ਹਿਮਾਚਲ ਦੀ ਕਬੱਡੀ ਸਟਾਰ ਰਿਤੂ ਨੇਗੀ ਨੂੰ ਮਿਲੇਗਾ ਅਰਜੁਨ ਪੁਰਸਕਾਰ, ਪਰਿਵਾਰ ‘ਚ ਖੁਸ਼ੀ ਦਾ ਮਾਹੌਲ

ਹਿਮਾਚਲ ਦੀ ਬੇਟੀ ਅਤੇ ਹਰਿਆਣਾ ਦੀ ਨੂੰਹ ਰਿਤੂ ਨੇਗੀ ਨੂੰ ਅਰਜੁਨ ਪੁਰਸਕਾਰ ਲਈ ਚੁਣਿਆ ਗਿਆ ਹੈ। ਰਿਤੂ ਦੀ ਚੋਣ ਕਾਰਨ ਦੋਵਾਂ ਰਾਜਾਂ ਵਿੱਚ ਖੁਸ਼ੀ ਦੀ ਲਹਿਰ ਹੈ। ਰਿਤੂ ਨੇਗੀ ਭਾਰਤੀ ਮਹਿਲਾ ਕਬੱਡੀ ਟੀਮ ਦੀ ਕਪਤਾਨ ਹੈ। ਉਨ੍ਹਾਂ ਦੀ ਅਗਵਾਈ ‘ਚ ਭਾਰਤੀ ਕਬੱਡੀ ਟੀਮ ਨੇ ਚੀਨ ‘ਚ ਖੇਡੀਆਂ ਗਈਆਂ ਏਸ਼ੀਆਈ ਖੇਡਾਂ ‘ਚ ਗੋਲਡ ਮੈਡਲ ਜਿੱਤਿਆ ਹੈ।

ਰਿਤੂ ਨੇਗੀ ਸਿਰਮੌਰ ਜ਼ਿਲ੍ਹੇ ਦੇ ਸ਼ਿਲਈ ਇਲਾਕੇ ਦੇ ਪਿੰਡ ਸ਼ਾਰੋਗ ਦੀ ਰਹਿਣ ਵਾਲੀ ਹੈ। ਉਨ੍ਹਾਂ ਦਾ ਵਿਆਹ ਹਰਿਆਣਾ ਦੇ ਪਾਣੀਪਤ ਵਿੱਚ ਹੋਇਆ। ਰਿਤੂ ਦਾ ਵਿਆਹ ਪਾਣੀਪਤ ਦੇ ਰਹਿਣ ਵਾਲੇ ਪ੍ਰੋ ਕਬੱਡੀ ਖਿਡਾਰੀ ਰੋਹਿਤ ਗੁਲੀਆ ਨਾਲ ਹੋਇਆ ਹੈ। ਰਿਤੂ ਨੇਗੀ ਡਿਫੈਂਡਰ ਵਜੋਂ ਖੇਡ ਰਹੀ ਹੈ। ਵਰਤਮਾਨ ਵਿੱਚ ਉਹ ਰੇਲਵੇ ਵਿੱਚ ਕੰਮ ਕਰ ਰਹੀ ਹੈ ਅਤੇ ਪਿਛਲੇ ਇੱਕ ਦਹਾਕੇ ਤੋਂ ਭਾਰਤੀ ਮਹਿਲਾ ਕਬੱਡੀ ਟੀਮ ਦਾ ਹਿੱਸਾ ਰਹੀ ਹੈ। ਭਾਰਤ ਲਈ ਗੋਲਡ ਮੈਡਲ ਜਿੱਤਣ ਤੋਂ ਬਾਅਦ ਰਿਤੂ ਨੇਗੀ ਦਾ ਦਿੱਲੀ ਤੋਂ ਲੈ ਕੇ ਹਰਿਆਣਾ ਅਤੇ ਹਿਮਾਚਲ ਵਿੱਚ ਨਿੱਘਾ ਸਵਾਗਤ ਕੀਤਾ ਗਿਆ। ਜਿੱਥੇ ਇਸ ਹੋਣਹਾਰ ਬੇਟੀ ਦਾ ਪਰਿਵਾਰ ਖੇਡ ਪੁਰਸਕਾਰ ਦੇ ਐਲਾਨ ਤੋਂ ਬਾਅਦ ਮਾਣ ਮਹਿਸੂਸ ਕਰ ਰਿਹਾ ਹੈ, ਉੱਥੇ ਹੀ ਰਿਤੂ ਨੇਗੀ ਨੂੰ ਵੀ ਸੋਸ਼ਲ ਮੀਡੀਆ ‘ਤੇ ਉਸ ਦੀ ਇਸ ਪ੍ਰਾਪਤੀ ‘ਤੇ ਵਧਾਈਆਂ ਦਿੱਤੀਆਂ ਜਾ ਰਹੀਆਂ ਹਨ।

ਇਸ ਤੋਂ ਪਹਿਲਾਂ ਰਿਤੂ ਨੇ 2011 ਵਿੱਚ ਜੂਨੀਅਰ ਮਹਿਲਾ ਏਸ਼ੀਆਈ ਖੇਡਾਂ ਵਿੱਚ ਬਤੌਰ ਕਪਤਾਨ ਭਾਰਤ ਲਈ ਗੋਲਡ ਮੈਡਲ ਜਿੱਤਿਆ ਸੀ। ਸਾਲ 2018 ਵਿੱਚ ਜਕਾਰਤਾ ਵਿੱਚ ਖੇਡੀਆਂ ਗਈਆਂ ਏਸ਼ਿਆਈ ਖੇਡਾਂ ਵਿੱਚ ਰੇਡਰ ਵਜੋਂ ਖੇਡਦਿਆਂ ਉਸ ਨੇ ਚਾਂਦੀ ਦਾ ਤਗ਼ਮਾ ਜਿੱਤਿਆ ਸੀ। ਉਹ 2019 ਵਿੱਚ ਨੇਪਾਲ ਵਿੱਚ ਖੇਡੀਆਂ ਗਈਆਂ ਏਸ਼ਿਆਈ ਖੇਡਾਂ ਵਿੱਚ ਗੋਲਡ ਮੈਡਲ ਜਿੱਤਣ ਵਾਲੀ ਟੀਮ ਵਿੱਚ ਪਲੇਇੰਗ-7 ਵਿੱਚ ਸੀ। ਰਿਤੂ ਨੇ ਬਿਲਾਸਪੁਰ ਦੇ ਇੱਕ ਹੋਸਟਲ ਤੋਂ ਕਬੱਡੀ ਦੀ ਸਿਖਲਾਈ ਲਈ। ਉਹ 2014 ਤੋਂ ਰਾਜ ਤੋਂ ਬਾਹਰ ਹੈ ਅਤੇ ਰੇਲਵੇ ਲਈ ਖੇਡ ਰਹੀ ਹੈ।