Kids teeth care tips: ਬੱਚੇ ਖਾਣ-ਪੀਣ ਦੇ ਮਾਮਲੇ ‘ਚ ਅਕਸਰ ਨਖ਼ਰੇ ਦਿਖਾਉਂਦੇ ਹਨ। ਕੋਈ ਵੀ ਚੀਜ਼ ਖਾਣ ਲਈ ਆਨਾਕਾਨੀ ਕਰਨ ਲੱਗਦੇ ਹਨ। ਹਰ ਮਾਂ-ਬਾਪ ਚਾਹੁੰਦਾ ਹੈ ਕਿ ਉਨ੍ਹਾਂ ਦੇ ਬੱਚੇ ਸਿਹਤਮੰਦ ਹੋਣ। ਇਸ ਦੇ ਲਈ ਉਹ ਬੱਚੇ ਦੇ ਖਾਣ-ਪੀਣ ਦਾ ਵੀ ਖਾਸ ਧਿਆਨ ਰੱਖਦੇ ਹਨ। ਬੱਚੇ ਚਿਪਸ-ਚਾਕਲੇਟ ਵਰਗੀਆਂ ਚੀਜ਼ਾਂ ਖਾਣਾ ਪਸੰਦ ਕਰਦੇ ਹਨ। ਮਾਂ-ਬਾਪ ਬੱਚੇ ਦੀ ਜ਼ਿੱਦ ਪੂਰੀ ਕਰਨ ਲਈ ਉਨ੍ਹਾਂ ਨੂੰ ਚੀਜ਼ਾਂ ਲੈ ਕੇ ਦਿੰਦੇ ਹਨ। ਇਸ ਨਾਲ ਬੱਚੇ ਦਾ ਪੇਟ ਤਾਂ ਭਰ ਜਾਵੇਗਾ। ਪਰ ਉਨ੍ਹਾਂ ਦੇ ਦੰਦਾਂ ਦਾ ਨੁਕਸਾਨ ਹੋ ਸਕਦਾ ਹੈ। ਆਓ ਤੁਹਾਨੂੰ ਕੁਝ ਅਜਿਹੇ ਫੂਡਜ਼ ਦੱਸਦੇ ਹਾਂ ਜੋ ਬੱਚੇ ਦੇ ਦੰਦਾਂ ਲਈ ਨੁਕਸਾਨਦੇਹ ਹੋ ਸਕਦੇ ਹਨ। ਤਾਂ ਆਓ ਜਾਣਦੇ ਹਾਂ ਉਨ੍ਹਾਂ ਬਾਰੇ…
ਕਾਰਬੋਨੇਟਿਡ ਡਰਿੰਕਸ ਰੱਖੋ ਦੂਰ: ਰਿਸਰਚ ਮੁਤਾਬਕ ਜੇਕਰ ਤੁਹਾਡਾ ਬੱਚਾ ਜ਼ਿਆਦਾ ਕੋਲਡ ਡਰਿੰਕ ਪੀਂਦਾ ਹੈ ਤਾਂ ਉਸ ਦੇ ਦੰਦ ਖਰਾਬ ਹੋ ਸਕਦੇ ਹਨ। ਕੋਲਡ ਡਰਿੰਕਸ ਪੀਣ ਨਾਲ ਬੱਚੇ ਦੇ ਦੰਦ ਜਲਦੀ ਖਰਾਬ ਹੋਣ ਲੱਗਦੇ ਹਨ। ਅਜਿਹੇ ਡਰਿੰਕਸ ‘ਚ ਪਾਇਆ ਜਾਣ ਵਾਲਾ ਕਾਰਬੋਨਿਕ ਐਸਿਡ ਦੰਦਾਂ ਦੇ ਇਨਮੇਲ ਨੂੰ ਖਰਾਬ ਕਰ ਦਿੰਦਾ ਹੈ। ਬੱਚੇ ਦੇ ਦੰਦ ਸੈਂਸੀਟਿਵ ਹੋਣ ਲੱਗਦੇ ਹਨ। ਜਿਸ ਕਾਰਨ ਉਹ ਖਰਾਬ ਵੀ ਹੋ ਸਕਦੇ ਹਨ।
ਪੈਕ ਕੀਤੇ ਜੂਸ ਨੂੰ ਰੱਖੋ ਦੂਰ: ਮਾਪੇ ਆਪਣੇ ਬੱਚੇ ਨੂੰ ਪੈਕਡ ਜੂਸ ਦਾ ਸੇਵਨ ਕਰਵਾਉਂਦੇ ਹਨ ਜੋ ਉਨ੍ਹਾਂ ਦੀ ਸਿਹਤ ਲਈ ਚੰਗਾ ਨਹੀਂ ਹੁੰਦਾ। ਪੈਕਡ ਜੂਸ ਬੱਚੇ ਦੀ ਓਰਲ ਹੈਲਥ ਲਈ ਹਾਨੀਕਾਰਕ ਹੋ ਸਕਦਾ ਹੈ। ਇਸ ‘ਚ ਪਾਈ ਜਾਣ ਵਾਲੀ ਮਿਠਾਸ ਬੱਚੇ ਦੇ ਦੰਦਾਂ ‘ਚ ਚਿਪਕ ਜਾਂਦੀ ਹੈ। ਇਸ ਤੋਂ ਇਲਾਵਾ ਇਸ ‘ਚ ਪਾਏ ਜਾਣ ਵਾਲੇ ਪ੍ਰਜ਼ਰਵੇਟਿਵ ਬੱਚੇ ਦੀ ਸਿਹਤ ਲਈ ਬਹੁਤ ਹਾਨੀਕਾਰਕ ਹੁੰਦੇ ਹਨ। ਜੇਕਰ ਤੁਸੀਂ ਆਪਣੇ ਬੱਚੇ ਨੂੰ ਪੈਕਡ ਭੋਜਨ ਖਾਣ ਲਈ ਕਹਿ ਰਹੇ ਹੋ ਤਾਂ ਉਸ ਤੋਂ ਬਾਅਦ ਉਸ ਨੂੰ ਕੁਰਲੀ ਕਰਨ ਲਈ ਵੀ ਕਹੋ।
ਸਿਟ੍ਰਸ ਫਰੂਟ ਰੱਖੋ ਦੂਰ: ਖੱਟੇ ਫਲਾਂ ‘ਚ ਵਿਟਾਮਿਨ ਸੀ ਭਰਪੂਰ ਮਾਤਰਾ ‘ਚ ਪਾਇਆ ਜਾਂਦਾ ਹੈ। ਇਹ ਸਿਹਤ ਲਈ ਚੰਗਾ ਹੈ ਪਰ ਜੇਕਰ ਬੱਚਿਆਂ ਦੀ ਗੱਲ ਕਰੀਏ ਤਾਂ ਇਹ ਉਨ੍ਹਾਂ ਦੀ ਸਿਹਤ ਲਈ ਹਾਨੀਕਾਰਕ ਹੈ। ਇਨ੍ਹਾਂ ‘ਚ ਪਾਏ ਜਾਣ ਵਾਲੇ ਐਸਿਡ ਦਾ ਦੰਦਾਂ ਦੇ ਇਨਮੇਲ ‘ਤੇ ਬਹੁਤ ਬੁਰਾ ਅਸਰ ਪੈਂਦਾ ਹੈ। ਪਰ ਜੇਕਰ ਸੰਤਰੇ ਦੀ ਗੱਲ ਕਰੀਏ ਤਾਂ ਇਸ ‘ਚ ਬਹੁਤ ਘੱਟ ਮਾਤਰਾ ‘ਚ ਐਸਿਡ ਪਾਇਆ ਜਾਂਦਾ ਹੈ। ਤੁਸੀਂ ਬੱਚੇ ਨੂੰ ਸੰਤਰੇ ਖੁਆ ਸਕਦੇ ਹੋ।
ਪੌਪਕੋਰਨ ਤੋਂ ਰੱਖੋ ਦੂਰ: ਆਪਣੇ ਬੱਚੇ ਨੂੰ ਪੌਪਕੌਰਨ ਤੋਂ ਵੀ ਦੂਰ ਰੱਖੋ। ਇਹ ਹਲਕਾ ਭੋਜਨ ਹੁੰਦਾ ਹੈ। ਪਰ ਕੈਰੇਮਲਾਈਜ਼ਡ, ਬਟਰ ਅਤੇ ਸਾਲਟ ਫਲੇਵਰ ਵਾਲੇ ਪੌਪਕੌਰਨ ਦੇ ਕਣ ਬੱਚੇ ਦੇ ਦੰਦਾਂ ‘ਤੇ ਚਿਪਕ ਜਾਂਦੇ ਹਨ, ਜਿਸ ਨਾਲ ਕੈਵਿਟੀ ਦੀ ਸਮੱਸਿਆ ਹੋ ਸਕਦੀ ਹੈ। ਇਸ ਤੋਂ ਇਲਾਵਾ ਬੱਚੇ ਨੂੰ ਮਿੱਠੀਆਂ ਚੀਜ਼ਾਂ ਅਤੇ ਚਾਕਲੇਟ ਘੱਟ ਦੇਣੀਆਂ ਚਾਹੀਦੀਆਂ ਹਨ।
ਆਲੂ ਦੇ ਚਿਪਸ ਤੋਂ ਰੱਖੋ ਦੂਰ: ਆਪਣੇ ਬੱਚੇ ਨੂੰ ਆਲੂ ਦੇ ਚਿਪਸ ਖਾਣ ਲਈ ਨਾ ਦਿਓ। ਇਨ੍ਹਾਂ ਚਿਪਸ ਦਾ ਬੱਚੇ ਦੀ ਓਰਲ ਹੈਲਥ ‘ਤੇ ਵੀ ਬੁਰਾ ਅਸਰ ਪੈਂਦਾ ਹੈ। ਇਨ੍ਹਾਂ ‘ਚ ਪਾਇਆ ਜਾਣ ਵਾਲਾ ਸਟਾਰਚ ਬੱਚੇ ਦੀ ਸਿਹਤ ਲਈ ਬਹੁਤ ਖ਼ਰਾਬ ਹੁੰਦਾ ਹੈ। ਇਹ ਚਿਪਸ ਬੱਚੇ ਦੇ ਦੰਦਾਂ ‘ਚ ਫਸ ਜਾਂਦੇ ਹਨ ਅਤੇ ਉਨ੍ਹਾਂ ਨੂੰ ਕੈਵਿਟੀ ਦੀ ਸਮੱਸਿਆ ਹੋਣ ਲੱਗਦੀ ਹੈ। ਜੇਕਰ ਬੱਚਾ ਅਜੇ ਵੀ ਚਿਪਸ ਖਾਂਦਾ ਹੈ ਤਾਂ ਤੁਹਾਨੂੰ ਉਸਨੂੰ ਦੋ ਵਾਰ ਬੁਰਸ਼ ਕਰਵਾਉਣਾ ਚਾਹੀਦਾ ਹੈ।
