ਏਅਰ ਇੰਡੀਆ ਦੇ ਸੀਈਓ ਕੈਂਪਬੈਲ ਵਿਲਸਨ ਦਾ ਅਹਿਮਦਾਬਾਦ ਵਿੱਚ ਹੋਏ ਜਹਾਜ਼ ਹਾਦਸੇ ਨੂੰ ਲੈ ਕੇ ਵੱਡਾ ਬਿਆਨ ਸਾਹਮਣੇ ਆਇਆ ਹੈ। ਉਨ੍ਹਾਂ ਕਿਹਾ ਕਿ ਜਹਾਜ਼ ਦਾ ਚੰਗੀ ਤਰ੍ਹਾਂ ਰੱਖ-ਰਖਾਅ ਕੀਤਾ ਗਿਆ ਸੀ, ਇਸ ਦੀ ਆਖਰੀ ਵੱਡੀ ਜਾਂਚ ਜੂਨ 2023 ਵਿੱਚ ਅਤੇ ਅਗਲੀ ਜਾਂਚ ਦਸੰਬਰ 2025 ਵਿੱਚ ਤਹਿ ਕੀਤੀ ਗਈ ਸੀ। ਇਸ ਦੇ ਸੱਜੇ ਇੰਜਣ ਦੀ ਮੁਰੰਮਤ ਮਾਰਚ 2025 ਵਿੱਚ ਕੀਤੀ ਗਈ ਸੀ ਅਤੇ ਖੱਬੇ ਇੰਜਣ ਦੀ ਜਾਂਚ ਅਪ੍ਰੈਲ 2025 ਵਿੱਚ ਕੀਤੀ ਗਈ ਸੀ।
ਜਹਾਜ਼ ਅਤੇ ਇੰਜਣ ਦੋਵਾਂ ਦੀ ਨਿਯਮਤ ਤੌਰ ‘ਤੇ ਨਿਗਰਾਨੀ ਕੀਤੀ ਗਈ ਸੀ, ਜਿਸ ਨਾਲ ਉਡਾਣ ਤੋਂ ਪਹਿਲਾਂ ਕੋਈ ਸਮੱਸਿਆ ਨਹੀਂ ਦਿਖਾਈ ਦਿੱਤੀ। ਅਸੀਂ ਪੂਰੇ ਹਵਾਬਾਜ਼ੀ ਉਦਯੋਗ ਦੇ ਨਾਲ ਅਧਿਕਾਰਤ ਜਾਂਚ ਰਿਪੋਰਟ ਦੀ ਉਡੀਕ ਕਰ ਰਹੇ ਹਾਂ। ‘
‘ਬੋਇੰਗ 787 ਜਹਾਜ਼ ਦੀ ਡੂੰਘਾਈ ਨਾਲ ਜਾਂਚ ਜਾਰੀ ਹੈ’
ਉਨ੍ਹਾਂ ਅੱਗੇ ਕਿਹਾ ਕਿ 14 ਜੂਨ ਨੂੰ ਡੀਜੀਸੀਏ ਤੋਂ ਨਿਰਦੇਸ਼ ਮਿਲਣ ਤੋਂ ਬਾਅਦ ਅਸੀਂ ਆਪਣੇ 33 ਬੋਇੰਗ 787 ਜਹਾਜ਼ਾਂ ਦੀ ਡੂੰਘਾਈ ਨਾਲ ਜਾਂਚ ਕਰ ਰਹੇ ਹਾਂ। ਹੁਣ ਤੱਕ, 26 ਜਹਾਜ਼ਾਂ ਦਾ ਨਿਰੀਖਣ ਪੂਰਾ ਹੋ ਗਿਆ ਹੈ ਅਤੇ ਉਨ੍ਹਾਂ ਨੂੰ ਸੇਵਾ ਲਈ ਮਨਜ਼ੂਰੀ ਦੇ ਦਿੱਤੀ ਗਈ ਹੈ। ਬਾਕੀ ਜਹਾਜ਼ ਇਸ ਸਮੇਂ ਰੱਖ-ਰਖਾਅ ਅਧੀਨ ਹਨ ਅਤੇ ਸੇਵਾ ਵਿੱਚ ਲਿਆਉਣ ਤੋਂ ਪਹਿਲਾਂ ਉਨ੍ਹਾਂ ਦੀ ਵੀ ਜਾਂਚ ਕੀਤੀ ਜਾਵੇਗੀ। ਉਨ੍ਹਾਂ ਇਹ ਵੀ ਕਿਹਾ ਕਿ ਸਮੀਖਿਆ ਤੋਂ ਬਾਅਦ, ਡੀਜੀਸੀਏ ਨੇ ਪੁਸ਼ਟੀ ਕੀਤੀ ਹੈ ਕਿ ਸਾਡਾ ਬੋਇੰਗ 787 ਫਲੀਟ ਅਤੇ ਰੱਖ-ਰਖਾਅ ਪ੍ਰਕਿਰਿਆਵਾਂ ਪੂਰੀ ਤਰ੍ਹਾਂ ਸੁਰੱਖਿਆ ਮਾਪਦੰਡਾਂ ਨੂੰ ਪੂਰਾ ਕਰਦੀਆਂ ਹਨ।
ਬਲੈਕ ਬਾਕਸ – ਜਾਂਚ ਦਾ ਅਗਲਾ ਪੜਾਅ ਸ਼ੁਰੂ
ਦੱਸ ਦੇਈਏ ਕਿ ਜਹਾਜ਼ ਦਾ ਬਲੈਕ ਬਾਕਸ (DFDR ਅਤੇ CVR) ਦੋ ਹਿੱਸਿਆਂ ਵਿੱਚ ਬਰਾਮਦ ਕੀਤਾ ਗਿਆ ਸੀ। ਇਸ ਦਾ ਪਹਿਲਾ ਸੈੱਟ 13 ਜੂਨ ਨੂੰ ਮਿਲਿਆ ਸੀ। ਜਦੋਂਕਿ ਦੂਜਾ ਸੈੱਟ 16 ਜੂਨ ਨੂੰ ਬਰਾਮਦ ਕੀਤਾ ਗਿਆ ਸੀ। ਇਹ ਜਹਾਜ਼ ਮਾਡਲ ਦੋ ਬਲੈਕ ਬਾਕਸ ਸੈੱਟਾਂ ਨਾਲ ਲੈਸ ਹੈ, ਜਿਸ ਤੋਂ ਹੋਰ ਜਾਣਕਾਰੀ ਪ੍ਰਾਪਤ ਹੋਣ ਦੀ ਉਮੀਦ ਹੈ।
ਇਹ ਵੀ ਪੜ੍ਹੋ : Air India ਵੱਲੋਂ ਅੰਮ੍ਰਿਤਸਰ-ਯੂਰਪ ਦੀਆਂ ਉਡਾਣਾਂ ‘ਚ ਕਟੌਤੀ, 2 ਮਹੀਨਿਆਂ ਲਈ ਬਦਲਿਆ ਸ਼ੈਡਿਊਲ
ਬਲੈਕ ਬਾਕਸ ਨੂੰ ਕਿੱਥੋਂ ਡੀਕੋਡ ਕੀਤਾ ਜਾਵੇਗਾ? AAIB ਫੈਸਲਾ ਕਰੇਗਾ
ਕੁਝ ਮੀਡੀਆ ਰਿਪੋਰਟਾਂ ਵਿੱਚ ਕਿਹਾ ਗਿਆ ਹੈ ਕਿ ਬਲੈਕ ਬਾਕਸ ਵਿਦੇਸ਼ ਭੇਜਿਆ ਜਾ ਰਿਹਾ ਹੈ। ਸ਼ਹਿਰੀ ਹਵਾਬਾਜ਼ੀ ਮੰਤਰਾਲੇ ਨੇ ਇਸ ਬਾਰੇ ਸਪੱਸ਼ਟੀਕਰਨ ਦਿੱਤਾ ਹੈ। ਮੰਤਰਾਲੇ ਦੇ ਮੁਤਾਬਕ AAIB ਫੈਸਲਾ ਕਰੇਗਾ ਕਿ ਬਲੈਕ ਬਾਕਸ ਨੂੰ ਭਾਰਤ ਵਿੱਚ ਡੀਕੋਡ ਕੀਤਾ ਜਾਵੇਗਾ ਜਾਂ ਵਿਦੇਸ਼ ਵਿੱਚ। ਇਹ ਫੈਸਲਾ ਤਕਨਾਲੋਜੀ, ਸੁਰੱਖਿਆ ਅਤੇ ਗੁਪਤਤਾ ਨਾਲ ਸਬੰਧਤ ਸਾਰੇ ਪਹਿਲੂਆਂ ਦੀ ਜਾਂਚ ਕਰਨ ਤੋਂ ਬਾਅਦ ਲਿਆ ਜਾਵੇਗਾ। ਮੰਤਰਾਲੇ ਨੇ ਸਾਰੇ ਲੋਕਾਂ ਅਤੇ ਮੀਡੀਆ ਨੂੰ ਅਪੀਲ ਕੀਤੀ ਹੈ ਕਿ ਉਹ ਬਿਨਾਂ ਪੁਸ਼ਟੀ ਕੀਤੇ ਅਫਵਾਹਾਂ ਨਾ ਫੈਲਾਉਣ, ਅਤੇ ਜਾਂਚ ਨੂੰ ਗੰਭੀਰਤਾ ਨਾਲ ਪੂਰਾ ਕਰਨ।
ਅਹਿਮਦਾਬਾਦ ਜਹਾਜ਼ ਹਾਦਸੇ ਦੀ ਜਾਂਚ AAIB ਦੀ ਇੱਕ ਬਹੁ-ਅਨੁਸ਼ਾਸਨੀ ਟੀਮ ਵੱਲੋਂ ਕੀਤੀ ਜਾ ਰਹੀ ਹੈ, ਜੋ 12 ਜੂਨ ਤੋਂ ਸਰਗਰਮ ਹੈ। ਅਮਰੀਕੀ NTSB ਅਤੇ ਜਹਾਜ਼ ਨਿਰਮਾਣ ਕੰਪਨੀ (OEM) ਟੀਮ ਵੀ ICAO ਨਿਯਮਾਂ ਦੇ ਤਹਿਤ ਜਾਂਚ ਵਿੱਚ ਸਹਾਇਤਾ ਕਰ ਰਹੀ ਹੈ। ਸਥਾਨਕ ਪ੍ਰਸ਼ਾਸਨ ਅਤੇ ਏਜੰਸੀਆਂ ਵੀ ਇਸ ਵਿੱਚ ਪੂਰਾ ਸਹਿਯੋਗ ਦੇ ਰਹੀਆਂ ਹਨ।
ਵੀਡੀਓ ਲਈ ਕਲਿੱਕ ਕਰੋ -:
