KXIP Principal Sponsor in ipl 2020: ਕੋਰੋਨਾ ਵਾਇਰਸ ਦੇ ਕਾਰਨ ਆਈਪੀਐਲ ਦਾ 13 ਵਾਂ ਸੀਜ਼ਨ 19 ਸਿਤੰਬਰ ਤੋਂ ਯੂਏਈ ਵਿੱਚ ਸ਼ੁਰੂ ਹੋਣ ਜਾ ਰਿਹਾ ਹੈ। ਜਿਸਦਾ ਫਾਈਨਲ 10 ਨਵੰਬਰ ਨੂੰ ਹੋਵੇਗਾ। ਸਾਰੀਆਂ 8 ਟੀਮਾਂ ਵਿਚਾਲੇ 53 ਦਿਨਾਂ ਵਿੱਚ ਫਾਈਨਲ ਸਮੇਤ 60 ਮੈਚ ਹੋਣਗੇ। ਹੁਣ IPL ਦੇ 13 ਵੇਂ ਸੀਜ਼ਨ ‘ਚ ਲੁਧਿਆਣਾ ਦੇ ਬ੍ਰਾਂਡ ਏਵਨ ਸਾਈਕਲ ਦਾ ਨਾਮ ਵੀ ਦਿਖਾਈ ਦਵੇਗਾ। ਮਿਲੀ ਜਾਣਕਾਰੀ ਦੇ ਅਨੁਸਾਰ ਲੁਧਿਆਣਾ ਦੀ ਏਵਨ ਸਾਈਕਲ ਕਿੰਗਜ਼ ਇਲੈਵਨ ਪੰਜਾਬ ਦੀ ਪ੍ਰਿੰਸੀਪਲ ਸਪਾਂਸਰ ਦੇ ਨਾਲ-ਨਾਲ ਅਧਿਕਾਰਤ ਪਾਰਟਨਰ ਵੀ ਹੋਵੇਗੀ। ਪੰਜਾਬ ਦੀ ਟੀਮ ਗਰਾਊਂਡ ‘ਚ ਏਵਨ ਦੇ ਸਾਈਕਲ ਵੀ ਚਲਾਏਗੀ। ਕਿੰਗਜ਼ ਇਲੈਵਨ ਪੰਜਾਬ ਦੀ ਟੀਮ ‘ਚ ਸ਼ਾਮਿਲ ਖਿਡਾਰੀਆਂ ਦੀ ਗੱਲ ਕਰੀਏ ਤਾਂ ਸਾਰਿਆਂ ਦਾ ਧਿਆਨ 2019 ਅੰਡਰ-19 ਵਿਸ਼ਵ ਕੱਪ ‘ਚ ਕਮਾਲ ਦਾ ਪ੍ਰਦਰਸ਼ਨ ਕਰਨ ਵਾਲੇ ਲੈੱਗ ਸਪਿੱਨਰ ਰਵੀ ਬਿਸ਼ਨੋਈ ‘ਤੇ ਹੋਵੇਗਾ। ਇਸ ਤੋਂ ਇਲਾਵਾ ਬੰਗਾਲ ਦੇ ਈਸ਼ਾਨ ਪੋਰੇਲ ਤੋਂ ਵੀ ਉਮੀਦਾਂ ਹੋਣਗੀਆਂ, ਜਿਨ੍ਹਾਂ ਨੇ ਘਰੇਲੂ ਕ੍ਰਿਕਟ ‘ਚ ਦਮਦਾਰ ਪ੍ਰਦਰਸ਼ਨ ਕੀਤਾ ਸੀ।
ਕਿੰਗਜ਼ ਇਲੈਵਨ ਪੰਜਾਬ ਦੀ ਨਜ਼ਰ ਇੰਡੀਅਨ ਪ੍ਰੀਮੀਅਰ ਲੀਗ ਦੇ 13 ਵੇਂ ਸੀਜ਼ਨ ਵਿੱਚ ਪਹਿਲੀ ਵਾਰ ਖਿਤਾਬ ਜਿੱਤਣ ‘ਤੇ ਹੈ। ਅਨਿਲ ਕੁੰਬਲੇ ਕਿੰਗਜ਼ ਇਲੈਵਨ ਪੰਜਾਬ ਦੀ ਕੋਚਿੰਗ ਸੰਭਾਲ ਰਹੇ ਹਨ, ਜਦਕਿ ਕੇਐਲ ਰਾਹੁਲ ਦੇ ਸ਼ਾਨਦਾਰ ਫਾਰਮ ਨੂੰ ਦੇਖਦਿਆਂ ਕਪਤਾਨੀ ਦੀ ਜ਼ਿੰਮੇਵਾਰੀ ਦਿੱਤੀ ਗਈ ਹੈ। ਟੀਮ ‘ਚ ਗੇਲ, ਕੇਐਲ ਰਾਹੁਲ, ਮਨਦੀਪ ਸਿੰਘ, ਗਲੇਨ ਮੈਕਸਵੈਲ, ਕ੍ਰਿਸ ਜੌਰਡਨ, ਜਿੰਮੀ ਨੀਸ਼ਮ, ਨਿਕੋਲਸ ਪੂਰਨ, ਮੁਜੀਬ ਜ਼ਦਰਾਨ, ਹਰਦਾਸ ਵਿਲਜੋਨ ਅਤੇ ਸਾਢੇ ਅੱਠ ਕਰੋੜ ਦੀ ਬੋਲੀ ਨਾਲ ਟੀਮ ਵਿੱਚ ਸ਼ਾਮਿਲ ਹੋਏ ਸ਼ੈਲਡਨ ਕੋਟਰੇਲ ਵਰਗੇ ਤਜਰਬੇਕਾਰ ਖਿਡਾਰੀ ਹਨ।
