Overspeed Bolero overturns : ਪਟਿਆਲਾ :ਸਰਦਨ ਬਾਈਪਾਸ ਕੋਲ ਓਵਰਸਪੀਡ ਬੋਲੈਰੋ ਬੇਕਾਬੂ ਹੋ ਕੇ ਪਲਟ ਗਈ। ਪਿੰਡ ਸ਼ੇਰਮਾਜਰਾ ਕੋਲ ਗੱਡੀ ਪਲਟਦੇ ਹੋਏ 100 ਮੀਟਰ ਦੂਰ ਖੇਤ ‘ਚ ਜਾ ਪੁੱਜੀ। ਹਾਦਸੇ ‘ਚ ਇੱਕ 22 ਸਾਲਾ ਕੁੜੀ ਦੁਰਗਾ ਦੀ ਮੌਤ ਹੋ ਗਈ ਜਦੋਂ ਕਿ 5 ਹੋਰ ਜ਼ਖਮੀ ਹੋ ਗਏ। ਜਾਣਕਾਰੀ ਮੁਤਾਬਕ 3 ਨੌਜਵਾਨ ਤੇ 3 ਕੁੜੀਆਂ ਰਾਜਸਥਾਨ ਤੋਂ ਚੰਡੀਗੜ੍ਹ ਵੱਲ ਨੂੰ ਆ ਰਹੇ ਸਨ। ਚੌਕੀ ਡਕਾਲਾ ਪੁਲਿਸ ਨੇ ਕੁੜੀ ਦੀ ਲਾਸ਼ ਨੂੰ ਕਬਜ਼ੇ ‘ਚ ਲੈ ਲਿਆ ਹੈ। ਦੋਸ਼ੀ ਡਰਾਈਵਰ ਖਿਲਾਫ ਕੇਸ ਦਰਜ ਕਰ ਲਿਆ ਗਿਆ ਹੈ।
ਰਾਜਸਥਾਨ ਦੇ ਹਨੂੰਮਾਨਗੜ੍ਹ ਦੇ ਪਿੰਡ ਗਧੀ ਬੜੀ ਭਿਰਾਨੀ ਨਿਵਾਸੀ ਕੁੜੀ ਦੁਰਗਾ ਦੇ ਭਰਾ ਯੁਵਰਾਜ ਨੇ ਦੱਸਿਆ ਕਿ 11 ਨੂੰ ਉਸ ਦੀ ਭੈਣ ਆਪਣੀਆਂ ਦੋ ਸਹੇਲੀਆਂ ਅਤੇ 3 ਨੌਜਵਾਨਾਂ ਨਾਲ ਚੰਡੀਗੜ੍ਹ ਜਾ ਰਹੇ ਸਨ ਕਿ ਸ਼ਾਮ ਨੂੰ ਲਗਭਗ 4.00 ਵਜੇ ਪਿੰਡ ਸ਼ੇਰਮਾਜਰਾ ਕੋਲ ਇਹ ਹਾਦਸਾ ਹੋ ਗਿਆ। ਦੋਸ਼ੀ ਡਰਾਈਵਰ ਸੁਖਦਰਸ਼ਨ ਸਿੰਘ ਨਿਵਾਸੀ ਗਾਂਧੀ ਨਗਰ ਜੋ ਕਿ ਗੱਡੀ ਨੂੰ ਓਵਰਸਪੀਡ ‘ਚ ਚਲਾ ਰਿਹਾ ਸੀ, ਜਿਸ ਕਾਰਨ ਇਹ ਹਾਦਸਾ ਵਾਪਰਿਆ। ਗੱਡੀ ਬੇਕਾਬੂ ਹੋ ਕੇ ਸੜਕ ਤੋਂ ਖੇਤਾਂ ਵੱਲ ਉਤਰ ਕੇ ਪਲਟਦੀ ਹੋਈ 100 ਮੀਟਰ ਦੂਰੀ ‘ਤੇ ਜਾ ਡਿੱਗੀ। ਜਾਂਚ ਅਧਿਕਾਰੀ ਜਸਵੀਰ ਸਿੰਘ ਨੇ ਦੱਸਿਆ ਕਿ ਸਾਰੇ ਚੰਡੀਗੜ੍ਹ ਜਾ ਰਹੇ ਸਨ। ਆਸ-ਪਾਸ ਦੇ ਲੋਕਾਂ ਨੇ ਗੱਡੀ ਦੇ ਓਵਰਸਪੀਡ ਹੋਣ ਦੀ ਜਾਣਕਾਰੀ ਦਿੱਤੀ ਜਿਸ ਕਾਰਨ ਹਾਦਸਾ ਵਾਪਰਿਆ ਅਤੇ ਇਸ ਹਾਦਸੇ ‘ਚ ਇੱਕ ਦੀ ਮੌਤ ਹੋ ਗਈ ਜਦੋਂ ਕਿ 5 ਹੋਰਨਾਂ ਨੂੰ ਗੰਭੀਰ ਸੱਟਾਂ ਲੱਗੀਆਂ। ਪੁਲਿਸ ਵੀ ਮੌਕੇ ‘ਤੇ ਪੁੱਜੀ ਤੇ ਹਾਦਸੇ ਦੇ ਕਾਰਨਾਂ ਦਾ ਪਤਾ ਲਗਾਇਆ ਜਾ ਰਿਹਾ ਹੈ।
