Air India Delhi-Moscow flight: ਨਵੀਂ ਦਿੱਲੀ. ਸ਼ਨੀਵਾਰ ਸਵੇਰੇ ਦਿੱਲੀ ਏਅਰਪੋਰਟ ‘ਤੇ ਅਧਿਕਾਰੀਆਂ ਵਿਚਕਾਰ ਹਫੜਾ-ਦਫੜੀ ਮੱਚ ਗਈ । ਦਰਅਸਲ, ਏਅਰ ਇੰਡੀਆ ਦੀ ਇੱਕ ਉਡਾਣ ਨੇ ਮਾਸਕੋ ਲਈ ਉਡਾਣ ਭਰੀ । ਉਡਾਣ ਰਵਾਨਾ ਹੋਣ ਤੋਂ ਬਾਅਦ ਲੱਗਿਆ ਕਿ ਉਸ ਉਡਾਣ ਦਾ ਪਾਇਲਟ ਕੋਰੋਨਾ ਪਾਜ਼ੀਟਿਵ ਹੈ । ਇਸ ਬਾਰੇ ਪਤਾ ਲੱਗਦਿਆਂ ਹੀ ਹਵਾਈ ਟ੍ਰੈਫਿਕ ਕੰਟਰੋਲ (ATC) ਰਾਹੀਂ ਉਡਾਣ ਦੇ ਚਾਲਕ ਮੈਂਬਰਾਂ ਨਾਲ ਸੰਪਰਕ ਕੀਤਾ ਗਿਆ । ਜਿਸ ਤੋਂ ਬਾਅਦ ਫਲਾਈਟ ਨੂੰ ਤੁਰੰਤ ਦਿੱਲੀ ਵਾਪਸ ਆਉਣ ਲਈ ਕਿਹਾ ਗਿਆ । ਉਸ ਸਮੇਂ ਇਹ ਫਲਾਈਟ ਉਜ਼ਬੇਕਿਸਤਾਨ ਦੇ ਉੱਪਰ ਜਾ ਰਹੀ ਸੀ ।
ਰਿਪੋਰਟਾਂ ਅਨੁਸਾਰ ਸਵੇਰੇ ਜਦੋਂ ਚਾਲਕ ਦਲ ਦੇ ਮੈਂਬਰਾਂ ਦੀਆਂ ਰਿਪੋਰਟਾਂ ਦੇਖੀਆਂ ਜਾ ਰਹੀਆਂ ਸਨ ਤਾਂ ਪਾਇਲਟ ਦੀ ਰਿਪੋਰਟ ਨੂੰ ਗਲਤੀ ਨਾਲ ਨੈਗੇਟਿਵ ਸਮਝ ਲਿਆ ਗਿਆ, ਜਦੋਂ ਕਿ ਉਹ ਕੋਰੋਨਾ ਪਾਜ਼ੀਟਿਵ ਸੀ । ਜਦੋਂ ਰਿਪੋਰਟ ਨੂੰ ਦੋ ਘੰਟਿਆਂ ਬਾਅਦ ਦੁਬਾਰਾ ਵੇਖਿਆ ਗਿਆ, ਤਾਂ ਇਹ ਪਾਇਆ ਗਿਆ ਕਿ ਪਾਇਲਟ ਕੋਰੋਨਾ ਸੰਕਰਮਿਤ ਸੀ । ਇਹ ਉਡਾਣ ਰੂਸ ਵਿੱਚ ਫਸੇ ਭਾਰਤੀਆਂ ਨੂੰ ਵਾਪਸ ਲਿਆਉਣ ਜਾ ਰਹੀ ਸੀ । ਯਾਨੀ ਇਸ ਫਲਾਈਟ ਵਿੱਚ ਸਿਰਫ ਚਾਲਕ ਦਲ ਦੇ ਮੈਂਬਰ ਸਨ ।
ਇਹ ਏਅਰਬੱਸ A-320 ਦੁਪਹਿਰ 12.30 ਵਜੇ ਵਾਪਸ ਦਿੱਲੀ ਪਹੁੰਚੀ । ਨਿਯਮ ਦੇ ਅਨੁਸਾਰ ਚਾਲਕ ਦਲ ਦੇ ਸਾਰੇ ਲੋਕਾਂ ਨੂੰ ਵੱਖ ਕੀਤਾ ਗਿਆ ਹੈ । ਹੁਣ ਇਸ ਫਲਾਈਟ ਨੂੰ ਸੇਨੇਟਾਈਜ਼ ਕੀਤਾ ਜਾਵੇਗਾ । ਹੁਣ ਰੂਸ ਵਿੱਚ ਫਸੇ ਭਾਰਤੀਆਂ ਨੂੰ ਵਾਪਸ ਲੈਣ ਲਈ ਇੱਕ ਹੋਰ ਉਡਾਣ ਭੇਜੀ ਜਾਵੇਗੀ । ਦੱਸ ਦੇਈਏ ਕਿ ਏਅਰ ਇੰਡੀਆ ਵੰਦੇ ਭਾਰਤ ਮਿਸ਼ਨ ਦੇ ਤਹਿਤ ਵਿਦੇਸ਼ਾਂ ਵਿੱਚ ਫਸੇ ਲੋਕਾਂ ਨੂੰ ਵਾਪਸ ਦੇਸ਼ ਲਿਆਂਦਾ ਗਿਆ ਹੈ । ਹੁਣ ਤੱਕ 50 ਹਜ਼ਾਰ ਤੋਂ ਵੱਧ ਲੋਕ ਵੱਖ-ਵੱਖ ਦੇਸ਼ਾਂ ਤੋਂ ਪਰਤ ਚੁੱਕੇ ਹਨ, ਜਦੋਂ ਕਿ ਦੋ ਲੱਖ ਤੋਂ ਵੱਧ ਲੋਕਾਂ ਨੇ ਦੇਸ਼ ਪਰਤਣ ਲਈ ਰਜਿਸਟਰੇਸ਼ਨ ਕਰਵਾਈ ਹੋਈ ਹੈ ।
