19-year-old : ਮੋਗਾ : ਕੱਲ੍ਹ ਰਾਤ ਜਿਲ੍ਹਾ ਮੋਗਾ ਵਿਖੇ ਬਾਘਾਪੁਰਾਣਾ-ਨਿਹਾਲ ਸਿੰਘ ਵਾਲਾ ਰੋਡ ‘ਤੇ ਦਿਲ ਕੰਬਾਊਂ ਘਟਨਾ ਦੇਖਣ ਨੂੰ ਮਿਲੀ ਜਿਥੇ 19 ਸਾਲਾ ਨੌਜਵਾਨ ਦੇਵ ਮੱਕੜ (19) ਦੀ ਤੇਜ਼ ਰਫਤਾਰ ਬਾਈਕ ਇੱਕ ਬੇਸਹਾਰਾ ਗਾਂ ਨਾਲ ਟਕਰਾ ਗਈ। ਬਾਈਕ ‘ਤੇ ਉਸ ਦਾ ਦੋਸਤ ਵੀ ਬੈਠਾ ਹੋਇਆ ਸੀ। ਦੇਵ ਮੱਕੜ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ ਜਦਕਿ ਉਸ ਦੇ ਦੋਸਤ ਦੀ ਹਾਲਤ ਗੰਭੀਰ ਹੈ, ਜਿਸ ਨੂੰ ਲੁਧਿਆਣਾ ਵਿਖੇ ਹਸਪਤਾਲ ‘ਚ ਭਰਤੀ ਕਰਵਾਇਆ ਗਿਆ ਹੈ।
ਮਿਲੀ ਜਾਣਕਾਰੀ ਮੁਤਾਬਕ ਕੱਲ੍ਹ ਰਾਤ ਅਵਤਾਰ ਕਾਲੋਨੀ ਵਿਖੇ ਕੁਝ ਨੌਜਵਾਨ ਤੇਜ਼ ਰਫਤਾਰ ਮੋਟਰਸਾਈਕਲ ਚਲਾ ਰਹੇ ਸਨ ਜਿਨ੍ਹਾਂ ਨੂੰ ਲੋਕਾਂ ਨੇ ਅਜਿਹਾ ਕਰਨ ਤੋਂ ਮਨ੍ਹਾ ਵੀ ਕੀਤਾ ਕਿ ਅਜਿਹਾ ਨਾ ਕਰੋ ਨਹੀਂ ਤਾਂ ਕੋਈ ਹਾਦਸਾ ਵਾਪਰ ਸਕਦਾ ਹੈ ਪਰ ਉਹ ਬਾਜ਼ ਨਹੀਂ ਆਏ। ਇਸੇ ਦੌਰਾਨ ਇੱਕ ਬਾਈਕ ‘ਤੇ ਦੇਵ ਮੱਕੜ ਅਤੇ ਉਸ ਦਾ ਦੋਸਤ ਰੋਪੇਸ਼ ਤੇਜ਼ ਰਫਤਾਰ ਨਾਲ ਜਾ ਰਹੇ ਸਨ ਕਿ ਅਚਾਨਕ ਉਨ੍ਹਾਂ ਦੀ ਬਾਈਕ ਇੱਕ ਗਾਂ ਨਾਲ ਟਕਰਾ ਗਈ। ਹਾਦਸਾ ਇੰਨਾ ਭਿਆਨਕ ਸੀ ਕਿ ਦੇਵ ਮੱਕੜ ਦੀ ਮੌਕੇ ‘ਤੇ ਮੌਤ ਹੋ ਗਈ ਤੇ ਗਾਂ ਨੇ ਵੀ ਮੌਕੇ ‘ਤੇ ਹੀ ਦਮ ਤੋੜ ਦਿੱਤਾ ਜਦਕਿ ਉਸ ਦਾ ਦੋਸਤ ਰੋਪੇਸ਼ ਹਾਦਸੇ ਦੌਰਾਨ ਬੁਰੀ ਤਰ੍ਹਾਂ ਜਖਮੀ ਹੋ ਗਿਆ ਜਿਸ ਦੀ ਹਾਲਤ ਗੰਭੀਰ ਹੋਣ ਕਾਰਨ ਉਸ ਨੂੰ ਲੁਧਿਆਣਾ ਵਿਖੇ ਰੈਫਰ ਕਰ ਦਿੱਤਾ ਗਿਆ ਹੈ।
