ਚੰਡੀਗੜ੍ਹ ਵਾਸੀਆਂ ਨੂੰ 2028 ਤੱਕ ਸ਼ਹਿਰ ਵਿੱਚ 24 ਘੰਟੇ ਲਗਾਤਾਰ ਪੀਣ ਵਾਲੇ ਪਾਣੀ ਦੀ ਸਹੂਲਤ ਮਿਲੇਗੀ। ਚੰਡੀਗੜ੍ਹ ਨਗਰ ਨਿਗਮ ਪਿਛਲੇ 7 ਸਾਲਾਂ ਤੋਂ ਇਸ ਅਭਿਲਾਸ਼ੀ ਪ੍ਰਾਜੈਕਟ ‘ਤੇ ਕੰਮ ਕਰ ਰਿਹਾ ਸੀ। ਹੁਣ 16 ਦਸੰਬਰ ਨੂੰ ਇਸ ਪ੍ਰਾਜੈਕਟ ਸਬੰਧੀ ਕਾਰਪੋਰੇਸ਼ਨ ਅਤੇ ਫਰਾਂਸ ਸਰਕਾਰ ਦੀ ਏਜੰਸੀ ਫਰਾਂਸਿਸ ਡੀ ਡਿਵੈਲਪਮੈਂਟ (AFD) ਵਿਚਕਾਰ ਅੰਤਿਮ ਸਮਝੌਤਾ ਸਹੀਬੰਦ ਕੀਤਾ ਜਾਵੇਗਾ।
ਚੰਡੀਗੜ੍ਹ ਨਗਰ ਨਿਗਮ ਮੁਤਾਬਕ ਉਹ ਜਨਵਰੀ ਵਿੱਚ ਇਸ ਪ੍ਰਾਜੈਕਟ ਸਬੰਧੀ ਟੈਂਡਰ ਜਾਰੀ ਕਰ ਸਕਦੇ ਹਨ। ਜਿਸ ਏਜੰਸੀ ਨੂੰ ਇਸ ਪ੍ਰਾਜੈਕਟ ਨੂੰ ਸ਼ੁਰੂ ਕਰਨ ਦਾ ਕੰਮ ਸੌਂਪਿਆ ਜਾਵੇਗਾ, ਉਸ ਨੂੰ ਪੰਜ ਸਾਲਾਂ ਵਿਚ ਇਹ ਕੰਮ ਪੂਰਾ ਕਰਨਾ ਹੋਵੇਗਾ। ਅਜਿਹੇ ‘ਚ ਉਮੀਦ ਹੈ ਕਿ ਸਾਲ 2028 ਤੱਕ ਸ਼ਹਿਰ ਨੂੰ 24 ਘੰਟੇ ਪੀਣ ਵਾਲਾ ਪਾਣੀ ਮਿਲ ਸਕੇਗਾ।
ਦੱਸ ਦੇਈਏ ਕਿ ਇਹ ਪ੍ਰੋਜੈਕਟ 7 ਸਾਲ ਪਹਿਲਾਂ ਸ਼ੁਰੂ ਕੀਤਾ ਗਿਆ ਸੀ। ਚੰਡੀਗੜ੍ਹ ਦੇ ਪ੍ਰਸ਼ਾਸਕ ਬੀਐਲ ਪੁਰੋਹਿਤ ਨੇ ਪਿਛਲੇ ਸਾਲ 14 ਨਵੰਬਰ ਨੂੰ ਮਨੀਮਾਜਰਾ ਵਿਖੇ ਇਸ ਪ੍ਰਾਜੈਕਟ ਦਾ ਨੀਂਹ ਪੱਥਰ ਵੀ ਰੱਖਿਆ ਸੀ। ਇਸ ਸਾਲ 14 ਸਤੰਬਰ ਨੂੰ ਕੇਂਦਰ ਦੇ ਆਰਥਿਕ ਮਾਮਲਿਆਂ ਦੇ ਵਿਭਾਗ ਅਤੇ ਫਰਾਂਸੀਸੀ ਏਜੰਸੀ ਵਿਚਕਾਰ ਕ੍ਰੈਡਿਟ ਫੈਸਿਲਿਟੀ ਐਗਰੀਮੈਂਟ (CFA) ‘ਤੇ ਦਸਤਖਤ ਕੀਤੇ ਗਏ ਸਨ।
ਇਹ ਵੀ ਪੜ੍ਹੋ : ਸਰਕਾਰੀ ਨੌਕਰੀ ਵਾਲੇ ਲਾੜੇ ਨੇ ਵਾਪਸ ਕੀਤੇ ਦਾਜ ਦੇ 11 ਲੱਖ, 1 ਰੁ. ਸ਼ਗਨ ‘ਤੇ ਵਹੁਟੀ ਲਿਆਇਆ ਘਰ
