ਵੋਕਲ ਕੋਰਡ ਕੈਂਸਰ (ਲੇਰੀਨਜੀਅਲ ਕੈਂਸਰ) ਦੀ ਪਛਾਣ ਹੁਣ ਸਿਰਫ ਆਵਾਜ਼ ਰਾਹੀਂ ਕੀਤੀ ਜਾ ਸਕਦੀ ਹੈ। ਚੰਡੀਗੜ੍ਹ ਪੀਜੀਆਈ ਦੇ ਈਐਨਟੀ ਵਿਭਾਗ ਦੀ ਟੀਮ ਆਰਟੀਫੀਸ਼ੀਅਲ ਇੰਟੈਲੀਜੈਂਸ (ਏਆਈ) ਦੀ ਮਦਦ ਨਾਲ ਇੱਕ ਨਵੀਂ ਸਟੱਡੀ ਕਰਨ ਜਾ ਰਹੀ ਹੈ, ਜਿਸ ਵਿੱਚ ਮਨੁੱਖੀ ਆਵਾਜ਼ ਦੇ ਬਦਲਦੇ ਪੈਟਰਨ ਨਾਲ ਕੈਂਸਰ ਦੀ ਸੰਭਾਵਨਾ ਦਾ ਪਤਾ ਲਗਾਇਆ ਜਾਵੇਗਾ।
ਇਸ ਖੋਜ ਨੂੰ ਇੰਡੀਅਨ ਕੌਂਸਲ ਆਫ਼ ਮੈਡੀਕਲ ਰਿਸਰਚ (ICMR) ਤੋਂ 90 ਲੱਖ ਰੁਪਏ ਦੀ ਫੰਡਿੰਗ ਮਿਲੀ ਹੈ ਅਤੇ ਇਹ ਤਿੰਨ ਸਾਲਾਂ ਵਿੱਚ ਮੁਕੰਮਲ ਹੋਵੇਗੀ। ਇਸ ਖੋਜ ਵਿੱਚ ਲਗਭਗ 1 ਹਜ਼ਾਰ ਬਾਲਗ ਲੋਕਾਂ ਨੂੰ ਸ਼ਾਮਲ ਕੀਤਾ ਜਾਵੇਗਾ।
ਇਸ ਰਿਸਰਚ ਤਹਿਤ ਇੱਕ ਹਜ਼ਾਰ ਲੋਕਾਂ ਦਾ ਵੌਇਸ ਡਾਟਾ ਇਕੱਠਾ ਕੀਤਾ ਜਾਵੇਗਾ। ਇਸ ਵਿੱਚ 2 ਗਰੁੱਪ ਹੋਣਗੇ – ਇੱਕ ਵਿੱਚ, ਪੂਰੀ ਤਰ੍ਹਾਂ ਤੰਦਰੁਸਤ ਬਾਲਗਾਂ ਦੀ ਆਵਾਜ਼ ਦੀ ਸਟੱਡੀ ਕੀਤਾ ਜਾਵੇਗਾ, ਜਦੋਂ ਕਿ ਦੂਜੇ ਗਰੁੱਪ ਵਿੱਚ ਉਹ ਮਰੀਜ਼ ਸ਼ਾਮਲ ਹੋਣਗੇ ਜੋ ਪਹਿਲਾਂ ਤੋਂ ਹੀ ਵੁਆਇਸ ਡਿਸਆਰਡਰ ਦੀ ਸ਼ਿਕਾਇਤ ਕਰਦੇ ਹਨ।
ਹਰੇਕ ਦੀ ਆਵਾਜ਼ ਨੂੰ ਇੱਕ ਵਿਸ਼ੇਸ਼ ਮੋਬਾਈਲ ਐਪ ਵਿੱਚ ਰਿਕਾਰਡ ਕੀਤਾ ਜਾਵੇਗਾ ਅਤੇ ਫਿਰ AI ਸਾਫਟਵੇਅਰ ਨਾਲ ਵਿਸ਼ਲੇਸ਼ਣ ਕੀਤਾ ਜਾਵੇਗਾ। ਸਾਫਟਵੇਅਰ ਜਾਂਚ ਕਰੇਗਾ ਕਿ ਕਿਹੜੀਆਂ ਆਵਾਜ਼ਾਂ ਵਿੱਚ ਅਜਿਹੇ ਪੈਟਰਨ ਹਨ ਜੋ ਕੈਂਸਰ ਦਾ ਸੰਕੇਤ ਦੇ ਸਕਦੇ ਹਨ।
