RJD party says: ਬਿਹਾਰ ਚੋਣ ਨਤੀਜੇ 2020: ਬਿਹਾਰ ਵਿਧਾਨ ਸਭਾ ਚੋਣਾਂ 2020 ਦੇ ਨਤੀਜਿਆਂ ਨੇ ਸਾਰੀਆਂ ਰਾਜਨੀਤਿਕ ਪਾਰਟੀਆਂ ਦੀਆਂ ਧੜਕਣਾ ਵਧਾ ਦਿੱਤੀਆਂ ਹਨ। ਸੱਤ ਘੰਟਿਆਂ ਤੋਂ ਵੀ ਵੱਧ ਸਮੇਂ ਤੋਂ ਗਿਣਤੀ ਜਾਰੀ ਹੈ, ਪਰ ਅਜੇ ਤੱਕ ਕਿਸੇ ਵੀ ਗੱਠਜੋੜ ਦੀ ਸਰਕਾਰ ਨਹੀਂ ਬਣੀ ਹੈ। ਕਿਉਂਕਿ ਚੋਣ ਕਮਿਸ਼ਨ ਦੇ ਅਨੁਸਾਰ,ਹੁਣ ਤੱਕ ਸਿਰਫ 25 ਫ਼ੀਸਦੀ ਵੋਟਾਂ ਦੀ ਗਿਣਤੀ ਕੀਤੀ ਗਈ ਹੈ। ਮੌਜੂਦਾ ਸਥਿਤੀ ਬਾਰੇ ਗੱਲ ਕਰਦਿਆਂ, ਐਨਡੀਏ ਗੱਠਜੋੜ 122 ਦੇ ਬਹੁਗਿਣਤੀ ਅੰਕੜੇ ਤੋਂ ਅੱਗੇ ਹੈ। ਜਦਕਿ ਸ਼ੁਰੂਆਤ ਵਿੱਚ ਪਹਿਲਾਂ, ਮਹਾਂਗਠਜੋੜ ਅੱਗੇ ਵੱਧ ਰਿਹਾ ਸੀ। ਰਾਸ਼ਟਰੀ ਜਨਤਾ ਦਲ (ਆਰਜੇਡੀ), ਜਿਸ ਨੇ ਸ਼ੁਰੂਆਤੀ ਰੁਝਾਨਾਂ ਵਿੱਚ ਲੀਡ ਹਾਸਿਲ ਕੀਤੀ ਸੀ, ਨੇ ਅਜੇ ਵੀ ਆਪਣੇ ਵਰਕਰਾਂ ਨੂੰ ਭਰੋਸਾ ਦਿੱਤਾ ਹੈ ਕਿ ਉਹ ਬਿਹਾਰ ਵਿੱਚ ਸਰਕਾਰ ਬਨਾਉਣਗੇ। ਆਰਜੇਡੀ ਨੇ ਆਪਣੇ ਅਧਿਕਾਰਤ ਟਵਿੱਟਰ ਅਕਾਊਂਟ ‘ਤੇ ਟਵੀਟ ਕੀਤਾ ਹੈ ਅਤੇ ਸਾਰੇ ਉਮੀਦਵਾਰਾਂ ਅਤੇ ਕਾਉਂਟਿੰਗ ਏਜੰਟ ਨੂੰ ਵੋਟਾਂ ਦੀ ਗਿਣਤੀ ਹੋਣ ਤੱਕ ਕਾਉਂਟਿੰਗ ਹਾਲ ਵਿੱਚ ਹੀ ਰਹਿਣ ਲਈ ਕਿਹਾ ਹੈ।
ਦੁਪਹਿਰ ਦੋ ਵਜੇ ਤੱਕ ਸਿਰਫ 20 ਫ਼ੀਸਦੀ ਵੋਟਾਂ ਦੀ ਗਿਣਤੀ ਹੀ ਕੀਤੀ ਗਈ ਹੈ, ਇਸ ਲਈ ਹੁਣ ਤੱਕ ਦੇ ਰੁਝਾਨ ਵੀ ਬਦਲ ਸਕਦੇ ਹਨ। ਜਦੋਂ ਸਵੇਰੇ ਕਾਉਂਟਿੰਗ ਸ਼ੁਰੂ ਹੋਈ ਸੀ ਤਾਂ ਮਹਾਂ ਗੱਠਜੋੜ ਸ਼ੁਰੂਆਤੀ ਰੁਝਾਨਾਂ ਵਿੱਚ ਅੱਗੇ ਵੱਧ ਰਿਹਾ ਸੀ ਪਰ ਈਵੀਐਮ ਦੀਆਂ ਵੋਟਾਂ ਗਿਣਨ ਵੇਲੇ ਤਸਵੀਰ ਬਦਲ ਗਈ। ਹਾਲਾਂਕਿ, ਐਨਡੀਏ ਅਜੇ ਵੀ ਰੁਝਾਨਾਂ ਵਿੱਚ 130 