ireland beat england: ਆਇਰਲੈਂਡ ਨੇ ਸਾਉਥੈਮਪਟਨ ਵਿਖੇ ਖੇਡੇ ਗਏ ਤੀਜੇ ਵਨਡੇ ਮੈਚ ਵਿੱਚ ਇੰਗਲੈਂਡ ਨੂੰ ਸੱਤ ਵਿਕਟਾਂ ਨਾਲ ਹਰਾ ਦਿੱਤਾ ਹੈ। ਆਇਰਲੈਂਡ ਨੇ ਭਾਵੇਂ ਹੀ ਮੈਚ ਜਿੱਤ ਲਿਆ ਹੋਵੇ, ਪਰ ਇੰਗਲੈਂਡ ਨੇ ਤਿੰਨ ਮੈਚਾਂ ਦੀ ਲੜੀ 2-1 ਨਾਲ ਆਪਣੇ ਨਾਮ ਕਰ ਲਈ ਹੈ। ਇੰਗਲੈਂਡ ਨੇ ਪਹਿਲਾਂ ਖੇਡਦਿਆਂ ਕਪਤਾਨ ਈਯਨ ਮੋਰਗਨ (106) ਦੇ ਸ਼ਾਨਦਾਰ ਸੈਂਕੜੇ ਦੀ ਬਦੌਲਤ 328 ਦੌੜਾਂ ਬਣਾਈਆਂ ਸਨ। ਇਸ ਦੇ ਜਵਾਬ ਵਿੱਚ ਆਇਰਲੈਂਡ ਨੇ ਟੀਚੇ ਦਾ ਪਿੱਛਾ ਕਰਦਿਆਂ ਇੱਕ ਗੇਂਦ ਬਾਕੀ ਰਹਿੰਦਿਆਂ ਤਿੰਨ ਵਿਕਟਾਂ ਦੇ ਨੁਕਸਾਨ ‘ਤੇ ਮੈਚ ਆਪਣੇ ਨਾਮ ਕਰ ਲਿਆ। ਆਇਰਲੈਂਡ ਦੀ ਜਿੱਤ ਨੇ 2011 ਦੇ ਵਿਸ਼ਵ ਕੱਪ ਦੀਆਂ ਯਾਦਾਂ ਨੂੰ ਵੀ ਤਾਜ਼ਾ ਕਰ ਦਿੱਤਾ ਹੈ। ਦਰਅਸਲ, 2011 ਦੇ ਇੱਕ ਰੋਜ਼ਾ ਵਿਸ਼ਵ ਕੱਪ ਵਿੱਚ ਆਇਰਲੈਂਡ ਨੇ ਇੰਗਲੈਂਡ ਨੂੰ ਇਸੇ ਤਰ੍ਹਾਂ ਹਰਾਇਆ ਸੀ ਅਤੇ 300 ਤੋਂ ਵੱਧ ਦੌੜਾਂ ਦੇ ਟੀਚੇ ਦਾ ਪਿੱਛਾ ਕੀਤਾ ਸੀ। ਪਹਿਲਾਂ ਬੱਲੇਬਾਜ਼ੀ ਕਰਦਿਆਂ ਇੰਗਲੈਂਡ ਨੇ ਆਪਣੀਆਂ ਤਿੰਨ ਅਹਿਮ ਵਿਕਟਾਂ ਸਿਰਫ 44 ਦੌੜਾਂ ਦੇ ਸਕੋਰ ਤੇ ਗੁਆ ਦਿੱਤੀਆਂ। ਇਸ ਤੋਂ ਬਾਅਦ ਕਪਤਾਨ ਮੋਰਗਨ ਨੇ 84 ਗੇਂਦਾਂ ਵਿੱਚ 106 ਦੌੜਾਂ ਦਾ ਸੈਂਕੜਾ ਖੇਡ ਕੇ ਟੀਮ ਨੂੰ ਸੰਭਾਲਿਆ।
ਮੋਰਗਨ ਨੇ ਵੀ ਟੌਮ ਬੈਨਟਨ (58) ਨਾਲ ਚੌਥੇ ਵਿਕਟ ਲਈ 146 ਦੌੜਾਂ ਦੀ ਮਹੱਤਵਪੂਰਨ ਸਾਂਝੇਦਾਰੀ ਕੀਤੀ। ਅਖੀਰ ਵਿੱਚ ਆਲਰਾਊਂਡਰ ਡੇਵਿਡ ਵਿਲੀ ਨੇ 51 ਅਤੇ ਟੌਮ ਕੁਰਨ ਨੇ ਅਜੇਤੂ 38 ਦੌੜਾਂ ਬਣਾਈਆਂ ਅਤੇ ਟੀਮ ਦਾ ਸਕੋਰ 300 ਦੇ ਪਾਰ ਪਹੁੰਚਾਇਆ। ਆਇਰਲੈਂਡ ਨੇ ਸ਼ਾਨਦਾਰ ਸ਼ੁਰੂਆਤ ਕਰਦਿਆਂ ਇੰਗਲੈਂਡ ਦੇ 329 ਦੌੜਾਂ ਦੇ ਵੱਡੇ ਟੀਚੇ ਦਾ ਪਿੱਛਾ ਕੀਤਾ। ਪਹਿਲੀ ਵਿਕਟ 50 ਦੌੜਾਂ ‘ਤੇ ਡਿੱਗਣ ਤੋਂ ਬਾਅਦ ਐਂਡਰਿਊ ਬਲਬੀਰਨੀ ਅਤੇ ਪਾਲ ਸਟਰਲਿੰਗ ਨੇ ਦੂਜੀ ਵਿਕਟ ਲਈ 214 ਦੌੜਾਂ ਦੀ ਸਾਂਝੇਦਾਰੀ ਕੀਤੀ। ਬਲਬੀਰਨੀ ਨੇ 112 ਗੇਂਦਾਂ ਵਿੱਚ 113 ਦੌੜਾਂ ਦੀ ਅਤੇ ਸਟਰਲਿੰਗ ਨੇ 128 ਗੇਂਦਾਂ ਵਿੱਚ 142 ਦੌੜਾਂ ਦੀ ਸ਼ਾਨਦਾਰ ਪਾਰੀ ਖੇਡੀ। ਸਟਰਲਿੰਗ ਨੇ 9 ਚੌਕੇ ਅਤੇ 6 ਛੱਕੇ ਲਗਾਏ, ਜਦਕਿ 12 ਚੌਕੇ ਬਲਬੀਰਨੀ ਦੇ ਬੱਲੇ ਤੋਂ ਆਏ। ਇਸ ਤੋਂ ਪਹਿਲਾਂ ਆਇਰਲੈਂਡ ਲਈ ਤੇਜ਼ ਗੇਂਦਬਾਜ਼ ਕ੍ਰੇਗ ਯੰਗ ਨੇ 10 ਓਵਰਾਂ ‘ਚ 53 ਦੌੜਾਂ ਦੇ ਕੇ ਤਿੰਨ ਵਿਕਟਾਂ ਲਈਆਂ। ਉਸੇ ਸਮੇਂ ਜੋਸ਼ੂਆ ਲਿਟਲ ਅਤੇ ਕਰਟਿਸ ਕੈਮਫਰ ਨੂੰ 2-2 ਵਿਕਟਾਂ ਮਿਲੀਆਂ।
