Private airlines pilot robbed: ਨਵੀਂ ਦਿੱਲੀ: ਨਕਾਬ ਪਾ ਕੇ ਹਮਲਾ ਕਰਨ ਵਾਲੇ ਗਿਰੋਹ ਨੇ ਬੁੱਧਵਾਰ ਸਵੇਰੇ ਆਈਆਈਟੀ ਦਿੱਲੀ ਨੇੜੇ ਇੱਕ ਪਾਇਲਟ ਨੂੰ ਹਮਲਾ ਕਰਕੇ ਲੁੱਟ ਲਿਆ । ਘਟਨਾ ਦੇ ਸਮੇਂ ਉਹ ਆਪਣੀ ਕੰਪਨੀ ਦੀ ਕੈਬ ਤੋਂ ਫਰੀਦਾਬਾਦ ਸਥਿਤ ਆਪਣੇ ਘਰ ਤੋਂ ਏਅਰਪੋਰਟ ਜਾ ਰਿਹਾ ਸੀ । ਉਸੇ ਸਮੇਂ ਹੀ ਆਈਆਈਟੀ ਦੇ ਗੇਟ ਨੇੜੇ ਬਦਮਾਸ਼ਾਂ ਨੇ ਉਨ੍ਹਾਂ ਦੀ ਕਾਰ ਨੂੰ ਰੋਕ ਲਿਆ ਅਤੇ ਕੁੱਟਮਾਰ ਕੀਤੀ ਅਤੇ ਉਸ ਨੂੰ ਲੁੱਟ ਲਿਆ । ਉਸਨੇ ਪੁਲਿਸ ਨੂੰ ਸੂਚਿਤ ਕੀਤਾ ਪਰ ਬਦਮਾਸ਼ ਪੁਲਿਸ ਦੇ ਆਉਣ ਤੋਂ ਪਹਿਲਾਂ ਹੀ ਫਰਾਰ ਹੋ ਗਏ । ਇਸ ਘਟਨਾ ਤੋਂ ਬਾਅਦ ਕਿਸ਼ਨਗੜ ਥਾਣਾ ਪੁਲਿਸ ਨੇ ਮਾਮਲਾ ਦਰਜ ਕਰ ਲਿਆ ਹੈ।
ਦਰਅਸਲ, ਪੀੜਤ ਇੱਕ ਹਵਾਬਾਜ਼ੀ ਕੰਪਨੀ ਵਿੱਚ ਕੈਪਟਨ ਹੈ । ਉਹ ਆਪਣੇ ਘਰ ਤੋਂ ਦਫਤਰ ਦੀ ਇੱਕ ਕੈਬ ਵਿੱਚ ਏਅਰਪੋਰਟ ਜਾ ਰਹੇ ਸਨ। ਆਈਆਈਟੀ ਫਲਾਈਓਵਰ ‘ਤੇ ਪੰਜ ਬਾਈਕ ‘ਤੇ 10 ਲੋਕ ਆਏ ਅਤੇ ਉਨ੍ਹਾਂ ਦੀ ਕਾਰ ਨੂੰ ਰੋਕ ਕੇ ਸ਼ੀਸ਼ਾ ਤੋੜ ਦਿੱਤਾ । ਇੱਕ ਬਦਮਾਸ਼ ਨੇ ਉਸ ਦੇ ਸਿਰ ‘ਤੇ ਪਿਸਤੌਲ ਲਗਾ ਕੇ ਸਾਮਾਨ ਅਤੇ 34 ਹਜ਼ਾਰ ਰੁਪਏ ਲੁੱਟ ਲਏ । ਇੱਕ ਬਦਮਾਸ਼ ਨੇ ਉਸ ਨੂੰ ਚਾਕੂ ਮਾਰ ਦਿੱਤਾ । ਪੀੜਤ ਨੇ ਦੱਸਿਆ ਕਿ ਮੁਲਜ਼ਮਾਂ ਨੇ ਇਸੇ ਹਮਲੇ ਦੌਰਾਨ ਕੁਝ ਹੋਰ ਕਾਰ ਸਵਾਰਾਂ ਨੂੰ ਵੀ ਲੁੱਟਿਆ ਹੈ ।
ਪੀੜਤ ਨੇ ਆਪਣੇ ਨਾਲ ਵਾਪਰੀ ਘਟਨਾ ਨੂੰ ਸੋਸ਼ਲ ਮੀਡੀਆ ‘ਤੇ ਸਾਂਝਾ ਕੀਤਾ ਤਾਂ ਇਹ ਜਲਦੀ ਹੀ ਵਾਇਰਲ ਹੋਣ ਲੱਗਿਆ । ਪੋਸਟ ਵਿੱਚ ਪੀੜਤ ਵਿਅਕਤੀ ਨੇ ਲੋਕਾਂ ਨੂੰ ਮਾਸਕ ਲਗਾ ਕੇ ਲੁੱਟ ਕਰਨ ਵਾਲਿਆਂ ਤੋਂ ਸਾਵਧਾਨ ਰਹਿਣ ਦੀ ਅਪੀਲ ਕੀਤੀ ਹੈ ।
