ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਜਲੰਧਰ ਦੌਰੇ ਦੇ ਮੱਦੇਨਜ਼ਰ ਜਲੰਧਰ ਦਿਹਾਤੀ ਪੁਲਿਸ ਨੇ ਟ੍ਰੈਫਿਕ ਐਡਵਾਇਜਰੀ ਜਾਰੀ ਕੀਤੀ ਹੈ। ਅੱਜ ਸਵੇਰੇ 8 ਵਜੇ ਤੋਂ ਰਾਤ 8 ਵਜੇ ਤੱਕ ਸੁਰੱਖਿਆ ਵਿਵਸਥਾ ਦੇ ਚੱਲਦਿਆਂ ਕਈ ਰਸਤਿਆਂ ‘ਤੇ ਆਵਾਜਾਈ ਪ੍ਰਭਾਵਿਤ ਰਹੇਗੀ ਤੇ ਵਾਹਨਾਂ ਨੂੰ ਬਦਲਵੇ ਰੂਟਾਂ ‘ਤੇ ਭੇਜਿਆ ਜਾਵੇਗਾ।
ਪੁਲਿਸ ਮੁਤਾਬਕ ਵੀਵੀਆਈਪੀ ਸੁਰੱਖਿਆ, ਆਵਾਜਾਈ ਨੂੰ ਸੁਚਾਰੂ ਬਣਾਏ ਰੱਖਣ ਤੇ ਆਮ ਲੋਕਾਂ ਦੀ ਸੁਰੱਖਿਆ ਲਈ ਖਾਸ ਟ੍ਰੈਫਿਕ ਪ੍ਰਬੰਧ ਲਾਗੂ ਕੀਤੇ ਗਏ ਹਨ। ਲਾਲ ਰੰਗ ਵਿੱਚ ਚਿੰਨ੍ਹਿਤ ਰੂਟਾਂ ‘ਤੇ ਆਮ ਵਾਹਨਾਂ ਦੀ ਆਵਾਜਾਈ ‘ਤੇ ਪੂਰੀ ਤਰ੍ਹਾਂ ਪਾਬੰਦੀ ਹੋਵੇਗੀ ਜਦੋਂ ਕਿ ਹਰੇ ਰੰਗ ਵਿੱਚ ਚਿੰਨ੍ਹਿਤ ਰੂਟਾਂ ਨੂੰ ਡਾਇਵਰਸ਼ਨ ਰੂਟਾਂ ਵਜੋਂ ਵਰਤਿਆ ਜਾਵੇਗਾ। ਦਸੂਹਾ, ਟਾਂਡਾ, ਹੁਸ਼ਿਆਰਪੁਰ, ਫਗਵਾੜਾ, ਨਕੋਦਰ, ਕਾਲਾ ਸੰਘਿਆਂ, ਕਪੂਰਥਲਾ ਤੇ ਸੁਭਾਨਪੁਰ ਤੋਂ ਜਲੰਧਰ ਆਉਣ ਵਾਲੇ ਵਾਹਨਾਂ ਨੂੰ ਬਦਲਵੇ ਰੂਟਾਂ ਤੋਂ ਹੋ ਕੇ ਲੰਘਣਾ ਹੋਵੇਗਾ।
ਸਥਾਨਕ ਲੋਕਾਂ ਦੀ ਸਹੂਲਤ ਲਈ 31 ਮੁੱਖ ਰੂਟਾਂ ‘ਤੇ ਡਾਇਵਰਜ਼ਨ ਲਾਗੂ ਕੀਤਾ ਗਿਆ ਹੈ। ਦੂਜੇ ਪਾਸੇ ਚੁਗਿੱਟੀ, ਅੰਡਰਬ੍ਰਿਜ ਚੁਗਿੱਟੀ, ਬੀਬੀਐੱਮਬੀ ਕਾਲੋਨੀ ਦੇ ਕੋਲੋਂ ਲੰਘਣ ਵਾਲੇ ਵਾਹਨਾਂ ਨੂੰ ਗੁਰੂ ਨਾਨਕਪੁਰਾ ਕ੍ਰਾਸਿੰਗ ਤੇ ਲਾਡੋਵਾਲੀ ਰੋਡ ਤੋਂ ਹੁੰਦੇ ਹੋਏ ਬੱਸ ਸਟੈਂਡ ਵਲ ਭੇਜਿਆ ਜਾਵੇਗਾ। ਲੰਮਾ ਪਿੰਡ ਚੌਕ ਤੋਂ ਆਉਣ-ਜਾਣ ਵਾਲੇ ਵਾਹਨਾਂ ਨੂੰ ਮਕਸੂਦਾਂ ਤੇ ਸੁਭਾਨਪੁਰ ਵੱਲ ਡਾਇਵਰਟ ਕੀਤਾ ਜਾਵੇਗਾ।
ਜਲੰਧਰ ਤੋਂ ਸ੍ਰੀ ਅੰਮ੍ਰਤਿਸਰ ਸਾਹਿਬ ਜਾਣ ਵਾਲੀਆਂ ਸਾਰੀਆਂ ਬੱਸਾਂ ਕਪੂਰਥਲਾ ਤੇ ਸੁਭਾਨਪੁਰ ਰੂਟ ਤੋਂ ਹੋ ਕੇ ਚੱਲਣਗੀਆਂ। ਹੁਸ਼ਿਆਰਪੁਰ ਰੂਟ ਦੀਆਂ ਬੱਸਾਂ ਨੂੰ ਨਕੋਦਰ ਚੌਕ, ਕਪੂਰਥਲਾ ਚੌਕ, ਵੇਰਕਾ ਮਿਲਕ ਪਲਾਂਟ, ਪਠਾਨਕੋਟ ਚੌਕ, ਕਿਸ਼ਨਗੜ੍ਹ ਤੇ ਆਦਮਪੁਰ ਦੇ ਰਸਤੇ ਭੇਜਿਆ ਜਾਵੇਗਾ। ਲੁਧਿਆਣਾ ਜਾਣ ਵਾਲੀਆਂ ਬੱਸਾਂ ਸਮਰਾ ਚੌਕ, 66 ਫੁੱਟ ਰੋਡ ਜਮਸ਼ੇਰ, ਜੀਐੱਨਏ ਚੌਕ, ਹਵੇਲੀ ਤੇ ਫਗਵਾੜਾ ਰਸਤੇ ਤੋਂ ਚੱਲਣਗੀਆਂ। ਇਸ ਤੋਂ ਇਲਾਵਾ ਪਠਾਨਕੋਟ ਤੋਂ ਜਲੰਧਰ ਆਉਣ ਵਾਲੀਆਂ ਬੱਸਾਂ ਪਠਾਨਕੋਟ ਚੌਕ, ਮਕਸੂਦਾਂ ਚੌਕ, ਵਰਕਸ਼ਾਪ ਚੌਕ, ਕਪੂਰਥਲਾ ਚੌਕ ਤੇ ਨਕੋਦਰ ਚੌਕ ਰੂਟ ਦਾ ਇਸਤੇਮਾਲ ਕਰਨਗੀਆਂ।
ਇਹ ਵੀ ਪੜ੍ਹੋ : PM ਮੋਦੀ ਦੇ ਪੰਜਾਬ ਦੌਰੇ ਤੋਂ ਪਹਿਲਾਂ ਐਕਸ਼ਨ ਮੋਡ ‘ਚ ਪੁਲਿਸ, ਭਾਰੀ ਪੁਲਿਸ ਫੋਰਸ ਬਲ ਨਾਲ ਕੀਤੀ ਚੈਕਿੰਗ
ਦਿਹਾਤੀ ਪੁਲਿਸ ਨੇ ਵਾਹਨ ਚਾਲਕਾਂ ਤੋਂ ਟ੍ਰੈਫਿਕ ਪੁਲਿਸ ਦੇ ਨਿਰਦੇਸ਼ਾਂ ਦਾ ਪਾਲਣ ਕਰਨ ਤੇ ਸਿਰਫ ਤੈਅ ਡਾਇਵਰਜ਼ਨ ਰਸਤਿਆਂ ਦਾ ਇਸਤੇਮਾਲ ਕਰਨ ਦੀ ਅਪੀਲ ਕੀਤੀ ਹੈ. ਨਾਲ ਹੀ ਲੋਕਾਂ ਨੂੰ ਸਲਾਹ ਦਿੱਤੀ ਗਈ ਹੈ ਕਿ ਸੰਭਾਵਿਤ ਜਾਮ ਤੇ ਦੇਰੀ ਤੋਂ ਬਚਣ ਲਈ ਯਾਤਰਾ ਦੀ ਯੋਜਨਾ ਪਹਿਲਾਂ ਤੋਂ ਬਣਾ ਲਓ। ਪੁਲਿਸ ਨੇ ਕਿਹਾ ਕਿ ਇਹ ਵਿਵਸਥਾ ਪ੍ਰਧਾਨ ਮੰਤਰੀ ਦੇ ਦੌਰੇ ਨੂ ਸੁਰੱਖਿਅਤ ਤੇ ਸੁਚਾਰੂ ਢੰਗ ਨਾਲ ਸੰਪੰਨ ਕਰਾਉਣ ਦੇ ਨਾਲ ਆਮ ਲੋਕਾਂ ਦੀ ਸਹੂਲਤ ਨੂੰ ਬਣਾਏ ਰਖਣ ਲਈ ਕੀਤੀ ਗਈ ਹੈ।
ਵੀਡੀਓ ਲਈ ਕਲਿੱਕ ਕਰੋ -:
