Huma Qureshi Tarla Trailer: ਹੁਮਾ ਕੁਰੈਸ਼ੀ ਦੀ ਫਿਲਮ ‘ਤਰਲਾ’ ਦਾ ਟ੍ਰੇਲਰ ਰਿਲੀਜ਼ ਹੋ ਗਿਆ ਹੈ। ਇਹ ਫਿਲਮ ਪ੍ਰਸਿੱਧ ਸ਼ੈੱਫ ਅਤੇ ਕੁੱਕਬੁੱਕ ਲੇਖਕ ਤਰਲਾ ਦਲਾਲ ਦੀ ਬਾਇਓਪਿਕ ਹੈ। ਹੁਮਾ ਇਸ ਫਿਲਮ ‘ਚ ਤਰਲਾ ਦਲਾਲ ਦਾ ਕਿਰਦਾਰ ਨਿਭਾ ਰਹੀ ਹੈ, ਸ਼ਾਰੀਬ ਹਾਸ਼ਮੀ ਉਨ੍ਹਾਂ ਦੇ ਪਤੀ ਨਲਿਨ ਦਲਾਲ ਦੀ ਭੂਮਿਕਾ ‘ਚ ਨਜ਼ਰ ਆਉਣਗੇ।
![Huma Qureshi Tarla Trailer](https://dailypost.in/wp-content/uploads/2023/06/image-853.png)
ਟ੍ਰੇਲਰ ਦੀ ਸ਼ੁਰੂਆਤ ਤਰਲਾ ਦਲਾਲ ਉਰਫ ਹੁਮਾ ਕੁਰੈਸ਼ੀ ਨਾਲ ਹੁੰਦੀ ਹੈ, ਜਿਸ ਨੂੰ ਮੁੰਡੇ ਵਿਆਹ ਲਈ ਦੇਖਣ ਆਉਂਦੇ ਹਨ। ਤਰਲਾ ਨੇ ਸ਼ਾਰੀਬ ਨਾਲ ਵਿਆਹ ਕਰਵਾ ਲਿਆ। ਵਿਆਹ ਤੋਂ ਬਾਅਦ ਤਰਲਾ ਆਪਣੀ ਵੱਖਰੀ ਪਛਾਣ ਬਣਾਉਣਾ ਚਾਹੁੰਦੀ ਹੈ ਅਤੇ ਆਪਣੀ ਕਾਮਯਾਬੀ ਦਾ ਰਾਹ ਲੱਭਦੀ ਹੈ।
ਫਿਰ ਉਹ ਆਪਣੀ ਕੁਕਿੰਗ ਕਲਾਸ ਸ਼ੁਰੂ ਕਰਦੀ ਹੈ ਅਤੇ ਕੁਝ ਹੀ ਸਮੇਂ ਵਿੱਚ ਉਹ ਇੱਕ ਮਸ਼ਹੂਰ ਸ਼ੈੱਫ ਬਣ ਜਾਂਦੀ ਹੈ। ਤੁਹਾਨੂੰ ਦੱਸ ਦਈਏ ਕਿ ਮਸ਼ਹੂਰ ਸ਼ੈੱਫ ਤਰਲਾ ਦਲਾਲ ਨੇ ਕੁਕਿੰਗ ‘ਤੇ ਸੌ ਤੋਂ ਜ਼ਿਆਦਾ ਕਿਤਾਬਾਂ ਲਿਖੀਆਂ ਹਨ, ਜਿਨ੍ਹਾਂ ਨੂੰ ਔਰਤਾਂ ਵਲੋਂ ਕਾਫੀ ਪਸੰਦ ਕੀਤਾ ਜਾਂਦਾ ਹੈ।
ਫਿਲਮ ‘ਤਰਲਾ’ ‘ਚ ਹੁਮਾ ਤੋਂ ਇਲਾਵਾ ਭਾਰਤੀ ਅਚਰੇਕਰ, ਅਮਰਜੀਤ ਸਿੰਘ, ਸ਼ਾਰਿਬ ਹਾਸ਼ਮੀ ਅਤੇ ਰਾਜੀਵ ਪਾਂਡੇ ਵੀ ਅਹਿਮ ਭੂਮਿਕਾਵਾਂ ਨਿਭਾਉਣਗੇ। ਇਸ ਫਿਲਮ ਦਾ ਨਿਰਦੇਸ਼ਨ ਪੀਯੂਸ਼ ਗੁਪਤਾ ਨੇ ਕੀਤਾ ਹੈ। ਨਿਤੇਸ਼ ਤਿਵਾਰੀ, ਰੋਨੀ ਸਕੂਰਵਾਲਾ ਅਤੇ ਅਸ਼ਵਨੀ ਅਈਅਰ ਨੇ ਫਿਲਮ ਦਾ ਨਿਰਮਾਣ ਕੀਤਾ ਹੈ। ਇਹ ਫਿਲਮ 7 ਜੁਲਾਈ ਨੂੰ OTT ਪਲੇਟਫਾਰਮ Zee5 ‘ਤੇ ਰਿਲੀਜ਼ ਹੋਵੇਗੀ।