ਪੰਜਾਬ ਵਿੱਚ ਸਰਕਾਰੀ ਬੱਸਾਂ ਵਿੱਚ ਔਰਤਾਂ ਦਾ ਸਫ਼ਰ ਮੁਫ਼ਤ ਹੈ। ਪਰ ਅਕਸਰ ਉਨ੍ਹਾਂ ਦੀ ਬੱਸ ਦੇ ਡਰਾਈਵਰ ਅਤੇ ਕੰਡਕਟਰ ਨਾਲ ਝੜਪ ਹੋ ਜਾਂਦੀ ਹੈ। ਹੁਣ ਬਰਨਾਲਾ ਜ਼ਿਲ੍ਹੇ ਦੇ ਕਸਬਾ ਭਦੌੜ ਵਿੱਚ ਵਿਵਾਦ ਦਾ ਇੱਕ ਨਵਾਂ ਮਾਮਲਾ ਸਾਹਮਣੇ ਆਇਆ ਹੈ। ਜਿੱਥੇ ਪੀ.ਆਰ.ਟੀ.ਸੀ ਦੀ ਬੱਸ ਵਿੱਚ ਇੱਕ ਔਰਤ ਨੇ ਟਿਕਟ ਨੂੰ ਲੈ ਕੇ ਹੰਗਾਮਾ ਮਚਾਇਆ ਅਤੇ ਪ੍ਰੇਸ਼ਾਨ ਡਰਾਈਵਰ ਸਵਾਰੀਆਂ ਨਾਲ ਭਰੀ ਬੱਸ ਲੈ ਕੇ ਥਾਣਾ ਭਦੌੜ ਪਹੁੰਚ ਗਿਆ। ਇਸ ਤੋਂ ਬਾਅਦ ਔਰਤ ਨੇ ਡਰਾਈਵਰ ਅਤੇ ਕੰਡਕਟਰ ਤੋਂ ਮੁਆਫੀ ਮੰਗੀ ਅਤੇ 30 ਦੀ ਟਿਕਟ ਉਸ ਨੂੰ ਤਿੰਨ ਹਜ਼ਾਰ ਵਿੱਚ ਪੈ ਗਈ।
ਜਾਣਕਾਰੀ ਮੁਤਾਬਕ ਪੀਆਰਟੀਸੀ ਦੀ ਬੱਸ ਸਵੇਰੇ ਕਰੀਬ 11 ਵਜੇ ਫਰੀਦਕੋਟ ਤੋਂ ਬਰਨਾਲਾ ਜਾ ਰਹੀ ਸੀ। ਰਸਤੇ ਵਿੱਚ ਭਗਤਾ ਭਾਈ ਦੀ ਇੱਕ ਔਰਤ ਮਹਿੰਦਰਪਾਲ ਕੌਰ ਬੱਸ ਵਿੱਚ ਸਵਾਰ ਹੋ ਗਈ। ਫੋਨ ‘ਤੇ ਗੱਲ ਕਰਨ ਕਾਰਨ ਟਿਕਟ ਲੈਣਾ ਭੁੱਲ ਗਈ। ਜਦੋਂ ਬੱਸ ਸਲਾਬਤਪੁਰਾ ਪਹੁੰਚੀ ਤਾਂ ਕੰਡਕਟਰ ਨੇ ਔਰਤ ਤੋਂ ਟਿਕਟ ਬਾਰੇ ਪੁੱਛਿਆ ਪਰ ਔਰਤ ਫੋਨ ‘ਤੇ ਗੱਲ ਕਰਨ ‘ਚ ਰੁੱਝੀ ਹੋਈ ਸੀ। ਔਰਤ ਨੇ ਮੰਨਿਆ ਕਿ ਉਸ ਨੇ ਕੰਡਕਟਰ ਨੂੰ ਆਪਣਾ ਆਧਾਰ ਕਾਰਡ ਦਿਖਾ ਕੇ ਟਿਕਟ ਨਹੀਂ ਲਈ ਸੀ। ਇਸ ‘ਤੇ ਕੰਡਕਟਰ ਨੇ ਮਹਿਲਾ ਨੂੰ ਕਿਹਾ ਕਿ ਜੇ ਚੈਕਰ ਬੱਸ ‘ਚ ਸਵਾਰ ਹੁੰਦਾ ਤਾਂ ਉਸ ਨੂੰ 10 ਫੀਸਦੀ ਜੁਰਮਾਨਾ ਕੀਤਾ ਜਾਣਾ ਸੀ ਜਦਕਿ ਉਸ ਨੂੰ ਮੁਫਤ ਬੱਸ ਦੀ ਸਹੂਲਤ ਦਿੱਤੀ ਜਾਂਦੀ ਹੈ।
ਇਸ ਤੋਂ ਬਾਅਦ ਔਰਤ ਨੇ ਆਪਰੇਟਰ ਨਾਲ ਬਹਿਸ ਕਰਨੀ ਸ਼ੁਰੂ ਕਰ ਦਿੱਤੀ। ਜਦੋਂ ਬੱਸ ਵਿੱਚ ਸਵਾਰ ਹੋਰ ਸਵਾਰੀਆਂ ਨੇ ਉਸ ਨੂੰ ਰੋਕਿਆ ਤਾਂ ਉਕਤ ਔਰਤ ਨੇ ਸਵਾਰੀਆਂ ਨਾਲ ਵੀ ਬਦਸਲੂਕੀ ਕਰਨੀ ਸ਼ੁਰੂ ਕਰ ਦਿੱਤੀ।