ਰਿਸਰਚ ਟੀਮ ਦਾ ਮੰਨਣਾ ਹੈ ਕਿ ਜਿਵੇਂ-ਜਿਵੇਂ ਇਹ ਤਕਨੀਕ ਜ਼ਿਆਦਾ ਡਾਟਾ ਇਕੱਠਾ ਕਰੇਗੀ, ਇਸ ਦੀ ਸ਼ੁੱਧਤਾ ਵੀ ਵਧੇਗੀ ਅਤੇ ਇਹ ਕੈਂਸਰ ਦਾ ਪਤਾ ਲਗਾਉਣ ਦਾ ਆਸਾਨ ਅਤੇ ਭਰੋਸੇਮੰਦ ਤਰੀਕਾ ਬਣ ਸਕਦੀ ਹੈ।
ਇਹ ਵੀ ਪੜ੍ਹੋ : ਲੁਧਿਆਣਾ : ਸਿਹਤ ਵਿਭਾਗ ਦਾ ਵੱਡਾ ਐਕਸ਼ਨ, ਮਿਲਾਵਟੀ ਦੁੱਧ, ਪਨੀਰ, ਦੇਸੀ ਘਿਓ ਤੇ ਮਠਿਆਈਆਂ ਵੇਚਣ ਵਾਲਿਆਂ ‘ਤੇ ਮਾਰੀ ਰੇਡ
ਚੰਡੀਗੜ੍ਹ ਪੀਜੀਆਈ ਦੇ ਈਐਨਟੀ ਵਿਭਾਗ ਦੀ ਓਪੀਡੀ ਵਿੱਚ ਹਰ ਸਾਲ 100 ਦੇ ਕਰੀਬ ਮਰੀਜ਼ ਵੋਕਲ ਕੋਰਡ ਕੈਂਸਰ ਦੇ ਇਲਾਜ ਲਈ ਆਉਂਦੇ ਹਨ ਅਤੇ 20 ਦੇ ਕਰੀਬ ਮਰੀਜ਼ ਸਰਜਰੀ ਕਰਵਾਉਂਦੇ ਹਨ। ਕਈ ਵਾਰ ਇਨ੍ਹਾਂ ਮਾਮਲਿਆਂ ਦੀ ਜਾਂਚ ਵਿੱਚ ਦੇਰੀ ਹੋ ਜਾਂਦੀ ਹੈ। ਜਾਂਚ ਪ੍ਰਕਿਰਿਆ ਨੂੰ ਆਸਾਨ ਅਤੇ ਤੇਜ਼ ਬਣਾਉਣ ਲਈ AI ਦੀ ਵਰਤੋਂ ਕੀਤੀ ਜਾ ਰਹੀ ਹੈ।
ਇਸ ਪ੍ਰਾਜੈਕਟ ਦੀ ਅਗਵਾਈ ਈਐਨਟੀ ਵਿਭਾਗ ਦੇ ਮੁਖੀ ਡਾ. ਜੈਅੰਤੀ ਬਖਸ਼ੀ ਕਰ ਰਹੇ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਜ਼ਿਆਦਾਤਰ ਮਾਮਲਿਆਂ ਵਿੱਚ ਕੈਂਸਰ ਦਾ ਸਮੇਂ ਸਿਰ ਪਤਾ ਨਾ ਲੱਗਣ ਕਾਰਨ ਇਲਾਜ ਵਿੱਚ ਦੇਰੀ ਹੋ ਜਾਂਦੀ ਹੈ, ਜੋ ਖਤਰਨਾਕ ਸਿੱਧ ਹੁੰਦਾ ਹੈ। ਅਜਿਹੇ ‘ਚ ਜੇ ਸਿਰਫ ਆਵਾਜ਼ ਰਾਹੀਂ ਕੈਂਸਰ ਦੀ ਪਛਾਣ ਕਰਨਾ ਸੰਭਵ ਹੋ ਜਾਂਦਾ ਹੈ ਤਾਂ ਇਹ ਇਲਾਜ ਅਤੇ ਰੋਕਥਾਮ ਲਈ ਇਕ ਕ੍ਰਾਂਤੀਕਾਰੀ ਕਦਮ ਹੋਵੇਗਾ। ਇਹ ਟੈਕਨਾਲੋਜੀ ਭਵਿੱਖ ਵਿੱਚ ਹੋਰ ਆਵਾਜ਼ ਸੰਬੰਧੀ ਵਿਗਾੜਾਂ ਦੀ ਪਛਾਣ ਕਰਨ ਵਿੱਚ ਵੀ ਅਹਿਮ ਭੂਮਿਕਾ ਨਿਭਾ ਸਕਦੀ ਹੈ।
ਵੀਡੀਓ ਲਈ ਕਲਿੱਕ ਕਰੋ -:
