ਕ੍ਰਿਕਟ ਦੀ ਦੁਨੀਆ ‘ਚ ਇਸ ਵੇਲੇ ਵਿਆਹਾਂ ਦਾ ਦੌਰ ਚੱਲ ਰਿਹਾ ਹੈ। ਭਾਰਤ ਅਤੇ ਪਾਕਿਸਤਾਨ ਦੇ ਸਟਾਰ ਕ੍ਰਿਕਟਰ ਵਿਆਹ ਦੇ ਬੰਧਨ ਵਿੱਚ ਬੱਝ ਗਏ ਹਨ। ਪਾਕਿਸਤਾਨੀ ਖਿਡਾਰੀਆਂ ਜਿਵੇਂ ਹੈਰਿਸ ਰਊਫ, ਸ਼ਾਦਾਬ ਖਾਨ ਨੇ ਕੁਝ ਦਿਨ ਪਹਿਲਾਂ ਹੀ ਵਿਆਹ ਕੀਤਾ ਸੀ। ਦੂਜੇ ਪਾਸੇ ਟੀਮ ਇੰਡੀਆ ਦੇ ਸਟਾਰ ਬੱਲੇਬਾਜ਼ ਕੇਐਲ ਰਾਹੁਲ ਨੇ ਤਿੰਨ ਦਿਨ ਪਹਿਲਾਂ ਆਥੀਆ ਸ਼ੈੱਟੀ ਨਾਲ ਵਿਆਹ ਕਰਵਾ ਲਿਆ ਹੈ ਅਤੇ ਹੁਣ ਭਾਰਤੀ ਆਲਰਾਊਂਡਰ ਅਕਸ਼ਰ ਪਟੇਲ ਨੇ ਵੀ ਜ਼ਿੰਦਗੀ ਦਾ ਇਕ ਅਹਿਮ ਮੀਲ ਪੱਥਰ ਪਾਰ ਕਰ ਲਿਆ ਹੈ।
ਭਾਰਤੀ ਆਲਰਾਊਂਡਰ ਅਕਸ਼ਰ ਪਟੇਲ 26 ਜਨਵਰੀ ਵੀਰਵਾਰ ਨੂੰ ਗੁਜਰਾਤ ਦੇ ਵਡੋਦਰਾ ‘ਚ ਵਿਆਹ ਦੇ ਬੰਧਨ ‘ਚ ਬੱਝ ਗਏ। ਅਕਸ਼ਰ ਪਟੇਲ ਨੇ ਆਪਣੀ ਮੰਗੇਤਰ ਮੇਹਾ ਪਟੇਲ ਨਾਲ ਵਿਆਹ ਕਰਵਾ ਲਿਆ ਹੈ।
ਵੀਰਵਾਰ ਸ਼ਾਮ ਨੂੰ ਵਡੋਦਰਾ ਦੇ ਕਬੀਰ ਫਾਰਮ ਤੋਂ ਅਕਸ਼ਰ ਪਟੇਲ ਦੀ ਬਾਰਾਤ ਨਿਕਲੀ, ਜਿਸ ‘ਚ ਬਾਰਾਤੀਆਂ ਨੇ ਖੂਬ ਡਾਂਸ ਕੀਤਾ ਅਤੇ ਆਤਿਸ਼ਬਾਜ਼ੀ ਨੇ ਮਾਹੌਲ ਨੂੰ ਖੁਸ਼ਗਵਾਰ ਬਣਾ ਦਿੱਤਾ।
ਅਕਸ਼ਰ ਪਟੇਲ ਨੇ ਵੀ ਬਾਰਾਤ ਵਿੱਚ ਆਪਣੀ ਐਂਟਰੀ ਸਟਾਈਲਿਸ਼ ਕੀਤੀ ਅਤੇ ਬਾਰਾਤ ਦੇ ਨਾਲ ਵਿੰਟੇਜ ਕਾਰ ਵਿੱਚ ਸਵਾਰ ਹੋ ਕੇ ਵਿਆਹ ਲਈ ਪਹੁੰਚੇ।
ਅਕਸ਼ਰ ਦੀ ਪਤਨੀ ਮੇਹਾ ਪੇਸ਼ੇ ਤੋਂ ਡਾਈਟੀਸ਼ੀਅਨ ਅਤੇ ਨਿਊਟ੍ਰੀਸ਼ਨਿਸਟ ਹੈ। ਅਕਸ਼ਰ ਪਟੇਲ ਅਤੇ ਮੇਹਾ ਪਿਛਲੇ ਕੁਝ ਸਾਲਾਂ ਤੋਂ ਰਿਲੇਸ਼ਨਸ਼ਿਪ ਵਿੱਚ ਸਨ। ਦੋਵਾਂ ਨੇ 2022 ‘ਚ ਅਕਸ਼ਰ ਪਟੇਲ ਦੇ ਜਨਮ ਦਿਨ ‘ਤੇ ਹੀ ਮੰਗਣੀ ਕਰ ਲਈ ਸੀ ਅਤੇ ਹੁਣ ਇਕ ਸਾਲ ਬਾਅਦ ਵਿਆਹ ਦੀਆਂ ਰਸਮਾਂ ਪੂਰੀਆਂ ਕੀਤੀਆਂ ਹਨ।
ਦੋਵਾਂ ਨੇ ਕੁਝ ਦਿਨ ਪਹਿਲਾਂ ਆਪਣੇ ਲਈ ਇਕ ਨਵੀਂ ਮਰਸਡੀਜ਼ ਬੈਂਜ਼ ਸੀ ਕਲਾਸ ਕਾਰ ਵੀ ਖਰੀਦੀ ਸੀ, ਜਿਸ ਦੀਆਂ ਤਸਵੀਰਾਂ ਮੇਹਾ ਨੇ ਆਪਣੇ ਇੰਸਟਾਗ੍ਰਾਮ ਅਕਾਊਂਟ ‘ਤੇ ਸ਼ੇਅਰ ਕੀਤੀਆਂ ਸਨ।
ਅਕਸ਼ਰ ਨੇ ਆਪਣੇ ਵਿਆਹ ਲਈ ਨਿਊਜ਼ੀਲੈਂਡ ਖਿਲਾਫ ਵਨਡੇ ਅਤੇ ਟੀ-20 ਸੀਰੀਜ਼ ਤੋਂ ਆਰਾਮ ਲਿਆ ਸੀ ਅਤੇ ਵੀਰਵਾਰ ਨੂੰ ਆਪਣੇ ਕਰੀਬੀ ਦੋਸਤਾਂ ਅਤੇ ਸੈਂਕੜੇ ਮਹਿਮਾਨਾਂ ਦੀ ਮੌਜੂਦਗੀ ‘ਚ ਇਹ ਪਵਿੱਤਰ ਕਾਰਜ ਕੀਤਾ।
ਇਹ ਵੀ ਪੜ੍ਹੋ : MPs ਨੂੰ ਘੱਟ ਸੈਲਰੀ, ਖੁਫੀ ਏਜੰਸੀਆਂ ਦੇ ਖਰਚੇ ‘ਚ ਕਟੌਤੀ, ਕੰਗਾਲ ਪਾਕਿਸਤਾਨ ਬਚਾ ਰਿਹੈ ਪਾਈ-ਪਾਈ