ਜਾਣਕਾਰੀ ਅਨੁਸਾਰ AFD ਨੇ ਇਸ 512 ਕਰੋੜ ਰੁਪਏ ਦੇ ਪ੍ਰੋਜੈਕਟ ਲਈ 412 ਕਰੋੜ ਰੁਪਏ ਕਰਜ਼ੇ ਵਜੋਂ ਮਨਜ਼ੂਰ ਕੀਤੇ ਸਨ। ਇਹ ਕਰਜ਼ਾ 15 ਸਾਲਾਂ ਵਿੱਚ ਅਦਾ ਕੀਤਾ ਜਾਣਾ ਹੈ। ਇਸ ਦੇ ਨਾਲ ਹੀ ਯੂਰਪੀਅਨ ਯੂਨੀਅਨ ਵੀ ਇਸ ਪ੍ਰਾਜੈਕਟ ਲਈ 100 ਕਰੋੜ ਰੁਪਏ ਦੀ ਗ੍ਰਾਂਟ ਦੇ ਰਹੀ ਹੈ।
ਸ਼ਹਿਰ ਵਾਸੀਆਂ ਨੂੰ 24 ਘੰਟੇ ਪੀਣ ਵਾਲਾ ਪਾਣੀ ਮੁਹੱਈਆ ਕਰਵਾਉਣ ਲਈ ਸਾਰੇ ਟਿਊਬਵੈੱਲਾਂ ਨੂੰ ਵਰਤੋਂ ਵਿੱਚ ਲਿਆਂਦਾ ਜਾਵੇਗਾ। ਇਸ ਦੇ ਲਈ 269 ਕਿਲੋਮੀਟਰ ਪਾਈਪਲਾਈਨ ਬਦਲੀ ਜਾਵੇਗੀ। ਇਸ ਪ੍ਰੋਜੈਕਟ ਤਹਿਤ ਲੋਕਾਂ ਦੇ ਘਰਾਂ ਵਿੱਚ ਸਮਾਰਟ ਵਾਟਰ ਮੀਟਰ ਲਗਾਏ ਜਾਣਗੇ। ਸਮਾਰਟ ਮੀਟਰਾਂ ਦੀ ਮਦਦ ਨਾਲ ਵਸਨੀਕ ਵਰਤੇ ਜਾ ਰਹੇ ਪਾਣੀ ਦੀ ਨਿਗਰਾਨੀ ਕਰ ਸਕਣਗੇ।
ਵੀਡੀਓ ਲਈ ਕਲਿੱਕ ਕਰੋ -:
“‘ਮੈਂ ਆਪਣੇ ਪਿਓ ਦੀ 11 ਮਹੀਨੇ ਤੋਂ ਆਵਾਜ਼ ਵੀ ਨਹੀਂ ਸੁਣੀ, ਜੇ ਤੁਸੀਂ ਕੁਝ ਨਹੀਂ ਕਰਨਾ ਤਾਂ ਮੈਨੂੰ ਦਵੋ ਇਜਾਜ਼ਤ’ “
ਜਾਣਕਾਰੀ ਅਨੁਸਾਰ ਇਸ ਸਮੇਂ ਸ਼ਹਿਰ ਦੇ ਉੱਤਰੀ ਅਤੇ ਦੱਖਣੀ ਸੈਕਟਰਾਂ ਵਿੱਚ ਪਾਣੀ ਦੀ ਅਸਮਾਨ ਵੰਡ ਹੋ ਰਹੀ ਹੈ। ਇਕ ਪਾਸੇ ਸੈਕਟਰ 2, 3, 4, 5, 7, 8 ਅਤੇ 9 ਵਿਚ ਪ੍ਰਤੀ ਵਿਅਕਤੀ 1 ਹਜ਼ਾਰ ਲੀਟਰ ਦੀ ਵੰਡ ਹੋ ਰਹੀ ਹੈ। ਜਦੋਂ ਕਿ ਸੈਕਟਰ 33, 34, 35, 36 ਅਤੇ 49 ਵਿੱਚ 400 ਲੀਟਰ ਪ੍ਰਤੀ ਵਿਅਕਤੀ ਵੰਡਿਆ ਜਾ ਰਿਹਾ ਹੈ। ਦੱਸ ਦੇਈਏ ਕਿ ਇਸ ਪ੍ਰੋਜੈਕਟ ਨੂੰ ਲਿਆਉਣ ਦਾ ਇੱਕ ਉਦੇਸ਼ ਸ਼ਹਿਰ ਵਿੱਚ ਪਾਣੀ ਦੀ ਬਰਬਾਦੀ ਨੂੰ ਰੋਕਣਾ ਵੀ ਹੈ।
