pakistan plans for 2 billion dollar: ਪਾਕਿਸਤਾਨ ਇਸ ਸਮੇਂ ਨਕਦ ਸੰਕਟ ਨਾਲ ਜੂਝ ਰਿਹਾ ਹੈ। ਇਸ ਨੂੰ ਦੂਰ ਕਰਨ ਲਈ, ਪਾਕਿਸਤਾਨ ਸਰਕਾਰ ਨੇ ਹੁਣ ਗਲੋਬਲ ਵਿੱਤੀ ਸੰਸਥਾਵਾਂ ਤੋਂ ਦੋ ਅਰਬ ਡਾਲਰ ਦਾ ਨਵਾਂ ਕਰਜ਼ਾ ਮੰਗਣ ਦੀ ਯੋਜਨਾ ਬਣਾਈ ਹੈ। ਇਹ ਜਾਣਕਾਰੀ ਬੁੱਧਵਾਰ ਨੂੰ ਇੱਕ ਮੀਡੀਆ ਰਿਪੋਰਟ ਵਿੱਚ ਦਿੱਤੀ ਗਈ ਹੈ। ਪਾਕਿਸਤਾਨ ਨੂੰ ਕੋਰੋਨਾ ਵਾਇਰਸ ਦੀ ਮਹਾਂਮਾਰੀ ਨਾਲ ਲੜਨ ਲਈ ਸਹਾਇਤਾ ਦੀ ਜ਼ਰੂਰਤ ਹੈ, ਜਦਕਿ ਸਰਕਾਰ ਦੇ ਖਜ਼ਾਨੇ ਦੀ ਸਥਿੱਤੀ ਤੇਜ਼ੀ ਨਾਲ ਵਿਗੜਦੀ ਜਾ ਰਹੀ ਹੈ। ਮਿਲੀ ਜਾਣਕਾਰੀ ਦੇ ਅਨੁਸਾਰ ਪਾਕਿਸਤਾਨ ਨੇ ਵਿਸ਼ਵ ਬੈਂਕ ਅਤੇ ਏਸ਼ੀਅਨ ਵਿਕਾਸ ਬੈਂਕ (ਏਡੀਬੀ) ਤੋਂ ਜੋ ਨਵਾਂ ਕਰਜ਼ਾ ਮੰਗਿਆ ਹੈ, ਉਹ ਜੀ -20 ਦੇਸ਼ਾਂ ਤੋਂ ਮੰਗੇ ਗਏ ਕਰਜ਼ੇ ਨਾਲੋਂ ਜ਼ਿਆਦਾ ਹੈ। ਇਸਲਾਮਾਬਾਦ ਨੇ ਜੀ -20 ਦੇਸ਼ਾਂ ਤੋਂ 1.8 ਅਰਬ ਡਾਲਰ ਦੀ ਮੰਗ ਕੀਤੀ ਹੈ। ਏਡੀਬੀ ਅਤੇ ਪਾਕਿਸਤਾਨ ਨੇ ਕੋਵਿਡ -19 ਦੀ ਐਮਰਜੈਂਸੀ ‘ਤੇ ਮੈਡੀਕਲ ਉਪਕਰਣ ਖਰੀਦਣ ਅਤੇ ਗਰੀਬ ਔਰਤਾਂ ਨੂੰ ਵਿੱਤੀ ਸਹਾਇਤਾ ਪ੍ਰਦਾਨ ਕਰਨ ਲਈ 30.5 ਕਰੋੜ ਰੁਪਏ ‘ਤੇ ਸਹਿਮਤੀ ਦਿੱਤੀ ਹੈ।
ਹੁਣ ਏਸ਼ੀਅਨ ਵਿਕਾਸ ਬੈਂਕ ਵਪਾਰਕ ਸ਼ਰਤਾਂ ‘ਤੇ ਕਰਜ਼ੇ ਦੀ ਰਕਮ ਨੂੰ ਵਧਾਏਗਾ। ਪਾਕਿਸਤਾਨ ਨੂੰ ਪਿੱਛਲੇ ਮਹੀਨੇ ਕੌਮਾਂਤਰੀ ਮੁਦਰਾ ਫੰਡ ਤੋਂ 1.39 ਅਰਬ ਅਮਰੀਕੀ ਡਾਲਰ ਅਤੇ ਵਿਸ਼ਵ ਬੈਂਕ ਤੋਂ 20 ਕਰੋੜ ਡਾਲਰ ਦਾ ਐਮਰਜੈਂਸੀ ਕਰਜ਼ਾ ਮਿਲਿਆ ਸੀ। ਇਹ ਅੰਦਾਜ਼ਾ ਲਗਾਇਆ ਜਾ ਰਿਹਾ ਹੈ ਕਿ ਇਸ ਸਾਲ ਜੂਨ ਤੱਕ ਪਾਕਿਸਤਾਨ ਦਾ ਜਨਤਕ ਕਰਜ਼ਾ 37,500 ਅਰਬ ਪਾਕਿਸਤਾਨੀ ਰੁਪਏ ਜਾਂ ਕੁੱਲ ਘਰੇਲੂ ਉਤਪਾਦ (ਜੀਡੀਪੀ) ਦਾ 90 ਪ੍ਰਤੀਸ਼ਤ ਹੋ ਜਾਵੇਗਾ।
ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਪਾਕਿਸਤਾਨ ਇਸ ਸਾਲ ਸਿਰਫ ਕਰਜ਼ੇ ਦੀ ਅਦਾਇਗੀ ‘ਤੇ 2,800 ਅਰਬ ਰੁਪਏ ਖਰਚ ਕਰੇਗਾ, ਜੋ ਕਿ ਫੈਡਰਲ ਬੋਰਡ ਆਫ਼ ਰੈਵੇਨਿਊ ਦੇ ਅਨੁਮਾਨਿਤ ਟੈਕਸ ਉਗਰਾਹੀ ਦਾ 72 ਪ੍ਰਤੀਸ਼ਤ ਹੈ। ਜਦੋਂ ਦੋ ਸਾਲ ਪਹਿਲਾਂ ਪਾਕਿਸਤਾਨ ਤਹਿਰੀਕ-ਏ-ਇਨਸਾਫ਼ (ਪੀਟੀਆਈ) ਦੀ ਸਰਕਾਰ ਆਈ ਸੀ ਤਾਂ ਜਨਤਕ ਕਰਜ਼ਾ 24,800 ਲੱਖ ਕਰੋੜ ਰੁਪਏ ਸੀ ਜੋ ਕਿ ਤੇਜ਼ੀ ਨਾਲ ਵੱਧ ਰਿਹਾ ਹੈ। ਪਾਕਿਸਤਾਨ ਵਿੱਚ ਪਿੱਛਲੇ 24 ਘੰਟਿਆਂ ਦੌਰਾਨ ਕੋਰੋਨਾ ਵਾਇਰਸ ਦੇ 469 ਨਵੇਂ ਕੇਸ ਸਾਹਮਣੇ ਆਏ ਹਨ। ਹੁਣ ਤੱਕ ਕੁੱਲ 45,898 ਲੋਕ ਸੰਕਰਮਿਤ ਹੋਏ ਹਨ ਅਤੇ 985 ਦੀ ਮੌਤ ਹੋ ਚੁੱਕੀ ਹੈ।
