dilip doshi says: ਪਾਕਿਸਤਾਨ ਦੇ ਸਾਬਕਾ ਕਪਤਾਨ ਜਾਵੇਦ ਮਿਆਂਦਾਦ ਆਪਣੇ ਕ੍ਰਿਕਟ ਕੈਰੀਅਰ ਦੌਰਾਨ ਮੈਦਾਨ ਦੇ ਅੰਦਰ ਅਤੇ ਬਾਹਰ ਹਮੇਸ਼ਾ ਸੁਰਖੀਆਂ ਵਿੱਚ ਬਣੇ ਰਹਿੰਦੇ ਸਨ। ਉਨ੍ਹਾਂ ਨੇ ਆਪਣੀਆਂ ਤਿੱਖੀਆਂ ਟਿੱਪਣੀਆਂ ਨਾਲ ਹਮੇਸ਼ਾਂ ਧਿਆਨ ਖਿੱਚਿਆ ਹੈ। ਮਿਆਂਦਾਦ ਨਾਲ ਜੁੜੀ ਅਜਿਹੀ ਹੀ ਇੱਕ ਘਟਨਾ ਦਾ ਖੁਲਾਸਾ ਸਾਬਕਾ ਭਾਰਤੀ ਖੱਬੇ ਹੱਥ ਦੇ ਸਪਿੰਨਰ ਦਿਲੀਪ ਦੋਸ਼ੀ ਨੇ ਕੀਤਾ ਹੈ, ਜਦੋਂ ਬੱਲੇਬਾਜ਼ੀ ਕਰਦੇ ਹੋਏ ਮਿਆਂਦਾਦ ਨੇ ਭਾਰਤੀ ਗੇਂਦਬਾਜ਼ (ਦੋਸ਼ੀ) ਨੂੰ ਪੁੱਛਿਆ ਕਿ ਤੇਰਾ ਕਮਰਾ ਨੰਬਰ ਕੀ ਹੈ? ਮੈਂ ਗੇਂਦ ਨੂੰ ਉਥੇ ਮਾਰਨਾ ਚਾਹੁੰਦਾ ਹਾਂ।’ ਇਹ ਘਟਨਾ 1983 ਦੀ ਹੈ, ਜਦੋਂ ਪਾਕਿਸਤਾਨ ਦੀ ਟੀਮ ਭਾਰਤ ਦੇ ਦੌਰੇ ‘ਤੇ ਸੀ ਅਤੇ ਸੀਰੀਜ਼ ਦਾ ਪਹਿਲਾ ਟੈਸਟ ਮੈਚ ਬੈਂਗਲੁਰੂ ਵਿੱਚ ਖੇਡਿਆ ਜਾ ਰਿਹਾ ਸੀ। ਇੱਕ ਵੀਡੀਓ ਇੰਟਰਵਿਉ ਵਿੱਚ, 72 ਸਾਲਾ ਦਿਲੀਪ ਦੋਸ਼ੀ ਨੇ ਉਸ ਘਟਨਾ ਬਾਰੇ ਭਾਰਤ ਦੇ ਸਾਬਕਾ ਖੱਬੇ ਹੱਥ ਦੇ ਸਪਿੰਨਰ ਮੁਰਲੀ ਕਾਰਤਿਕ ਨੂੰ ਗੱਲਬਾਤ ਦੌਰਾਨ ਦੱਸਿਆ। ਉਨ੍ਹਾਂ ਨੇ ਕਿਹਾ, ‘ਜਾਵੇਦ ਮਿਆਂਦਾਦ ਦਾ ਰਵੱਈਆ ਕਿਸੇ ਤੋਂ ਲੁਕਿਆ ਨਹੀਂ ਸੀ, ਉਹ’ ਸਟ੍ਰੀਟ ਫਾਈਟਰ ‘ਵਾਲਾ ਰਵੱਈਆ ਰੱਖਦਾ ਸੀ। ਹਾਲਾਂਕਿ ਉਹ ਇੱਕ ਮਹਾਨ ਬੱਲੇਬਾਜ਼ ਸੀ। ਮੈਂ ਉਸ ਨੂੰ ਇੱਕ ਵਿਰੋਧੀ ਵਜੋਂ ਸੱਚਮੁੱਚ ਸਤਿਕਾਰਦਾ ਹਾਂ। ‘ ਦੋਸ਼ੀ ਨੇ ਕਿਹਾ, “ਮੈਦਾਨ ਤੋਂ ਬਾਹਰ, ਅਸੀਂ ਦੋਵੇਂ ਚੰਗੇ ਦੋਸਤ ਹੁੰਦੇ ਸੀ, ਪਰ ਮੈਦਾਨ ‘ਤੇ ਉਤਰਨ ਤੋਂ ਬਾਅਦ, ਉਹ ਪੂਰੀ ਤਰ੍ਹਾਂ ਬਦਲਿਆ ਹੋਇਆ ਦਿਖਾਈ ਦਿੰਦਾ ਸੀ।”
ਦੋਸ਼ੀ ਨੇ ਕਿਹਾ, “ਜਦੋਂ ਤੁਸੀਂ ਉਸ ਨੂੰ (ਮਿਆਂਦਾਦ) ਨੂੰ ਸ਼ਾਟ ਖੇਡਣ ਤੋਂ ਰੋਕਦੇ ਸੀ, ਤਾਂ ਉਹ ਪਰੇਸ਼ਾਨ ਹੋ ਜਾਂਦਾ ਅਤੇ ਤੁਹਾਡੀ ਤਾਲ ਨੂੰ ਭੰਗ ਕਰਨ ਲਈ ਤੁਹਾਨੂੰ ਭਟਕਾਉਣ ਦੀ ਕੋਸ਼ਿਸ਼ ਕਰਦਾ, ਜਿਸ ਵਿੱਚ ਉਹ ਕਾਫ਼ੀ ਪੱਕਾ ਸੀ। ਅਜਿਹਾ ਹੀ ਕਿਰਨ ਮੋਰੇ ਨਾਲ ਕੀਤਾ, ਡੈਨਿਸ ਲਿਲੀ ਨਾਲ ਕੀਤਾ ਅਤੇ ਉਸ ਨੇ ਮੇਰੇ ਨਾਲ ਤਾਂ ਕਈ ਵਾਰ ਅਜਿਹਾ ਕੀਤਾ।” ਉਨ੍ਹਾਂ ਨੇ ਕਿਹਾ, “ਉਹ ਮੈਨੂੰ ਭੜਕਾਉਣ ਲਈ ਮੇਰੇ ਸਾਹਮਣੇ ਖੜ੍ਹੇ ਫੀਲਡਰ ਨੂੰ ਕੁੱਝ ਕਹਿੰਦਾ ਸੀ, ਤਾਂ ਜੋ ਮੇਰੇ ਤੱਕ ਗੱਲ ਪਹੁੰਚ ਸਕੇ। ਗੇਂਦ ਸੁੱਟਣ ਤੋਂ ਬਾਅਦ, ਮੈਨੂੰ ਭੜਕਾਉਣ ਦੀ ਕੋਈ ਕੋਸ਼ਿਸ਼ ਨਹੀਂ ਛੱਡਦੇ ਸੀ।” ਦਿਲੀਪ ਦੋਸ਼ੀ ਨੇ ਕਿਹਾ, “ਉਸ ਦਿਨ ਬੰਗਲੁਰੂ ਟੈਸਟ ਦੌਰਾਨ (ਜੋ ਕਿ ਦੋਸ਼ੀ ਦਾ ਆਖਰੀ ਟੈਸਟ ਸੀ), ਮਿਆਂਦਾਦ ਨੇ ਮੈਨੂੰ ਕੁੱਝ ਕਿਹਾ, ਤੇਰਾ ਕਮਰੇ ਦਾ ਨੰਬਰ ਕੀ ਹੈ? ਮੈਂ ਗੇਂਦ ਨੂੰ ਉੱਥੇ ਮਾਰਨਾ ਚਾਹੁੰਦਾ ਹਾਂ। ਉਸ ਤੋਂ ਬਾਅਦ ਇਹ ਇੱਕ ਵੱਡੀ ਚੀਜ਼ ਬਣ ਗਈ, ਇਹ ਇੱਕ ਮਜ਼ਾਕ ਸੀ। ਹਾਲਾਂਕਿ, ਇਸ ਤੋਂ ਬਾਅਦ, ਲੋਕਾਂ ਨੇ ਮਿਰਚ-ਮਸਾਲਾ ਲਗਾ ਕੇ ਇਸ ਘਟਨਾ ਨੂੰ ਫੈਲਾਇਆ।
