ਬੈਂਗਲੁਰੂ ਦੇ ਕੇਂਪੇਗੌੜਾ ਅੰਤਰਰਾਸ਼ਟਰੀ ਹਵਾਈ ਅੱਡੇ ‘ਤੇ ਕਸਟਮ ਅਧਿਕਾਰੀ ਉਦੋਂ ਹੈਰਾਨ ਰਹਿ ਗਏ ਜਦੋਂ ਉਨ੍ਹਾਂ ਨੂੰ ਇਕ ਬੈਗ ਵਿਚ 72 ਸੱਪ ਅਤੇ 6 ਮਰੇ ਹੋਏ ਕੈਪੂਚਿਨ ਬਾਂਦਰ ਮਿਲੇ। ਅਧਿਕਾਰਤ ਬਿਆਨ ‘ਚ ਕਿਹਾ ਗਿਆ ਹੈ ਕਿ ਕਸਟਮ ਅਧਿਕਾਰੀਆਂ ਨੇ ਬੈਂਕਾਕ ਜਾਣ ਵਾਲੀ ਫਲਾਈਟ ‘ਚ ਆਏ ਸਾਮਾਨ ‘ਚ ਇਕ ਬੈਗ ਦੇ ਅੰਦਰੋਂ ਇਹ ਬਰਾਮਦਗੀ ਕੀਤੀ।
ਅਧਿਕਾਰੀਆਂ ਨੇ ਇਸ ਸਬੰਧੀ ਜੰਗਲੀ ਜੀਵ ਤਸਕਰੀ ਤਹਿਤ ਕੇਸ ਦਰਜ ਕਰ ਲਿਆ ਹੈ। ਬੈਂਗਲੁਰੂ ਕਸਟਮ ਵਿਭਾਗ ਵੱਲੋਂ ਜਾਰੀ ਬਿਆਨ ਅਨੁਸਾਰ ਬੁੱਧਵਾਰ ਰਾਤ 10.30 ਵਜੇ ਬੈਂਕਾਕ ਤੋਂ ਉਡਾਣ ਨੰਬਰ ਐਫਡੀ 137 ਏਅਰ ਏਸ਼ੀਆ ਦੇ ਸਮਾਨ ਵਿੱਚ 78 ਜਾਨਵਰ ਮਿਲੇ ਹਨ। ਇਨ੍ਹਾਂ ਵਿੱਚ 55 ਬਾਲ ਅਜਗਰ (ਵੱਖ-ਵੱਖ ਰੰਗਾਂ ਦੇ) ਅਤੇ 17 ਕਿੰਗ ਕੋਬਰਾ ਸ਼ਾਮਲ ਸਨ। ਉਹ ਜੀਵਿਤ ਅਤੇ ਸਰਗਰਮ ਸਨ।
ਕਸਟਮ ਵਿਭਾਗ ਵੱਲੋਂ ਜਾਰੀ ਬਿਆਨ ਵਿੱਚ ਕਿਹਾ ਗਿਆ ਹੈ ਕਿ 6 ਮਰੇ ਹੋਏ ਕੈਪੁਚਿਨ ਬਾਂਦਰ ਵੀ ਬਰਾਮਦ ਕੀਤੇ ਗਏ ਹਨ। ਇਸ ਵਿੱਚ ਅੱਗੇ ਕਿਹਾ ਗਿਆ ਹੈ ਕਿ ਇਹ ਸਾਰੇ (78) ਜੰਗਲੀ ਜੀਵ ਸੁਰੱਖਿਆ ਐਕਟ, 1972 ਦੇ ਤਹਿਤ ਅਨੁਸੂਚਿਤ ਜਾਨਵਰ ਹਨ। ਇਸ ਦੇ ਨਾਲ ਉਹ CITES ਦੇ ਅਧੀਨ ਵੀ ਸੂਚੀਬੱਧ ਹਨ।
ਬਿਆਨ ਵਿੱਚ ਕਿਹਾ ਗਿਆ ਹੈ, “ਜਾਨਵਰਾਂ ਨੂੰ ਕਸਟਮ ਐਕਟ, 1962 ਦੀ ਧਾਰਾ 110 ਦੇ ਤਹਿਤ ਜ਼ਬਤ ਕੀਤਾ ਗਿਆ ਹੈ। ਜਿਉਂਦੇ ਜਾਨਵਰਾਂ ਨੂੰ ਉਨ੍ਹਾਂ ਦੇ ਮੂਲ ਦੇਸ਼ ਵਿੱਚ ਵਾਪਸ ਭੇਜਿਆ ਗਿਆ ਹੈ ਅਤੇ ਮਰੇ ਹੋਏ ਜਾਨਵਰਾਂ ਨੂੰ ਸੈਨੇਟਰੀ ਉਪਾਵਾਂ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਨਿਪਟਾਇਆ ਗਿਆ ਹੈ। ਇਸ ਮਾਮਲੇ ਸਬੰਧੀ ਅਗਲੇਰੀ ਜਾਂਚ ਕੀਤੀ ਜਾ ਰਹੀ ਹੈ। ਹਾਲਾਂਕਿ ਅਜੇ ਤੱਕ ਕਿਸੇ ਦੀ ਗ੍ਰਿਫਤਾਰੀ ਨਹੀਂ ਹੋਈ ਹੈ।
ਕੁਝ ਦਿਨ ਪਹਿਲਾਂ, ਚੇਨਈ, ਤਾਮਿਲਨਾਡੂ ਵਿੱਚ ਕਸਟਮ ਏਅਰ ਇੰਟੈਲੀਜੈਂਸ ਯੂਨਿਟ (AIU) ਦੇ ਅਧਿਕਾਰੀਆਂ ਨੇ ਇੱਕ ਯਾਤਰੀ ਦੇ ਬੈਗ ਵਿੱਚੋਂ 12 ਅਜਗਰ ਜ਼ਬਤ ਕੀਤੇ ਸਨ। ਇਹ ਜ਼ਬਤੀ ਬੈਂਕਾਕ ਤੋਂ ਆ ਰਹੇ ਇੱਕ ਯਾਤਰੀ ਤੋਂ ਅੰਨਾ ਅੰਤਰਰਾਸ਼ਟਰੀ ਹਵਾਈ ਅੱਡੇ ‘ਤੇ ਕੀਤੀ ਗਈ। ਹਵਾਈ ਅੱਡੇ ਦੇ ਸੂਤਰਾਂ ਨੇ ਦੱਸਿਆ ਕਿ ਖੁਫੀਆ ਜਾਣਕਾਰੀ ਦੇ ਆਧਾਰ ‘ਤੇ ਬੈਂਕਾਕ ਤੋਂ ਆ ਰਹੇ ਇੱਕ ਪੁਰਸ਼ ਯਾਤਰੀ ਨੂੰ ਏਅਰ ਕਸਟਮ ਅਧਿਕਾਰੀਆਂ ਨੇ ਰੋਕਿਆ।
ਇਹ ਵੀ ਪੜ੍ਹੋ : G20 ‘ਚ PM ਮੋਦੀ ਅੱਗੇ ਰੱਖੀ ਨੇਮ ਪਲੇਟ ‘ਤੇ ਪਹਿਲੀ ਵਾਰ INDIA ਦੀ ਥਾਂ ਲਿਖਿਆ ਗਿਆ BHARAT!
ਯਾਤਰੀ ਦੇ ਸਾਮਾਨ ਦੀ ਜਾਂਚ ਕਰਨ ‘ਤੇ ਉਸ ਦੇ ਬੈਗ ‘ਚੋਂ 11 ਬਾਲ ਅਜਗਰ ਅਤੇ ਇਕ ਚਿੱਟੇ ਬੁੱਲ੍ਹਾਂ ਵਾਲਾ ਅਜਗਰ ਮਿਲਿਆ। ਇਸ ਤਰ੍ਹਾਂ ਉਸ ਕੋਲੋਂ ਕੁੱਲ 12 ਅਜਗਰ ਬਰਾਮਦ ਹੋਏ, ਜਿਨ੍ਹਾਂ ਨੂੰ ਕਸਟਮ ਐਕਟ 1962 ਤਹਿਤ ਜ਼ਬਤ ਕਰ ਲਿਆ ਗਿਆ। ਅਗਲੇਰੀ ਜਾਂਚ ਕੀਤੀ ਜਾ ਰਹੀ ਹੈ।
ਵੀਡੀਓ ਲਈ ਕਲਿੱਕ ਕਰੋ -:
ਜਗਰਾਤੇ ਵਾਲੀ ਵੀਡੀਓ ਦੇ ਵਿਵਾਦ ਤੋਂ ਬਾਅਦ ਮਾਸਟਰ ਸਲੀਮ ਦਾ ਪਹਿਲਾ Interview, ਘੱਨਈਆ ਮਿੱਤਲ ਦੇ ਕੱਲੇ-ਕੱਲੇ ਸਵਾਲਾਂ ਦੇ ਦਿੱਤੇ ਠੋਕਵੇਂ ਜਵਾਬ…
