ਰੂਸ ਦੇ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਆਪਣੀ ਜ਼ਿੰਦਗੀ ਨੂੰ ਬਹੁਤ ਪਿਆਰ ਕਰਦੇ ਹਨ ਅਤੇ ਮੌਤ ਤੋਂ ਡਰਦੇ ਹਨ। ਇਹ ਕਹਿਣਾ ਹੈ ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਂਸਕੀ ਦਾ। ਜ਼ੇਲੇਂਸਕੀ ਨੇ ਹਾਲ ਹੀ ‘ਚ ਆਪਣੇ ਇਕ ਇੰਟਰਵਿਊ ‘ਚ ਪੁਤਿਨ ‘ਤੇ ਨਿਸ਼ਾਨਾ ਸਾਧਿਆ ਸੀ। ਉਨ੍ਹਾਂ ਕਿਹਾ ਕਿ ਜੇ ਪੁਤਿਨ ਨੇ ਯੂਕਰੇਨ ‘ਤੇ ਪ੍ਰਮਾਣੂ ਹਮਲਾ ਕੀਤਾ ਤਾਂ ਉਹ ਖੁਦ ਨਹੀਂ ਬਚਣਗੇ।
ਦਰਅਸਲ, ਯੂਕਰੇਨ ਦੇ ਰਾਸ਼ਟਰਪਤੀ ਇਸ ਮਹੀਨੇ ਨੈੱਟਫਲਿਕਸ ‘ਤੇ ਇੱਕ ਮਸ਼ਹੂਰ ਸ਼ੋਅ ਵਿੱਚ ਨਜ਼ਰ ਆਏ ਸਨ। ਜ਼ੇਲੇਨਸਕੀ ਨੇ ਓਟੀਟੀ ਪਲੇਟਫਾਰਮ ਦੇ ਮਸ਼ਹੂਰ ਸ਼ੋਅ ‘ਡੇਵਿਡ ਲੈਟਰਮੈਨ: ਮਾਈ ਨੈਕਸਟ ਗੈਸਟ ਨੀਡਜ਼ ਨੋ ਇੰਟਰੋਡਕਸ਼ਨ’ ਵਿੱਚ ਖੁੱਲ੍ਹ ਕੇ ਆਪਣੇ ਦਿਲ ਦੀ ਗੱਲ ਕੀਤੀ।
ਅਨੁਭਵੀ ਅਮਰੀਕੀ ਟਾਕ ਸ਼ੋਅ ਹੋਸਟ ਡੇਵਿਡ ਲੈਟਰਮੈਨ ਨੇ ਆਪਣੇ “ਮਾਈ ਨੈਕਸਟ ਗੈਸਟ” ਸ਼ੋਅ ‘ਤੇ ਬਾਲੀਵੁੱਡ ਅਭਿਨੇਤਾ ਸ਼ਾਹਰੁਖ ਖਾਨ ਸਮੇਤ ਲਗਭਗ ਸਾਰੀਆਂ ਪ੍ਰਮੁੱਖ ਹਸਤੀਆਂ ਅਤੇ ਵਿਸ਼ਵ ਨੇਤਾਵਾਂ ਦੀ ਇੰਟਰਵਿਊ ਕੀਤੀ ਹੈ। ਇਸ ਵਾਰ ਉਨ੍ਹਾਂ ਦੇ ਸ਼ੋਅ ਦੇ ਮਹਿਮਾਨ ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਦਿਮੀਰ ਜ਼ੇਲੇਨਸਕੀ ਬਣੇ। ਡੇਵਿਡ ਲੈਟਰਮੈਨ ਨੇ ਅਕਤੂਬਰ ਵਿੱਚ ਨੈੱਟਫਲਿਕਸ ਟੀਮ ਦੇ ਨਾਲ ਯੂਕਰੇਨ ਦਾ ਦੌਰਾ ਕੀਤਾ ਤਾਂ ਜੋ ਜੰਗ ਪੀੜਤ ਦੇਸ਼ ਵਿੱਚ ਸਥਿਤੀ ਨੂੰ ਨੇੜਿਓਂ ਦੇਖਿਆ ਜਾ ਸਕੇ ਅਤੇ ਜ਼ੇਲੇਂਸਕੀ ਦੀ ਇੰਟਰਵਿਊ ਕੀਤੀ ਜਾ ਸਕੇ। ਰਾਜਧਾਨੀ ਕੀਵ ਵਿੱਚ ਇੱਕ ਸਬਵੇਅ ਪਲੇਟਫਾਰਮ ਦੇ ਹੇਠਾਂ ਇੱਕ ਅੰਡਰਗ੍ਰਾਊਂਡ ਬੰਕਰ (ਜ਼ਮੀਨ ਤੋਂ 300 ਫੁੱਟ ਹੇਠਾਂ) ਵਿੱਚ 75 ਸਾਲਾਂ ਡੇਵਿਡ ਲੈਟਰਮੈਨ ਨਾਲ ਗੱਲ ਕਰਦਿਆਂ, ਜ਼ੇਲੇਂਸਕੀ ਨੇ ਕਿਹਾ ਕਿ ਉਹ ਥਕੇ ਨਹੀਂ ਹਨ ਅਤੇ ਉਨ੍ਹਾਂ ਦਾ ਪੂਰਾ ਦੇਸ਼ ਇਸ ਯੁੱਧ ਵਿੱਚ ਇੱਕਜੁੱਟ ਹੋ ਕੇ ਲੜ ਰਿਹਾ ਹੈ।
ਜ਼ੇਲੇਂਸਕੀ ਨੇ ਕਿਹਾ ਕਿ ਉਨ੍ਹਾਂ ਨੇ ਆਪਣੇ ਦੇਸ਼ ‘ਚ ਇਕ ਸਰਵੇ ਕਰਵਾਇਆ ਹੈ। ਇਸ ਸਰਵੇਖਣ ਵਿੱਚ ਯੂਕਰੇਨ ਦੇ 98 ਫੀਸਦੀ ਲੋਕ ਪਾਣੀ ਅਤੇ ਬਿਜਲੀ ਤੋਂ ਬਿਨਾਂ ਰਹਿਣ ਲਈ ਤਿਆਰ ਹਨ। ਜ਼ੇਲੇਂਸਕੀ ਨੇ ਕਿਹਾ, “98 ਫੀਸਦੀ ਲੋਕਾਂ ਨੇ ਕਿਹਾ ਕਿ ਜੇ ਉਹ ਰੂਸੀ ਗੁਲਾਮੀ ਤੋਂ ਬਚ ਸਕਦੇ ਹਨ ਤਾਂ ਉਹ ਪਾਣੀ ਅਤੇ ਬਿਜਲੀ ਤੋਂ ਬਿਨਾਂ ਰਹਿਣ ਲਈ ਤਿਆਰ ਹਨ। ਉਨ੍ਹਾਂ ਕਿਹਾ ਕਿ ਯੂਕਰੇਨ ਵਿਚ ਭੁੱਖਮਰੀ, ਪਾਣੀ ਅਤੇ ਬਿਜਲੀ ਸਪਲਾਈ ‘ਤੇ ਰੂਸ ਦਾ ਕੰਟਰੋਲ ਹੈ। ਉਨ੍ਹਾਂ ਨੇ ਰੂਸੀ ਅਫਸਰਾਂ ਨੂੰ ਵਹਿਸ਼ੀ ਦੱਸਿਆ।
ਹਾਲ ਹੀ ‘ਚ ਪੁਤਿਨ ਨੇ ਯੂਕਰੇਨ ‘ਤੇ ਪ੍ਰਮਾਣੂ ਹਮਲੇ ਦੀ ਚਿਤਾਵਨੀ ਦਿੱਤੀ ਸੀ। ਇਸ ਬਾਰੇ ਜਦੋਂ ਲੈਟਰਮੈਨ ਨੇ ਜ਼ੇਲੇਂਸਕੀ ਨੂੰ ਪੁੱਛਿਆ ਕਿ ਕੀ ਉਹ ਇਸ ਧਮਕੀ ਤੋਂ ਡਰਦੇ ਹਨ? ਇਸ ‘ਤੇ ਜ਼ੇਲੇਂਸਕੀ ਨੇ ਕਿਹਾ, “ਹਾਂ, ਇਹ ਡਰ ਦੀ ਗੱਲ ਹੈ। ਦੋ ਵੱਖ-ਵੱਖ ਮੁੱਦੇ ਹਨ ਜੋ ਇਸ ਖਤਰੇ ਨੂੰ ਜਨਮ ਦੇ ਸਕਦੇ ਹਨ। ਪਹਿਲਾ, ਉਨ੍ਹਾਂ ਨੇ ਸਾਡੇ ਪਰਮਾਣੂ ਪਲਾਂਟਾਂ ‘ਤੇ ਕਬਜ਼ਾ ਕਰ ਲਿਆ ਹੈ ਜੋ ਕਿ ਬਹੁਤ ਖਤਰਨਾਕ ਹੈ। ਦੂਜਾ, ਪੁਤਿਨ ਵੱਲੋਂ ਪ੍ਰਮਾਣੂ ਦਾ ਖਤਰਾ ਹੈ।”
