Mukesh Ambani become world 5th richest man: ਰਿਲਾਇੰਸ ਇੰਡਸਟਰੀਜ਼ ਦੇ ਚੇਅਰਮੈਨ ਮੁਕੇਸ਼ ਅੰਬਾਨੀ ਦੀ ਦੌਲਤ ਵਿੱਚ ਇੱਕ ਵਾਰ ਫਿਰ ਵਾਧਾ ਹੋਇਆ ਹੈ ਅਤੇ ਉਹ ਦੁਨੀਆ ਦੇ 5ਵੇਂ ਸਭ ਤੋਂ ਅਮੀਰ ਕਾਰੋਬਾਰੀ ਬਣ ਗਏ ਹਨ । ਫੋਰਬਸ ਦੀ ਅਸਲ ਵਕਤ ਦੀ ਕੁੱਲ ਕੀਮਤ ਦੇ ਅਨੁਸਾਰ ਮੁਕੇਸ਼ ਅੰਬਾਨੀ 75 ਅਰਬ ਡਾਲਰ (ਲਗਭਗ 5.57 ਲੱਖ ਕਰੋੜ ਰੁਪਏ) ਦੀ ਜਾਇਦਾਦ ਦੇ ਨਾਲ ਪੰਜਵੇਂ ਸਥਾਨ ‘ਤੇ ਹਨ। ਜਾਇਦਾਦ ਦੇ ਮਾਮਲੇ ਵਿੱਚ ਮੁਕੇਸ਼ ਅੰਬਾਨੀ ਹੁਣ ਫੇਸਬੁੱਕ ਦੇ ਸੰਸਥਾਪਕ ਮਾਰਕ ਜ਼ੁਕਰਬਰਗ (89 ਅਰਬ ਡਾਲਰ) ਦੇ ਨੇੜੇ ਆ ਗਏ ਹਨ। ਹਾਲਾਂਕਿ, ਅਜੇ ਵੀ ਦੋਵਾਂ ਦੀ ਜਾਇਦਾਦ ਵਿੱਚ ਕਾਫ਼ੀ ਅੰਤਰ ਹੈ। ਦੱਸ ਦੇਈਏ ਕਿ ਫੋਰਬਸ ਅਰਬਪਤੀਆਂ ਦੀ ਦੌਲਤ ਦਾ ਮੁਲਾਂਕਣ ਕਰਦੀ ਹੈ। ਫੋਰਬਸ ਦਾ ਡਾਟਾ ਵਿਸ਼ਵ ਭਰ ਵਿੱਚ ਸਟਾਕ ਮਾਰਕੀਟ ਦੇ ਉਤਰਾਅ-ਚੜ੍ਹਾਅ ਕਾਰਨ ਬਦਲਦਾ ਰਹਿੰਦਾ ਹੈ।
ਫਿਲਹਾਲ ਫੋਰਬਸ ਦੀ ਸੂਚੀ ਵਿੱਚ ਪਹਿਲੇ ਸਥਾਨ ‘ਤੇ 185.8 ਅਰਬ ਡਾਲਰ ਦੇ ਨਾਲ ਐਮਾਜ਼ਾਨ ਦੇ ਜੈੱਫ ਬੇਜੋਸ ਹਨ। ਉੱਥੇ ਹੀ ਬਿਲ ਗੇਟਸ (113.1 ਅਰਬ ਡਾਲਰ), ਐਲਵੀਐਮਐਚ ਦੇ ਬਰਨਾਰਡ ਆਰਨੋਲਡ ਐਂਡ ਫੈਮਿਲੀ (112 ਅਰਬ ਡਾਲਰ), ਫੇਸਬੁੱਕ ਦੇ ਮਾਰਕ ਜੁਕਰਬਰਗ (89 ਅਰਬ ਡਾਲਰ) ਦੇ ਨਾਲ ਕ੍ਰਮਵਾਰ ਦੂਜੇ, ਤੀਜੇ ਅਤੇ ਚੌਥੇ ਸਥਾਨ ‘ਤੇ ਹਨ। ਇਸ ਦੇ ਨਾਲ ਹੀ ਮੁਕੇਸ਼ ਅੰਬਾਨੀ 5ਵੇਂ ਅਤੇ ਬਰਕਸ਼ਾਇਰ ਹੈਥਵੇ ਦੇ ਵਾਰਨ ਬਫੇ 72.7 ਬਿਲੀਅਨ ਦੀ ਦੌਲਤ ਨਾਲ ਛੇਵੇਂ ਸਥਾਨ ‘ਤੇ ਹਨ ।
ਦੱਸ ਦੇਈਏ ਕਿ ਬੀਤੇ ਦਿਨ ਯਾਨੀ ਕਿ ਬੁੱਧਵਾਰ ਰਿਲਾਇੰਸ ਇੰਡਸਟਰੀਜ਼ ਦੀ ਸਟਾਕ ਕੀਮਤ 2000 ਰੁਪਏ ਦੇ ਪੱਧਰ ਨੂੰ ਪਾਰ ਕਰ ਗਈ। ਕਾਰੋਬਾਰ ਦੇ ਅੰਤ ਵਿਚ ਰਿਲਾਇੰਸ ਦੇ ਸ਼ੇਅਰ ਦੀ ਕੀਮਤ 2004 ਰੁਪਏ ਸੀ। ਇਸ ਦੇ ਨਾਲ ਹੀ ਮਾਰਕੀਟ ਕੈਪ ‘ਤੇ ਬੀਐਸਸੀ ਇੰਡੈਕਸ 12 ਲੱਖ 70 ਹਜ਼ਾਰ ਕਰੋੜ ਨੂੰ ਪਾਰ ਕਰ ਗਿਆ ਹੈ।
