Eiffel Tower will reopen: ਪੈਰਿਸ: ਦੁਨੀਆ ਭਰ ਵਿੱਚ ਕੋਰੋਨਾ ਵਾਇਰਸ ਕਾਰਨ ਆਰਥਿਕਤਾ ਵਿੱਚ ਕਾਫ਼ੀ ਗਿਰਾਵਟ ਆ ਗਈ ਹੈ । ਇਸ ਸੰਕਟ ਦੇ ਮੱਦੇਨਜ਼ਰ ਕੋਰੋਨਾ ਦੇ ਵੱਧ ਰਹੇ ਮਾਮਲਿਆਂ ਦੇ ਵਿਚਕਾਰ ਹੁਣ ਕਈ ਦੇਸ਼ ਲਾਕਡਾਊਨ ਵਿੱਚ ਢਿੱਲ ਦੇ ਰਹੇ ਹਨ । ਫਰਾਂਸ ਨੇ ਵੀ ਆਰਥਿਕ ਸੰਕਟ ਦੇ ਮੱਦੇਨਜ਼ਰ 15 ਮਈ ਤੋਂ ਲਾਕਡਾਊਨ ਵਿੱਚ ਢਿੱਲ ਦੇਣੀ ਸ਼ੁਰੂ ਕਰ ਦਿੱਤੀ ਸੀ । ਇਸ ਦੌਰਾਨ ਖ਼ਬਰਾਂ ਆ ਰਹੀਆਂ ਹਨ ਕਿ 25 ਜੂਨ ਤੋਂ ਪੈਰਿਸ ਸਥਿਤ ਆਈਫਲ ਟਾਵਰ ਵੀ ਆਮ ਲੋਕਾਂ ਲਈ ਖੋਲ੍ਹ ਦਿੱਤਾ ਜਾਵੇਗਾ ।
ਦੱਸ ਦੇਈਏ ਕਿ ਲਾਕਡਾਊਨ ਦੇ ਚੱਲਦਿਆਂ ਪਿਛਲੇ ਤਿੰਨ ਮਹੀਨਿਆਂ ਤੋਂ ਬੰਦ ਸੀ । ਇਸ ਦੇ ਸੰਚਾਲਕ ਨੇ ਕਿਹਾ ਕਿ ਦੂਜੀ ਵਿਸ਼ਵ ਜੰਗ ਤੋਂ ਬਾਅਦ ਪਹਿਲੀ ਵਾਰ ਆਈਫਲ ਟਾਵਰ ਇੰਨੇ ਦਿਨਾਂ ਲਈ ਬੰਦ ਰਿਹਾ ਹੈ । ਹਾਲਾਂਕਿ, ਇੱਥੇ ਆਉਣ ਵਾਲੇ 11 ਸਾਲ ਤੋਂ ਵੱਧ ਉਮਰ ਦੇ ਸਾਰੇ ਲੋਕਾਂ ਲਈ ਮਾਸਕ ਪਹਿਨਣਾ ਲਾਜ਼ਮੀ ਹੋਵੇਗਾ । ਆਈਫਲ ਟਾਵਰ ਦੀ ਵੈੱਬਸਾਈਟ ਨੇ ਕਿਹਾ ਕਿ 25 ਜੂਨ ਤੋਂ ਇੱਕ ਵਾਰ ਫਿਰ ਲੋਕ ਆਈਫਲ ਟਾਵਰ ਨੂੰ ਵੇਖ ਸਕਣਗੇ, ਪਰ ਇੱਥੇ ਫੇਸ ਮਾਸਕ ਲਾਜ਼ਮੀ ਹੋ ਜਾਵੇਗਾ । ਹਾਲਾਂਕਿ, ਲੋਕ ਲਿਫਟਾਂ ਜਾਂ ਐਲੀਵੇਟਰਾਂ ਦੀ ਵਰਤੋਂ ਕਰਨ ਦੇ ਯੋਗ ਨਹੀਂ ਹੋਣਗੇ । ਕੋਰੋਨਾ ਨੂੰ ਦੇਖਦੇ ਹੋਏ ਸਿਰਫ ਪੌੜੀਆਂ ਤੋਂ ਆਉਣ ਦੀ ਇਜਾਜ਼ਤ ਹੀ ਰਹੇਗੀ ।
ਵੈਬਸਾਈਟ ਵਿੱਚ ਅੱਗੇ ਕਿਹਾ ਗਿਆ ਕਿ ਸਮਾਜਿਕ ਦੂਰੀ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਸਿਰਫ ਇੱਕ ਸੀਮਤ ਗਿਣਤੀ ਵਿੱਚ ਹੀ ਲੋਕਾਂ ਨੂੰ ਦਾਖਲ ਹੋਣ ਦੀ ਆਗਿਆ ਦਿੱਤੀ ਜਾਵੇਗੀ । ਇਹ ਫੈਸਲਾ ਲਾਗ ਦੇ ਜੋਖਮ ਦੇ ਮੱਦੇਨਜ਼ਰ ਲਿਆ ਗਿਆ ਹੈ । ਉੱਪਰਲੀ ਮੰਜ਼ਿਲ ਹਾਲੇ ਬੰਦ ਰਹੇਗੀ, ਕਿਉਂਕਿ ਉੱਪਰ ਆਉਣ ਵਾਲੀ ਲਿਫਟ ਬਹੁਤ ਛੋਟੀ ਹੁੰਦੀ ਹੈ । ਹਾਲਾਂਕਿ, ਗਰਮੀਆਂ ਦੌਰਾਨ ਇਹ ਦੁਬਾਰਾ ਖੁੱਲ੍ਹ ਸਕਦਾ ਹੈ ।
ਗੌਰਤਲਬ ਹੈ ਕਿ ਵਿਸ਼ਵ ਭਰ ਵਿੱਚ 72 ਲੱਖ ਤੋਂ ਵੱਧ ਲੋਕ ਕੋਰੋਨਾ ਵਾਇਰਸ ਨਾਲ ਸੰਕਰਮਿਤ ਹੋਏ ਹਨ । ਇਸ ਦੇ ਨਾਲ ਹੀ ਇਸ ਲਾਗ ਕਾਰਨ 4 ਲੱਖ ਅੱਠ ਹਜ਼ਾਰ ਤੋਂ ਵੱਧ ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ । ਜੇ ਅਸੀਂ ਫਰਾਂਸ ਵਿੱਚ ਇਸ ਲਾਗ ਦੀ ਗੱਲ ਕਰੀਏ ਤਾਂ ਇੱਥੇ 1 ਲੱਖ 55 ਹਜ਼ਾਰ ਤੋਂ ਵੱਧ ਪੁਸ਼ਟੀ ਕੀਤੇ ਕੇਸ ਸਾਹਮਣੇ ਆਏ ਹਨ । ਉੱਥੇ ਹੀ 29 ਹਜ਼ਾਰ ਤੋਂ ਵੱਧ ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ ।
