ਲੁਧਿਆਣਾ ਦੇ ਦੁਗਰੀ ਇਲਾਕੇ ਵਿਚ ਇਕ ਦਿਲ ਦਹਿਲਾ ਦੇਣ ਵਾਲੀ ਘਟਨਾ ਸਾਹਮਣੇ ਆਈ ਹੈ। ਦੁਗਰੀ ਫੇਜ਼-1 ਵਿਚ ਦਿਹਾੜੀ ‘ਤੇ ਕੰਮ ਕਰ ਰਹੀ ਵਿਆਹੁਤਾ ਮਹਿਲਾ ‘ਤੇ ਬਾਈਕ ਸਵਾਰ ਨੇ ਤੇਜ਼ਾਬ ਸੁੱਟ ਦਿੱਤਾ। ਹਮਲੇ ਵਿਚ ਮਹਿਲਾ ਦਾ ਚਿਹਰਾ ਤੇ ਅੱਖਾਂ ਬੁਰੀ ਤਰ੍ਹਾਂ ਝੁਲਸ ਗਈਆਂ। ਫਸਟ ਏਡ ਮਗਰੋਂ ਉਸ ਨੂੰ ਗੰਭੀਰ ਹਾਲਤ ਵਿਚ ਚੰਡੀਗੜ੍ਹ ਦੇ ਪੀਜੀਆਈ ਰੈਫਰ ਕਰ ਦਿੱਤਾ ਗਿਆ ਹੈ।
ਘਟਨਾ ਬੀਤੀ ਦੁਪਹਿਰ 2 ਵਜੇ ਦੀ ਹੈ। ਪੀੜਤ ਮਹਿਲਾ ਸਾਵਿਤਰੀ ਦੁਗਰੀ ਦੇ ਗੁਰੂਗਿਆਨ ਵਿਹਾਰ ਫੇਜ-1 ਸਥਿਤ ਪਲਾਟ ਵਿਚ ਰੋੜੀ ਪਾਉਣ ਦਾ ਕੰਮ ਕਰ ਰਹੀ ਸੀ ਕਿ ਉਦੋਂ ਹੀ ਬਾਈਕ ‘ਤੇ ਸਵਾਰ ਇਕ ਨੌਜਵਾਨ ਉਥੇ ਪਹੁੰਚਿਆ। ਉਸ ਨੇ ਸਿਰ ‘ਤੇ ਪਗੜੀ ਤੇ ਉਪਰ ਤੋਂ ਹੈਲਮੇਟ ਪਹਿਨਿਆ ਹੋਇਆ ਸੀ ਜਿਸ ਨਾਲ ਪਛਾਣ ਮੁਸ਼ਕਲ ਹੋ ਗਈ। ਮਹਿਲਾ ਨੂੰ ਲੱਗਾ ਕਿ ਪਲਾਟ ਮਾਲਕ ਦਾ ਕੋਈ ਲੜਕਾ ਸਾਮਾਨ ਦੇਣ ਆਇਆ ਹੋਵੇਗਾ।
ਜਿਵੇਂ ਹੀ ਉਹ ਕੋਲ ਪਹੁੰਚੀ ਬਾਈਕ ਸਵਾਰ ਨੇ ਤੇਜ਼ਾਬ ਦੀ ਬੋਤਲ ਕੱਢੀ ਤੇਉਸ ਦੇ ਮੂੰਹ ‘ਤੇ ਸੁੱਟ ਦਿੱਤੀ ਤੇ ਕਿਹਾ ਕਿ ਹੁਣ ਤੂੰ ਕਿਸੇ ਕੰਮ ਦੇ ਲਾਇਕ ਨਹੀਂ ਰਹੇਗੀ। ਤੇਜ਼ਾਬ ਚਿਹਰੇ ‘ਤੇ ਡਿੱਗਦੇ ਹੀ ਮਹਿਲਾ ਦਰਦ ਨਾਲ ਚੀਕ ਉਠੀ। ਮੁਲਜ਼ਮ ਮੌਕੇ ਤੋਂ ਫਰਾਰ ਹੋ ਗਿਆ। ਮੌਕੇ ‘ਤੇ ਮੌਜੂਦ ਲੋਕਾਂ ਨੇ ਉਸ ਨੂੰ ਤੁਰੰਤ ਸਿਵਲ ਹਸਪਤਾਲ ਪਹੁੰਚਾਇਆ ਜਿਥੇ ਹਾਲਤ ਗੰਭੀਰ ਹੋਣ ‘ਤੇ ਡਾਕਟਰਾਂ ਨੇ ਉਸ ਨੂੰ ਪੀਜੀਆਈ ਚੰਡੀਗੜ੍ਹ ਰੈਫਰ ਕਰ ਦਿੱਤਾ।
ਇਹ ਵੀ ਪੜ੍ਹੋ : ਮੋਹਾਲੀ ਦੇ Fortis ਹਸਪਤਾਲ ਸਣੇ ਕਈ ਸਕੂਲਾਂ ਨੂੰ ਮਿਲੀ ਉਡਾਉਣ ਦੀ ਧ.ਮਕੀ, ਹਸਪਤਾਲ ‘ਚ ਦਾਖ਼ਲ ਹਨ CM ਮਾਨ
ਪੀੜਤ ਮਹਿਲਾ ਵਿਆਹੁਤਾ ਹੈ ਤੇ ਉਸ ਦੇ ਤਿੰਨ ਬੱਚੇ ਹਨ। ਪਰਿਵਾਰ ਇਸ ਘਟਨਾ ਨਾਲ ਸਦਮੇ ਵਿਚ ਹੈ। ਇਲਾਜ ਜਾਰੀ ਹੈ ਤੇ ਡਾਕਟਰਾਂ ਮੁਤਾਬਕ ਉਸ ਦੀਆਂ ਅੱਖਾਂ ਤੇ ਚਿਹਰੇ ਨੂੰ ਕਾਫੀ ਨੁਕਸਾਨ ਪਹੁੰਚਿਆ ਹੈ। ਪੁਲਿਸ ਸੀਸੀਟੀਵੀ ਫੁਟੇਜ ਖੰਗਾਲ ਰਹੀ ਹੈ ਤੇ ਮੁਲਜ਼ਮ ਦੀ ਭਾਲ ਕੀਤੀ ਜਾ ਰਹੀ ਹੈ।