ਦੋਸ਼ੀ ਨੇ ਕਿਹਾ, “ਉਸ ਮੈਚ ਵਿੱਚ ਮਿਆਂਦਾਦ ਮੇਰੀਆਂ ਗੇਂਦਾਂ ਨਾਲ ਸੰਘਰਸ਼ ਕਰਦਾ ਹੋਇਆ ਦਿਖਾਈ ਦਿੱਤਾ ਸੀ। ਉਹ ਮੈਨੂੰ ਮਾਰਨ ਦੇ ਕਾਬਲ ਨਹੀਂ ਸੀ। ਅੰਤ ਵਿੱਚ ਉਸ ਪਾਰੀ ਵਿੱਚ, ਮਿਆਂਦਾਦ 99 ਦੌੜਾਂ ਬਣਾ ਕੇ ਆਊਟ ਹੋ ਗਿਆ, ਉਹ ਮਦਨ ਲਾਲ ਦੀ ਗੇਂਦ ’ਤੇ ਆਊਟ ਹੋਇਆ। ਸ੍ਰੀਕਾਂਤ ਨੇ ਕੈਚ ਕੀਤਾ। ਸੌਰਾਸ਼ਟਰ ਦੇ ਦਿਲੀਪ ਦੋਸ਼ੀ ਨੇ 33 ਟੈਸਟ ਅਤੇ 15 ਵਨ ਡੇ ਮੈਚਾਂ ਵਿੱਚ ਭਾਰਤ ਦੀ ਨੁਮਾਇੰਦਗੀ ਕੀਤੀ ਅਤੇ ਕ੍ਰਮਵਾਰ 114 ਅਤੇ 22 ਵਿਕਟਾਂ ਲਈਆਂ। ਉਨ੍ਹਾਂ ਨੇ 238 ਪਹਿਲੇ ਦਰਜੇ ਦੇ ਮੈਚਾਂ ਵਿੱਚ 898 ਵਿਕਟਾਂ ਲਈਆਂ। ਦੋਸ਼ੀ ਨੇ ਕਾਊਂਟੀ ਕ੍ਰਿਕਟ ‘ਚ ਲੰਬਾ ਸਮਾਂ ਬਿਤਾਇਆ। ਦਿਲੀਪ ਦੋਸ਼ੀ ਨੇ ਕਾਫ਼ੀ ਸਮੇਂ ਬਾਅਦ ਟੈਸਟ ਕ੍ਰਿਕਟ ‘ਚ ਡੈਬਿਊ ਕੀਤਾ ਸੀ। ਉਹ ਉਨ੍ਹਾਂ ਚਾਰ ਗੇਂਦਬਾਜ਼ਾਂ ਵਿੱਚੋਂ ਇੱਕ ਹੈ ਜਿਨ੍ਹਾਂ ਨੇ 30 ਸਾਲ ਦੀ ਉਮਰ ‘ਚ ਟੈਸਟ ਮੈਚ ਵਿੱਚ ਸ਼ੁਰੂਆਤ ਕਰਨ ਤੋਂ ਬਾਅਦ 100 ਵਿਕਟਾਂ ਦਾ ਅੰਕੜਾ ਛੂਹਿਆ ਸੀ। ਤਿੰਨ ਹੋਰ ਗੇਂਦਬਾਜ਼ ਸਨ-ਕਲੇਰੀ ਗ੍ਰੀਮੈਟ (ਆਸਟ੍ਰੇਲੀਆ), ਸਈਦ ਅਜਮਲ (ਪਾਕਿਸਤਾਨ) ਅਤੇ ਰਿਆਨ ਹੈਰਿਸ (ਆਸਟ੍ਰੇਲੀਆ)।