ਜ਼ੇਲੇਂਸਕੀ ਨੇ ਕਿਹਾ, “ਮੇਰੀ ਉਨ੍ਹਾਂ (ਪੁਤਿਨ) ਨਾਲ ਇਕ ਵਾਰ ਮੁਲਾਕਾਤ ਹੋਈ ਸੀ। ਮੈਂ ਪੁਤਿਨ ਦੀਆਂ ਅੱਖਾਂ ਵਿਚ ਜੀਊਣ ਦੀ ਇੱਛਾ ਦੇਖੀ ਸੀ। ਉਹ ਆਪਣੀ ਜ਼ਿੰਦਗੀ ਨੂੰ ਪਿਆਰ ਕਰਦੇ ਹਨ। ਉਹ ਇਕ ਲੰਮੀ ਮੇਜ਼ ‘ਤੇ ਵੀ ਬੈਠਦੇ ਹਨ, ਜੋਕਿ ਹਾਸੋਹੀਣਾ ਹੈ। ਉਨ੍ਹਾਂ ਨੂੰ ਡਰ ਹੈ ਕਿ ਕਿਸੇ ਦੇ ਨੇੜੇ ਬੈਠ ਕੇ ਉਨ੍ਹਾਂ ਨੂੰ ਕੋਵਿਡ-19 ਜਾਂ ਕੋਈ ਹੋਰ ਇਨਫੈਕਸ਼ਨ ਹੋ ਜਾਵੇਗਾ। ਇਹ ਸਭ ਦਰਸਾਉਂਦਾ ਹੈ ਕਿ ਉਹ ਮੌਤ ਤੋਂ ਡਰਦੇ ਨੇ ਅਤੇ ਜ਼ਿੰਦਗੀ ਪਿਆਰੀ ਹੈ।”
ਇਹ ਵੀ ਪੜ੍ਹੋ : ਪੱਤਰਕਾਰਾਂ ਨਾਲ ਭਿੜੇ ਐਲਨ ਮਸਕ, ਬੰਦ ਹੋਇਆ ਟਵਿੱਟਰ ਸਪੇਸ, ਜਾਣੋ ਪੂਰਾ ਮਾਮਲਾ
ਜ਼ੇਲੇਂਸਕੀ ਨੇ ਕਿਹਾ, “ਮੈਨੂੰ ਨਹੀਂ ਲੱਗਦਾ ਕਿ ਉਹ ਪਰਮਾਣੂ ਹਥਿਆਰਾਂ ਦੀ ਵਰਤੋਂ ਕਰਨ ਲਈ ਤਿਆਰ ਹਨ। ਪੁਤਿਨ ਨੂੰ ਪਤਾ ਹੈ ਕਿ ਜੇ ਉਹ ਬਟਨ ਦਬਾਉਂਦੇ ਹਨ, ਤਾਂ ਕੋਈ ਹੋਰ ਦੇਸ਼ ਉਨ੍ਹਾਂ ਨੂੰ ਨਿਸ਼ਾਨਾ ਬਣਾਉਂਦੇ ਹੋਏ ਅਗਲਾ ਕਦਮ ਚੁੱਕੇਗਾ। ਉਨ੍ਹਾਂ ਨੂੰ ਨਿੱਜੀ ਤੌਰ ‘ਤੇ ਨਿਸ਼ਾਨਾ ਬਣਾਇਆ ਜਾਵੇਗਾ। ਪੁਤਿਨ ਬਚ ਨਹੀਂ ਸਕਣਗੇ।”
ਜ਼ੇਲੇਂਸਕੀ ਨੇ ਆਪਣੇ ਭਵਿੱਖ ਬਾਰੇ ਦੱਸਿਆ ਕਿ ਜਦੋਂ ਤੱਕ ਇਹ ਜੰਗ ਜਿੱਤੀ ਨਹੀਂ ਜਾਂਦੀ, ਉਹ ਯੂਕਰੇਨ ਦੇ ਰਾਸ਼ਟਰਪਤੀ ਬਣੇ ਰਹਿਣਗੇ। ਉਨ੍ਹਾਂ ਕਿਹਾ ਕਿ ਮੈਂ ਇਹ ਨਹੀਂ ਸੋਚ ਰਿਹਾ ਹਾਂ ਕਿ ਜੰਗ ਖ਼ਤਮ ਹੋਣ ਤੋਂ ਬਾਅਦ ਕੀ ਹੋਵੇਗਾ। ਮੈਂ ਇਸ ਸਭ ਬਾਰੇ ਸੋਚਣ ਲਈ ਤਿਆਰ ਨਹੀਂ ਹਾਂ। ਸੱਚ ਕਹਾਂ ਤਾਂ ਮੈਂ ਬੀਚ ‘ਤੇ ਜਾਣਾ ਚਾਹਾਂਗਾ। ਮੈਂ ਸੱਚਮੁੱਚ ਆਪਣੀ ਜਿੱਤ ਦਾ ਜਸ਼ਨ ਮਨਾਉਣ ਲਈ ਉਤਸੁਕ ਹਾਂ। ਮੈਂ ਸਮੁੰਦਰ ‘ਤੇ ਜਾਣਾ ਅਤੇ ਉੱਥੇ ਬੈਠਣਾ ਚਾਹੁੰਦਾ ਹਾਂ। ਮੈਂ ਉੱਥੇ ਕੁਝ ਬੀਅਰ ਪੀਣਾ ਪਸੰਦ ਕਰਾਂਗਾ।
ਵੀਡੀਓ ਲਈ ਕਲਿੱਕ ਕਰੋ -:
“‘ਮੈਂ ਆਪਣੇ ਪਿਓ ਦੀ 11 ਮਹੀਨੇ ਤੋਂ ਆਵਾਜ਼ ਵੀ ਨਹੀਂ ਸੁਣੀ, ਜੇ ਤੁਸੀਂ ਕੁਝ ਨਹੀਂ ਕਰਨਾ ਤਾਂ ਮੈਨੂੰ ਦਵੋ ਇਜਾਜ਼ਤ’ “
