covid-19 italian scientists claim their vaccine: ਇਟਲੀ ਦੇ ਵਿਗਿਆਨੀਆਂ ਦੇ ਇੱਕ ਸਮੂਹ ਨੇ ਦਾਅਵਾ ਕੀਤਾ ਹੈ ਕਿ ਉਨ੍ਹਾਂ ਨੇ ਕੋਰੋਨਾ ਵਾਇਰਸ ਦਾ ਇੱਕ ਟੀਕਾ ਤਿਆਰ ਕੀਤਾ ਹੈ, ਜੋ ਮਨੁੱਖੀ ਸਰੀਰ ਵਿੱਚ ਹੀ ਕੋਰੋਨਾ ਵਾਇਰਸ ਨੂੰ ਬੇਅਸਰ ਕਰ ਦੇਵੇਗਾ। ਮਿਲੀ ਜਾਣਕਾਰੀ ਦੇ ਅਨੁਸਾਰ, ਤਾਕੀਸ ਬਾਇਓਟੈਕ ਨਾਮ ਦੀ ਫਰਮ ਨੇ ਕੋਵਿਡ -19 ਦਾ ਦੁਨੀਆ ਦਾ ਪਹਿਲਾ ਟੀਕਾ ਬਣਾਉਣ ਦੀ ਗੱਲ ਕਹੀ ਹੈ। ਇਟਲੀ ਦੀ ਇੱਕ ਨਿਊਜ਼ ਏਜੰਸੀ ਨੇ ਲਿਖਿਆ ਹੈ ਕਿ ਤਾਕੀਸ ਕੰਪਨੀ ਦੇ ਵਿਗਿਆਨੀਆਂ ਦੀ ਇੱਕ ਟੀਮ ਚੂਹੇ ਤੋਂ ਐਂਟੀਬਾਡੀਜ਼ ਨੂੰ ਅਲੱਗ ਕਰਨ ਵਿੱਚ ਸਫਲ ਹੋਈ ਹੈ, ਜੋ ਮਨੁੱਖਾਂ ਨੂੰ ਵਾਇਰਸ ਤੋਂ ਸੰਕਰਮਿਤ ਹੋਣ ਤੋਂ ਰੋਕਦੀ ਹੈ।
ਇਸ ਦੇ ਲਈ, ਰੋਮ ਦੇ ਸਪਲਾਂਜਾਨੀ ਇੰਸਟੀਚਿਊਟ ਵਿੱਚ ਟੈਸਟਿੰਗ ਕੀਤੀ ਗਈ ਸੀ। ਚੂਹਿਆਂ ਵਿੱਚ ਐਂਟੀਬਾਡੀਜ਼ ਪਾਏ ਜਾਣ ਤੋਂ ਬਾਅਦ, ਇਹ ਵਿਸ਼ਵਾਸ ਕੀਤਾ ਜਾ ਰਿਹਾ ਹੈ ਕਿ ਇਹ ਮਨੁੱਖੀ ਸਰੀਰ ਉੱਤੇ ਵੀ ਕੰਮ ਕਰੇਗਾ। ਤਾਕੀਸ ਬਾਇਓਟੈਕ ਦੇ ਸੀਈਓ ਲੀਗੀ ਔਰਿਸਿੱਚਓ ਨੇ ਕਿਹਾ, “ਇਟਲੀ ਵਿੱਚ ਬਣੇ ਟੀਕੇ ਦੀ ਜਾਂਚ ਦਾ ਇਹ ਸਭ ਤੋਂ ਉੱਨਤ ਪੜਾਅ ਹੈ।ਇਸ ਗਰਮੀ ਦੇ ਬਾਅਦ ਮਨੁੱਖਾ ‘ਤੇ ਇਸ ਦਾ ਟੈਸਟ ਸ਼ੁਰੂ ਕੀਤਾ ਜਾ ਸਕਦਾ ਹੈ।” ਸੀਈਓ ਨੇ ਦੱਸਿਆ ਕਿ ਸਪਲਾਂਜਾਨੀ ਹਸਪਤਾਲ ਦੇ ਅਨੁਸਾਰ ਅਤੇ ਜਿੱਥੋਂ ਤੱਕ ਮੈਨੂੰ ਪਤਾ ਹੈ ਕਿ ਅਸੀਂ ਦੁਨੀਆ ਵਿੱਚ ਪਹਿਲੇ ਹਾਂ, ਜਿਨ੍ਹਾਂ ਨੇ ਕੋਰੋਨਾ ਵਾਇਰਸ ਨੂੰ ਟੀਕੇ ਦੁਆਰਾ ਖ਼ਤਮ ਕੀਤਾ ਹੈ। ਅਸੀਂ ਉਮੀਦ ਕਰਦੇ ਹਾਂ ਕਿ ਇਹ ਮਨੁੱਖਾਂ ‘ਤੇ ਵੀ ਇਸੇ ਤਰ੍ਹਾਂ ਅਸਰ ਕਰੇਗਾ। ”
ਤੁਹਾਨੂੰ ਦੱਸ ਦੇਈਏ ਕਿ ਕੋਰੋਨਾ ਵਾਇਰਸ ਮਹਾਂਮਾਰੀ ਨਾਲ ਜੂਝ ਰਹੀ ਦੁਨੀਆ ਇਸ ਸਮੇਂ ਬੇਸਬਰੀ ਨਾਲ ਇੱਕ ਟੀਕੇ ਦੀ ਉਡੀਕ ਕਰ ਰਹੀ ਹੈ। ਦੁਨੀਆ ਦੇ ਕਈ ਹਿੱਸਿਆਂ ਵਿੱਚ ਵਿਗਿਆਨੀ ਇਸ ਦਾ ਟੀਕਾ ਵਿਕਸਤ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ। ਜੇ ਇਹ ਰਿਪੋਰਟ ਸਹੀ ਹੈ, ਤਾਂ ਇਹ ਕੋਰੋਨਾ ਨਾਲ ਹੋ ਰਹੀ ਲੜਾਈ ‘ਤੇ ਇੱਕ ਵੱਡੀ ਜਿੱਤ ਮੰਨੀ ਜਾਏਗੀ। ਆਮ ਤੌਰ ‘ਤੇ, ਇੱਕ ਟੀਕਾ ਬਣਾਉਣ ਵਿੱਚ ਘੱਟੋ ਘੱਟ ਪੰਜ ਸਾਲ ਲੱਗਦੇ ਹਨ, ਹਾਲਾਂਕਿ ਮਾਹਿਰ ਮੰਨਦੇ ਹਨ ਕਿ ਇਸ ਵਾਰ ਥੋੜੇ ਸਮੇਂ ਵਿੱਚ ਹੋ ਸਕਦਾ ਹੈ।
