ਹਿਮਾਚਲ ਪ੍ਰਦੇਸ਼ ਦੇ ਮੰਡੀ ਜ਼ਿਲ੍ਹੇ ਦੇ ਚੌਕੀਦਾਰ ਦੇ ਪੁੱਤਰ ਨੇ ਭਾਰਤੀ ਫੌਜ ਵਿੱਚ ਲੈਫਟੀਨੈਂਟ ਬਣ ਕੇ ਪਿਓ ਦਾ ਮਾਣ ਵਧਾਇਆ ਹੈ। ਦਰਅਸਲ ਮੰਡੀ ਦੇ ਪਿੰਡ ਕੋਠੀ ਗਹਿਰੀ ਰਿਵਾਲਸਰ ਦੇ ਗਗਨੇਸ਼ ਕੁਮਾਰ ਨੇ ਇਹ ਉਪਲਬਧੀ ਹਾਸਲ ਕੀਤੀ ਹੈ। ਗਗਨੇਸ਼ ਦੇ ਪਿਤਾ ਬਲਦੇਵ ਸਿੰਘ ਹਿਮਾਚਲ ਪ੍ਰਦੇਸ਼ ਦੇ ਖੇਡ ਅਤੇ ਯੁਵਕ ਸੇਵਾਵਾਂ ਵਿਭਾਗ ਵਿੱਚ ਚੌਕੀਦਾਰ ਵਜੋਂ ਕੰਮ ਕਰਦੇ ਹਨ। ਗਗਨੇਸ਼ ਦੀ ਕਾਮਯਾਬੀ ਦੀ ਪੂਰੇ ਇਲਾਕੇ ਵਿੱਚ ਚਰਚਾ ਹੋ ਰਹੀ ਹੈ।
ਮੰਗਲਵਾਰ ਨੂੰ ਉੱਤਰ ਪ੍ਰਦੇਸ਼ ਦੀ ਰਾਜਧਾਨੀ ਲਖਨਊ ਵਿੱਚ ਆਰਮੀ ਮੈਡੀਕਲ ਕੋਰ ਟ੍ਰੇਨਿੰਗ ਸੈਂਟਰ ਵਿੱਚ ਹੋਈ ਪਾਸਿੰਗ ਆਊਟ ਪਰੇਡ ਵਿੱਚ ਗਗਨੇਸ਼ ਵੀ 47 ਸੈਨਿਕਾਂ ਵਿੱਚ ਸ਼ਾਮਲ ਸੀ। ਖੇਡ ਵਿਭਾਗ ਵਿੱਚ ਕੰਮ ਕਰਦੇ ਪਿਤਾ ਚੌਕੀਦਾਰ ਬਲਦੇਵ ਸਿੰਘ ਅਤੇ ਗ੍ਰਹਿਣੀ ਮਾਤਾ ਇੰਦਰਾ ਦੇਵੀ ਨੇ ਰਵਾਇਤ ਅਨੁਸਾਰ ਪੁੱਤਰ ਦੇ ਮੋਢੇ ’ਤੇ ਬੈਜ ਲਗਾ ਕੇ ਉਨ੍ਹਾਂ ਦਾ ਸਵਾਗਤ ਕੀਤਾ। ਗਗਨੇਸ਼ ਦੇ ਨਾਲ ਦੇਸ਼ ਭਰ ਦੇ 47 ਹੋਰ ਸੈਨਿਕ ਵੀ ਪਾਸ ਆਊਟ ਹੋਏ ਹਨ।
ਇਹ ਵੀ ਪੜ੍ਹੋ : ਫਾਜ਼ਿਲਕਾ ਪੁਲਿਸ ਨੇ ਫੜੇ 3 ਬਦਮਾਸ਼, 7 ਚੋਰੀ ਦੇ ਬਾਈਕ ਬਰਾਮਦ, ਕਾਫੀ ਸਮੇਂ ਤੋਂ ਫਰਾਰ ਸਨ ਮੁਲਜ਼ਮ
