਕੀਤੀਆਂ ਜਾ ਰਹੀਆਂ ਹਨ। ਇਸ ਦੇ ਨਾਲ ਹੀ ਕੋਰੋਨਾ ਦੇ ਮੱਦੇਨਜ਼ਰ ਰੇਲਵੇ ਨੇ ਸਖਤ ਯਾਤਰਾ ਦੇ ਨਿਯਮ ਵੀ ਜਾਰੀ ਕੀਤੇ ਹਨ । ਇਸਦੇ ਨਾਲ ਹੀ ਸਾਨੂੰ ਹਦਾਇਤ ਕੀਤੀ ਗਈ ਹੈ ਕਿ ਇਨ੍ਹਾਂ ਨਿਯਮਾਂ ਨੂੰ ਤੋੜਨ ਨਾਲ ਜੇਲ੍ਹ ਜਾਣਾ ਪੈ ਸਕਦਾ ਹੈ।