ਬੱਸ ਕੰਡਕਟਰ ਨੇ ਦੱਸਿਆ ਕਿ ਔਰਤ ਨੇ ਉਸ ਨੂੰ ਭਦੌੜ ਜਾ ਕੇ ਕੁੱਟਵਾਉਣ ਦੀ ਧਮਕੀ ਦਿੱਤੀ। ਇਸ ਤੋਂ ਬਾਅਦ ਡਰਾਈਵਰ ਨੇ ਸਵਾਰੀਆਂ ਨਾਲ ਭਰੀ ਬੱਸ ਨੂੰ ਥਾਣਾ ਭਦੌੜ ਦੇ ਸਾਹਮਣੇ ਖੜ੍ਹਾ ਕਰ ਦਿੱਤਾ ਅਤੇ ਪੁਲਿਸ ਤੋਂ ਔਰਤ ਖਿਲਾਫ ਕਾਰਵਾਈ ਦੀ ਮੰਗ ਕੀਤੀ। ਜਦੋਂ ਔਰਤ ਪੁਲਿਸ ਤੋਂ ਬਚਣ ਲਈ ਬੱਸ ਵਿੱਚੋਂ ਭੱਜਣ ਲੱਗੀ ਤਾਂ ਉਸ ਨੂੰ ਥਾਣੇ ਦੀਆਂ ਮਹਿਲਾ ਪੁਲਿਸ ਮੁਲਾਜ਼ਮਾਂ ਨੇ ਦਬੋਚ ਲਿਆ।
ਕੰਡਕਟਰ ਨੇ ਦੱਸਿਆ ਕਿ ਔਰਤ ਦੇ ਹੰਗਾਮੇ ਕਾਰਨ ਉਸ ਦੀ ਬੱਸ ਬਰਨਾਲਾ ਤੋਂ ਆਪਣਾ ਰੂਟ ਮਿਸ ਕਰ ਗਈ ਹੈ। ਇਸ ਕਾਰਨ ਉਸ ਦਾ ਕਰੀਬ ਪੰਜ ਹਜ਼ਾਰ ਰੁਪਏ ਦਾ ਨੁਕਸਾਨ ਹੋਇਆ ਹੈ, ਜਿਸ ਲਈ ਔਰਤ ਤੋਂ ਮੁਆਵਜ਼ਾ ਦੇਣ ਦੀ ਮੰਗ ਕੀਤੀ ਗਈ ਹੈ। ਥਾਣਾ ਭਦੌੜ ਦੇ ਪੁਲਿਸ ਅਧਿਕਾਰੀ ਅਮਰਜੀਤ ਸਿੰਘ ਨੇ ਦੱਸਿਆ ਕਿ ਮਹਿੰਦਰਪਾਲ ਕੌਰ ਨਾਂ ਦੀ ਔਰਤ ਨੇ ਟਿਕਟ ਦੇ ਨਾਂ ’ਤੇ ਪੀਆਰਟੀਸੀ ਬੱਸ ਵਿੱਚ ਹੰਗਾਮਾ ਕੀਤਾ। ਬੱਸ ਦੇ ਕੰਡਕਟਰ ਨੇ ਇਸ ਸਬੰਧੀ ਸ਼ਿਕਾਇਤ ਦਿੱਤੀ ਹੈ।
ਇਹ ਵੀ ਪੜ੍ਹੋ : ਪੰਜਾਬ ਦੀ ਇੱਕ ਹੋਰ ਵੱਡੀ ਪ੍ਰਾਪਤੀ, ਕੇਂਦਰ ਵੱਲੋਂ ਮਿਲੀ ‘ਹਰ ਘਰ ਜਲ ਸਰਟੀਫਿਕੇਟ’ ਦੀ ਮਾਨਤਾ
ਬਾਅਦ ‘ਚ ਔਰਤ ਨੇ ਡਰਾਈਵਰ ਅਤੇ ਕੰਡਕਟਰ ਤੋਂ ਮਾਫੀ ਮੰਗੀ। ਇਸ ਦੇ ਨਾਲ ਹੀ ਬਰਨਾਲਾ ਤੱਕ ਪੀ.ਆਰ.ਟੀ.ਸੀ ਬੱਸ ਦੇ ਹੋਏ ਨੁਕਸਾਨ ਲਈ ਤਿੰਨ ਹਜ਼ਾਰ ਰੁਪਏ ਵੀ ਦਿੱਤੇ ਗਏ। ਬੱਸ ਵਾਪਸ ਫਰੀਦਕੋਟ ਚਲੀ ਗਈ ਅਤੇ ਕੰਡਕਟਰ ਨੇ ਹਰਜਾਨਾ ਡਿਪੂ ਵਿਖੇ ਜਮ੍ਹਾ ਕਰਵਾ ਦਿੱਤਾ। ਦੱਸ ਦੇਈਏ ਕਿ ਭਗਤਾ ਭਾਈ ਤੋਂ ਭਦੋੜ ਤੱਕ ਦਾ ਕਿਰਾਇਆ 30 ਰੁਪਏ ਹੈ ਅਤੇ ਇਸ ਦੀ ਬਜਾਏ ਔਰਤ ਨੂੰ 3000 ਰੁਪਏ ਦੇਣੇ ਪਏ।
ਵੀਡੀਓ ਲਈ ਕਲਿੱਕ ਕਰੋ -:
“ਪੰਜਾਬ ਦੀ ਆਹ ਕੁੜੀ ਨੇ ਬੁਲਟ ‘ਤੇ ਘੁੰਮਿਆ ਸਾਰਾ ‘India’, ਹੁਣ ਬੁਲਟ ‘ਤੇ ਚੱਲੀ ਐ ਇੰਗਲੈਂਡ ! “