ਗਗਨੇਸ਼ ਦੇ ਪਿਤਾ ਬਲਦੇਵ ਸਿੰਘ ਨੇ ਦੱਸਿਆ ਕਿ ਇਹ ਸਮਾਗਮ ਲਖਨਊ ਸਥਿਤ ਆਰਮੀ ਮੈਡੀਕਲ ਕੋਰ ਦੇ ਸਿਖਲਾਈ ਕੇਂਦਰ ਵਿੱਚ ਕਰਵਾਇਆ ਗਿਆ ਸੀ। ਉਸ ਅਨੁਸਾਰ ਗਗਨੇਸ਼ ਪਹਿਲਾਂ ਹੀ ਫੌਜ ਵਿੱਚ ਕਲਰਕ ਵਜੋਂ ਕੰਮ ਕਰ ਰਿਹਾ ਸੀ ਅਤੇ ਇਸੇ ਦੌਰਾਨ ਉਸ ਨੂੰ ਫੌਜ ਵਿੱਚ ਕਮਿਸ਼ਨ ਮਿਲ ਗਿਆ ਸੀ। ਉਸਦਾ ਦੂਜਾ ਪੁੱਤਰ ਵੀ ਫੌਜ ਵਿੱਚ ਕਲਰਕ ਵਜੋਂ ਕੰਮ ਕਰ ਰਿਹਾ ਹੈ। ਗਗਨੇਸ਼ ਨੇ ਆਪਣੀ ਸਿੱਖਿਆ ਸਰਕਾਰੀ ਸੈਕੰਡਰੀ ਸਕੂਲ ਪੱਡਲ ਮੰਡੀ ਅਤੇ ਆਰੀਆ ਸਮਾਜ ਸਕੂਲ ਮੰਡੀ ਤੋਂ ਪ੍ਰਾਪਤ ਕੀਤੀ। ਫੌਜ ਵਿਚ ਭਰਤੀ ਹੋਣ ਤੋਂ ਪਹਿਲਾਂ ਗਗਨੇਸ਼ ਜ਼ਿਲ੍ਹਾ, ਰਾਜ ਅਤੇ ਰਾਸ਼ਟਰੀ ਪੱਧਰ ‘ਤੇ ਵਧੀਆ ਬੈਡਮਿੰਟਨ ਖਿਡਾਰੀ ਸੀ।
ਪਿਤਾ ਬਲਦੇਵ ਸਿੰਘ ਮੰਡੀ ਦੇ ਪੈਡਲ ਗਰਾਊਂਡ ਵਿੱਚ ਖੇਡ ਤੇ ਯੁਵਕ ਸੇਵਾਵਾਂ ਵਿਭਾਗ ਵਿੱਚ 28 ਸਾਲਾਂ ਤੋਂ ਦਿਹਾੜੀਦਾਰ ਮਜ਼ਦੂਰ ਵਜੋਂ ਕੰਮ ਕਰਦਾ ਸੀ, ਜਦੋਂ ਕਿ ਮਹਿਜ਼ ਤਿੰਨ ਸਾਲ ਪਹਿਲਾਂ ਹੀ ਵਿਭਾਗ ਨੇ ਉਸ ਨੂੰ ਰੈਗੂਲਰ ਕਰਕੇ ਚੌਕੀਦਾਰ ਬਣਾ ਦਿੱਤਾ ਸੀ। ਆਪਣੇ ਸੀਮਤ ਸਾਧਨਾਂ ਨਾਲ, ਉਸਨੇ ਆਪਣੇ ਦੋਵੇਂ ਬੱਚਿਆਂ ਨੂੰ ਫੌਜ ਵਿੱਚ ਭਰਤੀ ਕਰਵਾਉਣ ਅਤੇ ਇੱਕ ਪੁੱਤਰ ਨੂੰ ਲੈਫਟੀਨੈਂਟ ਬਣਾਉਣ ਲਈ ਦਿਨ ਰਾਤ ਮਿਹਨਤ ਕੀਤੀ। ਪੁੱਤਰ ਦੇ ਲੈਫਟੀਨੈਂਟ ਬਣਨ ‘ਤੇ ਹੁਣ ਪਿੰਡ ਕੋਠੀ ਗਹਿਰੀ ‘ਚ ਖੁਸ਼ੀ ਦਾ ਮਾਹੌਲ ਹੈ। ਗਗਨੇਸ਼ ਨੇ ਆਪਣੀ ਇਸ ਪ੍ਰਾਪਤੀ ਦਾ ਸਿਹਰਾ ਆਪਣੇ ਮਾਤਾ-ਪਿਤਾ ਅਤੇ ਅਧਿਆਪਕਾਂ ਨੂੰ ਦਿੱਤਾ।
ਵੀਡੀਓ ਲਈ ਕਲਿੱਕ ਕਰੋ : –
