Shopkeeper called out : ਪੁਲਿਸ ਵਾਲਿਆਂ ਦੇ ਨਿਤ ਨਵੇਂ ਕਾਰਨਾਮੇ ਸੁਣਨ ‘ਚ ਆ ਰਹੇ ਹਨ। ਅੱਜ ਅੰਮ੍ਰਿਤਸਰ ‘ਚ ਕੋਰੋਨਾ ਦੀ ਡਿਊਟੀ ਦੌਰਾਨ ਪੁਲਿਸ ਵਾਲੇ ਨੇ ਇੱਕ ਕੱਪੜਾ ਵਪਾਰੀ ਨਾਲ ਗਲਤ ਵਿਵਹਾਰ ਕੀਤਾ, ਉਸ ਨਾਲ ਮਾਰਕੁੱਟ ਕੀਤੀ, ਚਪੇੜਾਂ ਮਾਰੀਆਂ ਤੇ ਨਾਲ ਹੀ ਮਹਿਲਾ ਨਾਲ ਵੀ ਬਦਸਲੂਕੀ ਕੀਤੀ।
ਨਾਰਾਜ਼ ਕਾਰੋਬਾਰੀ ਵਰਗ ਮੁਤਾਬਕ ਦੁਕਾਨਦਾਰ ਦਾ ਕਸੂਰ ਸਿਰਫ ਇਹ ਸੀ ਕਿ ਉਹ ਜੀਐਸਟੀ ਦੀ ਫਾਈਲ ਦੇ ਕਾਗਜ਼ ਲੈਣ ਲਈ ਦੁਕਾਨ ‘ਤੇ ਆਇਆ ਸੀ ਅਤੇ ਇਸ ਸਮੇਂ ਦੌਰਾਨ ਪੁਲਿਸ ਇੱਥੇ ਆ ਗਈ। ਅੰਮ੍ਰਿਤਸਰ ਵਿਚ ਜ਼ਿਲ੍ਹਾ ਪ੍ਰਸ਼ਾਸਨ ਦੀ ਤਰਫੋਂ ਬਾਜ਼ਾਰਾਂ ਨੂੰ ਖੋਲ੍ਹਣ ਲਈ ਰੋਸਟਰ ਸਿਸਟਮ ਲਾਗੂ ਕੀਤਾ ਗਿਆ ਹੈ। ਇਸ ਦੇ ਤਹਿਤ ਅੱਜ ਗੁਰੂ ਬਾਜ਼ਾਰ ਵਿਚ ਖੱਬੇ ਪਾਸੇ ਦੀਆਂ ਦੁਕਾਨਾਂ ਖੁੱਲ੍ਹਣੀਆਂ ਸਨ। ਇਸ ਦੌਰਾਨ ਉਸ ਸਮੇਂ ਹੰਗਾਮਾ ਹੋ ਗਿਆ ਜਦੋਂ ਇਕ ਰਾਈਡ ਸਾਈਡ ਦੁਕਾਨ ਖੁੱਲੀ ਪਈ ਮਿਲੀ। ਮੌਕੇ ‘ਤੇ ਪਹੁੰਚੀ ਪੁਲਿਸ ਨੇ ਦੁਕਾਨਦਾਰ ਨੂੰ ਬਾਹਰ ਕੱਢਿਆ ਅਤੇ ਉਸ ਦੇ ਚਪੇੜਾਂ ਮਾਰੀਆਂ। ਇਹ ਘਟਨਾ ਸੀਸੀਟੀਵੀ ਕੈਮਰੇ ਵਿੱਚ ਕੈਦ ਹੋ ਗਈ।
ਸਮੁੱਚੀ ਮਾਰਕੀਟ ਐਸੋਸੀਏਸ਼ਨ ਨੇ ਇਸ ਮੁੱਦੇ ਨੂੰ ਲੈ ਕੇ ਵਿਰੋਧ ਜਤਾਇਆ ਹੈ। ਦੁਕਾਨ ਦੇ ਮਾਲਕ ਅਰੁਣ, ਸ਼ਿਵਮ ਅਤੇ ਹੋਰਾਂ ਨੇ ਦੱਸਿਆ ਕਿ ਅਰੁਣ ਦੀ ਦੁਕਾਨ ਸੱਜੇ ਪਾਸੇ ਪੈਂਦੀ ਹੈ। ਰੋਸਟਰ ਦੇ ਅਨੁਸਾਰ, ਇਹ ਦੁਕਾਨ ਨਹੀਂ ਖੋਲ੍ਹਣੀ ਸੀ, ਪਰ 10 ਤੱਕ ਜੀਐਸਟੀ ਦਰਜ ਨਾ ਕਰਨ ਕਾਰਨ ਜ਼ੁਰਮਾਨਾ ਲੱਗ ਜਾਣਾ ਸੀ, ਅਜਿਹੇ ਵਿੱਚ ਉਹ ਸਿਰਫ ਕਾਗਜ਼ਾਤ ਲੈਣ ਦੁਕਾਨ ’ਤੇ ਪਹੁੰਚ ਗਿਆ ਸੀ। ਜਿਵੇਂ ਹੀ ਉਸਨੇ ਦੁਕਾਨ ਖੁਲ੍ਹੀ, ਪੁਲਿਸ ਵੀ ਮੌਕੇ ਤੇ ਪਹੁੰਚ ਗਈ। ਪੁਲਿਸ ਵਾਲਿਆਂ ਨੇ ਬਿਨਾਂ ਕੁਝ ਪੁੱਛੇ ਦੁਕਾਨਦਾਰ ਨੂੰ ਥੱਪੜ ਮਾਰਨੇ ਸ਼ੁਰੂ ਕਰ ਦਿੱਤੇ।
ਦੁਖੀ ਦੁਕਾਨਦਾਰ ਅਨੁਸਾਰ ਪੁਲਿਸ ਨੂੰ ਚਲਾਨ ਕਰਨਾ ਚਾਹੀਦਾ ਸੀ, ਪਰ ਅਜਿਹਾ ਵਿਵਹਾਰ ਸਹੀ ਨਹੀਂ ਹੈ। ਪੁਲਿਸ ਮੁਲਾਜ਼ਮਾਂ ਨੇ ਨਾ ਸਿਰਫ ਉਸ ‘ਤੇ ਹਮਲਾ ਕੀਤਾ, ਬਲਕਿ ਉਥੇ ਕੰਮ ਕਰਨ ਵਾਲੀ ਲੜਕੀ ਨਾਲ ਵੀ ਬਦਸਲੂਕੀ ਕੀਤੇ। ਇਲਾਕੇ ਦੇ ਹੋਰ ਦੁਕਾਨਦਾਰ ਕਹਿੰਦੇ ਹਨ ਕਿ ਅਸੀਂ ਵਪਾਰੀ ਹਾਂ, ਚੋਰ ਨਹੀਂ। ਪੁਲਿਸ ਨੂੰ ਸਹੀ ਢੰਗ ਨਾਲ ਪੇਸ਼ ਆਉਣਾ ਚਾਹੀਦਾ ਹੈ। ਇਸ ਤਰਾਂ ਕੁੱਟਣ ਦਾ ਕੀ ਮਤਲਬ ਹੈ? ਇਸ ਘਟਨਾ ਲਈ ਜ਼ਿੰਮੇਵਾਰ ਪੁਲਿਸ ਮੁਲਾਜ਼ਮਾਂ ਖਿਲਾਫ ਸਖਤ ਕਾਰਵਾਈ ਕੀਤੀ ਜਾਣੀ ਚਾਹੀਦੀ ਹੈ। ਦੂਜੇ ਪਾਸੇ ਇਸ ਮਾਮਲੇ ਦੀ ਜਾਂਚ ਕਰ ਰਹੇ ਗੁਰਮੀਤ ਸਿੰਘ ਦਾ ਕਹਿਣਾ ਹੈ ਕਿ ਇਸ ਘਟਨਾ ਦੇ ਬਾਅਦ ਪੁਲਿਸ ਦੇ ਉੱਚ ਅਧਿਕਾਰੀਆਂ ਤੱਕ ਪਹੁੰਚਣ ਤੋਂ ਬਾਅਦ ਉਹ ਖੁਦ ਮੌਕੇ ‘ਤੇ ਪਹੁੰਚ ਗਏ ਅਤੇ ਜਾਂਚ ਸ਼ੁਰੂ ਕੀਤੀ। ਹਾਲਾਂਕਿ, ਉਨ੍ਹਾਂ ਨੇ ਕਿਹਾ ਕਿ ਅਜੇ ਤੱਕ ਸੀਸੀਟੀਵੀ ਫੁਟੇਜ ਨਹੀਂ ਵੇਖੀ। ਮਾਮਲੇ ਦੀ ਪੂਰੀ ਜਾਂਚ ਤੋਂ ਬਾਅਦ ਹੀ ਅਗਲੇਰੀ ਕਾਰਵਾਈ ਕੀਤੀ ਜਾਵੇਗੀ।
