Russia second COVID vaccine: ਪੂਰੀ ਦੁਨੀਆ ਇਸ ਸਮੇਂ ਕੋਰੋਨਾ ਵਰਗੀ ਭਿਆਨਕ ਮਹਾਂਮਾਰੀ ਨਾਲ ਜੂਝ ਰਹੀ ਹੈ। ਇਸੇ ਵਿਚਾਲੇ ਰੂਸ ਨੇ ਕਿਹਾ ਹੈ ਕਿ ਉਸਨੇ ਕੋਰੋਨਾ ਵਾਇਰਸ ਦੀ ਨਵੀਂ ਵੈਕਸੀਨ ਤਿਆਰ ਕਰ ਲਈ ਹੈ। ਇਸ ਤੋਂ ਪਹਿਲਾਂ 11 ਅਗਸਤ ਨੂੰ ਰੂਸ ਦੇ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨੇ ਕਿਹਾ ਸੀ ਕਿ ਰੂਸ ਨੇ ਕੋਰੋਨਾ ਵਾਇਰਸ ਦੀ ਸਫਲ ਵੈਕਸੀਨ ਤਿਆਰ ਕਰ ਲਈ ਹੈ। ਅਜਿਹਾ ਕਰਨ ਵਾਲਾ ਰੂਸ ਪਹਿਲਾ ਦੇਸ਼ ਬਣ ਗਿਆ ਸੀ। ਰੂਸ ਨੇ ਪਹਿਲੀ ਕੋਰੋਨਾ ਵੈਕਸੀਨ ਵਰਤਣ ਦੀ ਵੀ ਆਗਿਆ ਦੇ ਦਿੱਤੀ ਸੀ। ਇਸ ਤੋਂ ਬਾਅਦ ਹੁਣ ਰੂਸ ਨੇ ਦੂਜੀ ਵੈਕਸੀਨ ਤਿਆਰ ਕਰਨ ਦਾ ਦਾਅਵਾ ਕੀਤਾ ਹੈ। ਇੱਕ ਰਿਪੋਰਟ ਅਨੁਸਾਰ ਰੂਸ ਦਾ ਕਹਿਣਾ ਹੈ ਕਿ ਪਹਿਲੀ ਵੈਕਸੀਨ ਦੇ ਜੋ ਮਾੜੇ ਪ੍ਰਭਾਵ ਸਾਹਮਣੇ ਆਏ ਸੀ, ਉਹ ਨਵੀਂ ਵੈਕਸੀਨ ਲਗਾਉਣ ‘ਤੇ ਨਹੀਂ ਹੋਣਗੇ।
ਦਰਅਸਲ, ਰੂਸ ਨੇ ਪਹਿਲੀ ਵੈਕਸੀਨ ਦਾ ਨਾਮ Sputnik5 ਰੱਖਿਆ ਸੀ। ਜਿਸ ਤੋਂ ਬਾਅਦ ਹੁਣ ਦੂਜੀ ਵੈਕਸੀਨ ਨੂੰ EpiVacCorona ਨਾਮ ਦਿੱਤਾ ਗਿਆ ਹੈ। ਰੂਸ ਨੇ EpiVacCorona ਵੈਕਸੀਨ ਦਾ ਨਿਰਮਾਣ ਸਾਈਬੇਰੀਆ ਦੇ ਵਰਲਡ ਕਲਾਸ ਵਾਇਰੋਲੋਜੀ ਇੰਸਟੀਚਿਊਟ (ਵੈਕਟਰ ਸਟੇਟ ਰਿਸਰਚ ਸੈਂਟਰ ਆਫ ਵਾਇਰੋਲੋਜੀ ਐਂਡ ਬਾਇਓਟੈਕਨਾਲੋਜੀ) ਵਿੱਚ ਕੀਤਾ ਹੈ। ਪਹਿਲਾਂ ਇਹ ਸੰਸਥਾ ਚੋਟੀ ਦਾ ਗੁਪਤ ਜੈਵਿਕ ਜੀਵ-ਵਿਗਿਆਨਕ ਖੋਜ ਪਲਾਂਟ ਹੁੰਦੀ ਸੀ।
