ਅੱਜ ਦੇ ਸਮੇਂ ਵਿੱਚ ਜਿੱਥੇ ਬੱਚਿਆਂ ਅਤੇ ਨੌਜਵਾਨਾਂ ਦੀਆਂ ਅੱਖਾਂ ਦੀ ਰੋਸ਼ਨੀ ਘੱਟ ਰਹੀ ਹੈ, ਉੱਥੇ ਇੱਕ ਅਜਿਹਾ ਬਜ਼ੁਰਗ ਵੀ ਸੀ, ਜੋ 110 ਸਾਲ ਦੀ ਉਮਰ ਵਿੱਚ ਵੀ ਬਿਨਾਂ ਐਨਕਾਂ ਦੇ ਸੂਈ ‘ਚ ਧਾਗਾ ਪਾ ਲੈਂਦਾ ਸੀ। ਬਜ਼ੁਰਗ ਉਜਾਗਰ ਰਾਮ ਚੈਂਬਰ ਦੀ ਵੇਖਣ, ਸੁਣਨ ਅਤੇ ਸਮਝਣ ਦੀ ਸ਼ਕਤੀ ਨੌਜਵਾਨਾਂ ਨਾਲੋਂ ਵੱਧ ਸੀ। ਉਨ੍ਹਾਂ ਨੇ ਸੋਮਵਾਰ ਸਵੇਰੇ ਚਾਰ ਵਜੇ ਘਰ ‘ਚ ਆਖਰੀ ਸਾਹ ਲਿਆ।
ਅਜਿਹਾ ਤੰਦਰੁਸਤ ਜੀਵਨ ਬਤੀਤ ਕਰਨ ਵਾਲੇ ਬਾਬਾ ਬੋਹੜ ਉਜਾਗਰ ਰਾਮ ਚੈਂਬਰ ਦੀਆਂ ਅੱਖਾਂ ਦਾਨ ਕੀਤੀਆਂ ਗਈਆਂ ਹਨ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਉਨ੍ਹਾਂ ਨੇ ਲੰਬੇ ਸਮੇਂ ਤੋਂ ਇਨ੍ਹਾਂ ਅੱਖਾਂ ਰਾਹੀਂ ਦੁਨੀਆ ਨੂੰ ਦੇਖਿਆ ਹੈ। ਉਹ ਚਾਹੁੰਦੇ ਸਨ ਕਿ ਉਹ ਵਿਅਕਤੀ, ਜਿਸ ਦੀ ਜ਼ਿੰਦਗੀ ਵਿੱਚ ਹਨੇਰਾ ਭਰਿਆ ਹੋਇਆ ਹੈ, ਸੰਸਾਰ ਨੂੰ ਉਨ੍ਹਾਂ ਦੀਆਂ ਅੱਖਾਂ ਰਾਹੀਂ ਵੇਖੇ। ਐਸ.ਪੀ.ਸਿੰਘ, ਕਰਮ ਚੰਦ ਸੇਂਖੋ ਦੀ ਅਗਵਾਈ ਹੇਠ ਅੱਖਾਂ ਦਾਨ ਕੀਤੀਆਂ। ਉਨ੍ਹਾਂ ਦੇ ਦਿਹਾਂਤ ਤੋਂ ਬਾਅਦ ਅੱਖਾਂ ਦਾਨ ਕਰਨ ਦੀ ਰਸਮ ਉਨ੍ਹਾਂ ਦੇ ਪੁੱਤਰਾਂ ਗੁਰਚਰਨ ਚੁੰਬਰ, ਨੀਲਮ, ਡਾ. ਰਾਜੀਵ ਚੁੰਬਰ ਅਤੇ ਡਾ. ਗੁਲਤਾਜ ਨੇ ਨਿਭਾਈ। ਐਸਪੀ ਸਿੰਘ ਨੇ ਕਿਹਾ ਕਿ ਉਜਾਗਰ ਰਾਮ ਚੈਂਬਰ ਵੱਲੋਂ ਅੱਖਾਂ ਦਾਨ ਕਰਨਾ ਹੋਰਨਾਂ ਲਈ ਵੀ ਪ੍ਰੇਰਨਾ ਸਰੋਤ ਹੈ।
