ਈਡੀ ਦਾ ਕਹਿਣਾ ਹੈ ਕਿ ਵਾਡਰਾ ਅਤੇ ਥੰਪੀ ਦਾ ਲੰਬਾ ਰਿਸ਼ਤਾ ਹੈ ਅਤੇ ਸਮਾਨ ਕਾਰੋਬਾਰ ਕਰਨ ਤੋਂ ਇਲਾਵਾ ਦੋਵੇਂ ਇਕੱਠੇ ਕਈ ਕੰਮ ਕਰਦੇ ਹਨ। ਇਹ ਇਕ ਵੱਡਾ ਮਾਮਲਾ ਹੈ, ਜਿਸ ਦਾ ਸਬੰਧ ਭਗੌੜੇ ਹਥਿਆਰਾਂ ਦੇ ਡੀਲਰ ਸੰਜੇ ਭੰਡਾਰੀ ਨਾਲ ਹੈ। ਭੰਡਾਰੀ ਤੋਂ ਕਈ ਏਜੰਸੀਆਂ ਮਨੀ-ਲਾਂਡਰਿੰਗ, ਵਿਦੇਸ਼ੀ ਮੁਦਰਾ ਅਤੇ ਕਾਲੇ ਧਨ ਸਬੰਧੀ ਕਾਨੂੰਨਾਂ ਅਤੇ ਅਧਿਕਾਰਤ ਸੀਕਰੇਟ ਐਕਟ ਦੀ ਉਲੰਘਣਾ ਦੇ ਮਾਮਲੇ ਦੀ ਜਾਂਚ ਕਰ ਰਹੀਆਂ ਹਨ। ਉਹ ਜਾਂਚ ਏਜੰਸੀਆਂ ਦੇ ਡਰ ਕਾਰਨ 2016 ਵਿੱਚ ਹੀ ਭਾਰਤ ਛੱਡ ਕੇ ਬਰਤਾਨੀਆ ਭੱਜ ਗਿਆ ਸੀ।  ਰਿਪੋਰਟ ਮੁਤਾਬਕ ਥੰਪੀ ‘ਤੇ ਬ੍ਰਿਟਿਸ਼ ਨਾਗਰਿਕ ਸੁਮਿਤ ਚੱਢਾ ਨਾਲ ਮਿਲ ਕੇ ਭੰਡਾਰੀ ਨੂੰ ਅਪਰਾਧ ਦੀ ਕਮਾਈ ਨੂੰ ਲੁਕਾਉਣ ‘ਚ ਮਦਦ ਕਰਨ ਦਾ ਦੋਸ਼ ਹੈ। ਹਾਲਾਂਕਿ, ਈਡੀ ਨੇ ਇਸ ਮਾਮਲੇ ਨਾਲ ਸਬੰਧਤ ਪਹਿਲਾਂ ਦੀ ਚਾਰਜਸ਼ੀਟ ਵਿੱਚ ਰਾਬਰਟ ਵਾਡਰਾ ਨੂੰ ਥੰਪੀ ਦਾ ਨਜ਼ਦੀਕੀ ਸਾਥੀ ਦੱਸਿਆ ਹੈ। ਪਰ ਇਹ ਪਹਿਲੀ ਵਾਰ ਹੈ ਜਦੋਂ ਅਦਾਲਤ ਵਿੱਚ ਪੇਸ਼ ਕੀਤੇ ਗਏ ਅਧਿਕਾਰਤ ਦਸਤਾਵੇਜ਼ ਵਿੱਚ ਪ੍ਰਿਅੰਕਾ ਗਾਂਧੀ ਦਾ ਨਾਮ ਸ਼ਾਮਲ ਕੀਤਾ ਗਿਆ ਹੈ।

ਚਾਰਜਸ਼ੀਟ ਵਿੱਚ ਜਾਂਚ ਏਜੰਸੀ ਨੇ ਦੋਸ਼ ਲਾਇਆ ਹੈ ਕਿ ਐਚਐਲ ਪਾਹਵਾ ਨੇ ਵਾਡਰਾ ਅਤੇ ਥੰਪੀ ਦੋਵਾਂ ਨੂੰ ਜ਼ਮੀਨਾਂ ਵੇਚੀਆਂ ਹਨ। ਉਸ ਨੂੰ ਹਰਿਆਣਾ ਵਿੱਚ ਜ਼ਮੀਨ ਖਰੀਦਣ ਲਈ ਬੇਨਾਮੀ ਪੈਸੇ ਦਿੱਤੇ ਗਏ ਸਨ ਅਤੇ ਵਾਡਰਾ ਨੇ ਜ਼ਮੀਨ ਦੀ ਵਿਕਰੀ ਲਈ ਪੂਰੀ ਰਕਮ ਅਦਾ ਨਹੀਂ ਕੀਤੀ। ਪਾਹਵਾ ਨੇ 2006 ਵਿੱਚ ਪ੍ਰਿਯੰਕਾ ਗਾਂਧੀ ਨੂੰ ਖੇਤੀ ਵਾਲੀ ਜ਼ਮੀਨ ਵੇਚ ਦਿੱਤੀ ਅਤੇ ਫਿਰ 2010 ਵਿੱਚ ਉਸ ਤੋਂ ਵਾਪਸ ਖਰੀਦ ਲਈ। ਇੱਥੇ ਧਿਆਨ ਦੇਣ ਵਾਲੀ ਗੱਲ ਇਹ ਹੈ ਕਿ ਰਾਬਰਟ ਅਤੇ ਪ੍ਰਿਅੰਕਾ ਨੂੰ ਮੁਲਜ਼ਮ ਵਜੋਂ ਨਾਮਜ਼ਦ ਨਹੀਂ ਕੀਤਾ ਗਿਆ ਹੈ। ਪਰ ਥੰਪੀ ਅਤੇ ਵਾਡਰਾ ਦੇ ਰਿਸ਼ਤੇ ਨੂੰ ਦਰਸਾਉਣ ਲਈ ਜ਼ਮੀਨ ਦੀ ਖਰੀਦੋ-ਫਰੋਖਤ ਦਾ ਜ਼ਿਕਰ ਕੀਤਾ ਗਿਆ ਹੈ।