ਇਸ ਵੈਕਸੀਨ ਨੂੰ ਲੈ ਕੇ ਰੂਸੀ ਵਿਗਿਆਨੀਆਂ ਨੇ ਦਾਅਵਾ ਕੀਤਾ ਹੈ ਕਿ EpiVacCorona ਵੈਕਸੀਨ ਦਾ ਕਲੀਨਿਕਲ ਟ੍ਰਾਇਲ ਸਤੰਬਰ ਵਿੱਚ ਪੂਰਾ ਕਰ ਲਿਆ ਜਾਵੇਗਾ, ਪਰ ਜਿਨ੍ਹਾਂ 57 ਵਲੰਟੀਅਰਾਂ ਨੂੰ ਵੈਕਸੀਨ ਲਗਾਈ ਗਈ ਹੈ, ਉਨ੍ਹਾਂ ਵਿੱਚੋਂ ਕਿਸੇ ਨੂੰ ਵੀ ਇਸ ਦੇ ਮਾੜੇ ਪ੍ਰਭਾਵਾਂ ਦਾ ਸਾਹਮਣਾ ਨਹੀਂ ਕਰਨਾ ਪਿਆ । ਸਾਰੇ ਵਾਲੰਟੀਅਰ ਸਿਹਤਮੰਦ ਹਨ ਅਤੇ ਚੰਗਾ ਮਹਿਸੂਸ ਕਰ ਰਹੇ ਹਨ। EpiVacCorona ਦੀਆਂ ਦੋ ਖੁਰਾਕਾਂ ਵੀ ਲਾਗੂ ਕੀਤੀਆਂ ਜਾਣਗੀਆਂ। ਪਹਿਲੀ ਖੁਰਾਕ ਦੇ 14 ਤੋਂ 21 ਦਿਨਾਂ ਬਾਅਦ ਦੂਜੀ ਖੁਰਾਕ ਦਿੱਤੀ ਜਾਵੇਗੀ।ਰੂਸ ਨੂੰ ਉਮੀਦ ਹੈ ਕਿ ਇਹ ਟੀਕਾ ਅਕਤੂਬਰ ਤੱਕ ਰਜਿਸਟਰ ਹੋ ਜਾਵੇਗਾ ਅਤੇ ਨਵੰਬਰ ਤੋਂ ਇਸਦਾ ਉਤਪਾਦਨ ਸ਼ੁਰੂ ਹੋ ਜਾਵੇਗਾ।
ਦੱਸ ਦੇਈਏ ਕਿ ਵੈਕਟਰ ਸਟੇਟ ਰਿਸਰਚ ਸੈਂਟਰ ਆਫ ਵਾਇਰੋਲੋਜੀ ਐਂਡ ਬਾਇਓਟੈਕਨਾਲੌਜੀ ਨੇ ਕੋਰੋਨਾ ਵਾਇਰਸ ਦੇ 13 ਸੰਭਾਵੀ ਟੀਕਿਆਂ ‘ਤੇ ਕੰਮ ਕੀਤਾ ਸੀ। ਇਨ੍ਹਾਂ ਟੀਕਿਆਂ ਦਾ ਲੈਬ ਦੇ ਜਾਨਵਰਾਂ ‘ਤੇ ਟੈਸਟ ਕੀਤਾ ਗਿਆ ਸੀ। ਜ਼ਿਕਰਯੋਗ ਹੈ ਕਿ ਚੀਨ, ਅਮਰੀਕਾ ਅਤੇ ਬ੍ਰਿਟੇਨ ਵੀ ਕੋਰੋਨਾ ਦੀ ਸਫਲ ਟੀਕਾ ਤਿਆਰ ਕਰਨ ਵਿੱਚ ਰੁੱਝੇ ਹੋਏ ਹਨ ਅਤੇ ਫਿਲਹਾਲ ਤਿੰਨ ਦੇਸ਼ਾਂ ਦੇ ਕਈ ਟੀਕਿਆਂ ਦੇ ਪੜਾਅ -3 ਟ੍ਰਾਇਲ ਚੱਲ ਰਹੇ ਹਨ।