ਇਹ ਵੀ ਪੜ੍ਹੋ : ਚੰਡੀਗੜ੍ਹ : ਕੌਫੀ ਲਈ ਪੇਪਰ ਕੱਪ ਦੇ 5 ਰੁਪਏ ਵਸੂਲਣਾ ਪਿਆ ਮਹਿੰਗਾ, ਕੈਫੇ ਨੂੰ ਠੋਕਿਆ ਗਿਆ 11,000 ਰੁ. ਜੁਰਮਾਨਾ
ਉਜਾਗਰ ਰਾਮ ਚੈਂਬਰ ਦਾ ਜਨਮ 03 ਜਨਵਰੀ 1914 ਨੂੰ ਪਿੰਡ ਉੜਾਪੜ, ਜ਼ਿਲ੍ਹਾ ਨਵਾਂਸ਼ਹਿਰ ਵਿਖੇ ਹੋਇਆ। ਉਨ੍ਹਾਂ ਦਾ ਵਿਆਹ 1937 ਵਿੱਚ ਕਰਤਾਰੀ ਦੇਵੀ ਨਾਲ ਹੋਇਆ ਸੀ। ਉਹ ਹਰ ਰੋਜ਼ ਸਵੇਰੇ ਜਲਦੀ ਉੱਠ ਕੇ ਸੈਰ ਕਰਨ ਜਾਂਦੇ ਸਨ। ਉਜਾਗਰ ਰਾਮ ਚੈਂਬਰ, ਜਿਨ੍ਹਾਂ ਨੇ ਆਪਣੀ ਜ਼ਿੰਦਗੀ ਵਿਚ ਕਦੇ ਕੋਈ ਗੋਲੀ ਜਾਂ ਕੈਪਸੂਲ ਨਹੀਂ ਲਈ ਸੀ, ਕਦੇ ਹਸਪਤਾਲ ਵੀ ਨਹੀਂ ਗਏ ਸਨ। ਉਹ ਆਪਣੇ ਛੋਟੇ ਪੁੱਤਰ ਗੁਰਚਰਨ ਦਾਸ ਨਾਲ ਰਹਿ ਰਹੇ ਸਨ, ਜੋ ਉਪ ਆਬਕਾਰੀ ਕਰ ਕਮਿਸ਼ਨਰ ਵਜੋਂ ਸੇਵਾਮੁਕਤ ਹੋਇਆ ਸੀ।
ਉਨ੍ਹਾਂ ਦਾ ਛੋਟਾ ਬੇਟਾ ਇਸ ਸਮੇਂ 75 ਸਾਲ ਦਾ ਹੈ ਅਤੇ ਵੱਡਾ ਬੇਟਾ 86 ਸਾਲ ਦਾ ਹੈ। ਉਨ੍ਹਾਂ ਦੇ ਪੁੱਤਰਾਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੇ ਪਿਤਾ ਨੇ ਇਸ ਉਮਰ ਵਿੱਚ ਅੱਖਾਂ ਦਾਨ ਕਰਨਾ ਲੋਕਾਂ ਨੂੰ ਸੇਧ ਦੇਣ ਵਾਲਾ ਕੰਮ ਹੈ। ਭਾਵੇਂ ਉਹ ਇਸ ਦੁਨੀਆ ਵਿੱਚ ਨਹੀਂ ਰਹੇ, ਫਿਰ ਵੀ ਉਹ ਕਿਸੇ ਨੂੰ ਅੱਖਾਂ ਦਾਨ ਕਰਕੇ ਇਸ ਦੁਨੀਆ ਵਿੱਚ ਜਿਉਂਦੇ ਰਹਿਣਗੇ।
ਵੀਡੀਓ ਲਈ ਕਲਿੱਕ ਕਰੋ : –