ਸੀਟਾਂ ਦੇ ਨਾਲ ਸੰਪੂਰਨ ਬਹੁਮਤ ਪ੍ਰਾਪਤ ਕਰਦੀ ਪ੍ਰਤੀਤ ਹੋ ਰਹੀ ਹੈ। ਜੇ ਅਸੀਂ ਦੁਪਹਿਰ 1.30 ਵਜੇ ਤੱਕ ਦੇ ਅੰਕੜਿਆਂ ਤੇ ਨਜ਼ਰ ਮਾਰੀਏ, ਤਾਂ 60 ਸੀਟਾਂ ਅਜਿਹੀਆਂ ਹਨ ਜਿੱਥੇ ਦੋਵਾਂ ਗੱਠਜੋੜ ਦੇ ਉਮੀਦਵਾਰਾਂ ਵਿਚਕਾਰ ਵੋਟਾਂ ਦਾ ਅੰਤਰ 1000 ਤੋਂ ਵੀ ਘੱਟ ਹੈ। ਸੱਤ ਸੀਟਾਂ ‘ਤੇ ਇਹ ਅੰਤਰ 100 ਵੋਟਾਂ ਤੋਂ ਵੀ ਘੱਟ ਹੈ। ਇਸ ਸਥਿਤੀ ਵਿੱਚ, ਬਾਜ਼ੀ ਕਿਸੇ ਵੀ ਸਮੇਂ ਉਲਟ ਹੋ ਸਕਦੀ ਹੈ। ਦੁਪਹਿਰ 1.30 ਵਜੇ ਦੇ ਕਰੀਬ, ਕਸਬਾ ਸੀਟ ਤੋਂ ਐਲਜੇਪੀ ਉਮੀਦਵਾਰ ਕਾਂਗਰਸ ਦੇ ਉਮੀਦਵਾਰ ਤੋਂ ਪੰਜ ਵੋਟਾਂ ਨਾਲ ਅੱਗੇ ਸੀ, ਜਦਕਿ ਛਾਪਰਾ ਸੀਟ ਉੱਤੇ ਰਾਜਦ ਦਾ ਉਮੀਦਵਾਰ 6 ਵੋਟਾਂ ਨਾਲ ਭਾਜਪਾ ਉਮੀਦਵਾਰ ਤੋਂ ਅੱਗੇ ਸੀ।
ਇਸੇ ਤਰ੍ਹਾਂ ਮਧੌਰਾ ਵਿੱਚ ਜੇਡੀਯੂ ਉਮੀਦਵਾਰ ਆਰਜੇਡੀ ਤੋਂ 10 ਵੋਟਾਂ ਨਾਲ ਅੱਗੇ ਸੀ, ਸਰਾਇਰੰਜਨ ਵਿੱਚ ਜੇਡੀਯੂ ਉਮੀਦਵਾਰ ਆਰਜੇਡੀ ਤੋਂ 22 ਵੋਟਾਂ ਨਾਲ ਅੱਗੇ ਸੀ। ਚੋਣ ਕਮਿਸ਼ਨ ਦੇ ਸੂਤਰਾਂ ਅਨੁਸਾਰ, ਇਸ ਵਾਰੀ ਰੁਝਾਨਾਂ ਅਤੇ ਨਤੀਜਿਆਂ ਵਿੱਚ ਥੋੜੀ ਦੇਰੀ ਹੋ ਸਕਦੀ ਹੈ ਕਿਉਂਕਿ ਇਸ ਵਾਰ ਕੋਰੋਨਾ ਨੂੰ ਧਿਆਨ ਵਿੱਚ ਰੱਖਦਿਆਂ ਪੋਲਿੰਗ ਸਟੇਸ਼ਨਾਂ ਦੀ ਗਿਣਤੀ 72,723 ਤੋਂ ਵੱਧ ਕੇ 1,06,515 ਹੋ ਗਈ ਹੈ। ਪੋਲਿੰਗ ਸਟੇਸ਼ਨਾਂ ਵਿੱਚ 46.5 ਫ਼ੀਸਦੀ ਦਾ ਵਾਧਾ ਕੋਰੋਨਾ ਮਹਾਂਮਾਰੀ ਦੇ ਮੱਦੇਨਜ਼ਰ ਸਮਾਜਿਕ ਦੂਰੀਆਂ ਦੇ ਉਪਾਵਾਂ ਦੀ ਪਾਲਣਾ ਨੂੰ ਯਕੀਨੀ ਬਣਾਉਣ ਲਈ ਕੀਤਾ ਗਿਆ ਹੈ।
ਇਹ ਵੀ ਦੇਖੋ : ਪਿਤਾ ਦਾ ਸਹਾਰਾ ਬਣਨ ਲਈ 4 ਵਜੇ ਉੱਠਕੇ ਘਰ-ਘਰ ਅਖਬਾਰ ਵੰਡਦੀ ਹੈ ਇਹ ਹੋਣਹਾਰ ਧੀ
