Diljit BornTO Shine Tour: ਦਿਲਜੀਤ ਦੋਸਾਂਝ ਨੇ ਆਪਣੇ ਚੱਲ ਰਹੇ ਬੌਰਨ ਟੂ ਸ਼ਾਈਨ ਵਰਲਡ ਮਿਊਜ਼ਿਕ ਟੂਰ ‘ਤੇ ਭਾਰੀ ਰੌਣਕ ਪੈਦਾ ਕੀਤੀ ਹੈ। ਗਾਇਕ ਨੇ 9 ਅਪ੍ਰੈਲ ਨੂੰ ਭਾਰਤ ਵਿੱਚ ਆਪਣਾ ਸ਼ੋਅ ਸ਼ੁਰੂ ਕੀਤਾ ਸੀ ਅਤੇ ਹੁਣ ਇਹ ਸ਼ੋਅ ਵਿਦੇਸ਼ਾਂ ਵਿੱਚ ਪਹੁੰਚ ਗਿਆ ਹੈ।
ਆਪਣੇ ‘ਬੌਰਨ ਟੂ ਸ਼ਾਈਨ ਟੂਰ’ ਦੇ ਹਿੱਸੇ ਵਜੋਂ, ਦਿਲਜੀਤ ਦੋਸਾਂਝ ਵੈਨਕੂਵਰ ਵਿੱਚ ਰੋਜਰਜ਼ ਏਰੀਨਾ ਵਿੱਚ ਸ਼ੋਅ ਕੀਤਾ, ਜੋ ਕਿ ਸੁਪਰਹਿੱਟ ਰਿਹਾ। ਇਹ ਯਾਤਰਾ ਭਾਰਤ ਤੋਂ ਸ਼ੁਰੂ ਹੋਈ ਅਤੇ ਹੁਣ ਕੈਨੇਡਾ ਵਿੱਚ ਹੈ। ਕੈਨੇਡਾ ਤੋਂ ਬਾਅਦ ਦਿਲਜੀਤ ਦੋਸਾਂਝ ਜੁਲਾਈ ‘ਚ ਯੂ. ਐੱਸ. ਏ. ‘ਚ ਵਰਲਡ ਟੂਰ ਕਰਨਗੇ ਤੇ ਇਸ ਤੋਂ ਬਾਅਦ ਅਗਸਤ ‘ਚ ਦਿਲਜੀਤ ਯੂ. ਕੇ. ਵਿਖੇ ‘ਬੋਰਨ ਟੂ ਸ਼ਾਈਨ ਵਰਲਡ ਟੂਰ’ ਚ ਵੀ ਮਿਉਜ਼ਿਕ ਕੰਸਰਟ ਕਰਨਗੇ। ਦਿਲਜੀਤ ਨੇ ਇਹ ਸ਼ੋਅ ਮਰਹੂਮ ਪੰਜਾਬੀ ਕਲਾਕਾਰਾਂ ਦੀਪ ਸਿੱਧੂ, ਸਿੱਧੂ ਮੂਸੇਵਾਲਾ ਅਤੇ ਅੰਤਰਰਾਸ਼ਟਰੀ ਕਬੱਡੀ ਖਿਡਾਰੀ ਸੰਦੀਪ ਅੰਬੀਆਂ ਨੂੰ ਸਮਰਪਿਤ ਕਿਤਾ। ਜਦੋਂ ਕਿ ਸੰਦੀਪ ਅੰਬੀਆਂ ਅਤੇ ਸਿੱਧੂ ਮੂਸੇਵਾਲਾ ਦੀ ਦਿਨ-ਦਿਹਾੜੇ ਹੱਤਿਆ ਕਰ ਦਿੱਤੀ ਗਈ ਸੀ, ਦੀਪ ਸਿੱਧੂ ਦੀ ਇਸ ਸਾਲ ਦੇ ਸ਼ੁਰੂ ਵਿੱਚ ਇੱਕ ਕਾਰ ਹਾਦਸੇ ਵਿੱਚ ਮੌਤ ਹੋ ਗਈ ਸੀ। ਤਿੰਨਾਂ ਦੀ ਮੌਤ ਨੇ ਸਭ ਨੂੰ ਝੰਜੋੜ ਕੇ ਰੱਖ ਦਿੱਤਾ ਹੈ।
ਦਿਲਜੀਤ ਦੋਸਾਂਝ ਨੇ ਸ਼ੋਅ ਤੋਂ ਬਾਅਦ ਇੱਕ ਪੋਸਟ ਰਾਹੀਂ ਆਪਣੇ ਫ਼ੈਨਜ਼ ਨੂੰ ਧੰਨਵਾਦ ਕੀਤਾ। ਪੋਸਟ ਵਿੱਚ ਉਨ੍ਹਾਂ ਲਿਖਿਆ, “ਵਾਹਿਗੁਰੂ, ਇਕ ਕਲਾਕਾਰ ਦੇ ਤੌਰ ‘ਤੇ ਰੋਜਰਸ ਏਰੇਨਾ ‘ਚ ਪੇਸ਼ਕਾਰੀ ਦੇਣਾ ਵੀ ਇਕ ਸੁਪਨਾ ਸੀ। ਹਾਲਾਂਕਿ ਇਹ ਸੰਸਾਰ ਇਕ ਸੁਪਨਾ ਹੈ ਤੇ ਅਸੀਂ ਸੁਪਨੇ ‘ਚ ਮੇਲਾ ਦੇਖ ਰਹੇ ਹਾਂ ਪਰ ਜਿੰਨਾ ਚਿਰ ਮੇਲੇ ‘ਚ ਹਾਂ, ਉਨਾ ਚਿਰ ਹਰ ਮੇਲੇ ਦਾ ਹਰ ਰੰਗ ਮਾਣ ਲਈਏ, ਪਿਆਰ ਵੰਡੀਏ। ਦੱਸ ਦੇਈਏ ਕਿ ਦਿਲਜੀਤ ਦਾ ‘ਬੋਰਨ ਟੂ ਸ਼ਾਈਨ’ ਵਰਲਡ ਟੂਰ ‘ਸਾ ਰੇ ਗਾ ਮਾ’ ਵਲੋਂ ਕਰਵਾਇਆ ਜਾ ਰਿਹਾ ਹੈ। 21 ਜੂਨ ਨੂੰ ਦਿਲਜੀਤ ਦਾ ਸ਼ੋਅ ਕੈਲਗਰੀ, 23 ਜੂਨ ਨੂੰ ਵਿਨੀਪੈੱਗ ਤੇ 25 ਜੂਨ ਨੂੰ ਟੋਰਾਂਟੋ ਵਿਖੇ ਹੋਵੇਗਾ। ਦਿਲਜੀਤ ਦੋਸਾਂਝ ਨੂੰ ਆਖਰੀ ਵਾਰ ਫਿਲਮ ‘ਹੌਂਸਲਾ ਰੱਖ’ ਵਿੱਚ ਦੇਖਿਆ ਗਿਆ ਸੀ, ਜਿਸ ਵਿੱਚ ਸੋਨਮ ਬਾਜਵਾ ਅਤੇ ਸ਼ਹਿਨਾਜ਼ ਗਿੱਲ ਵੀ ਸਨ।
