Sumit Nagal in the quarterfinals: ਭਾਰਤ ਦੇ ਸਿੰਗਲਜ਼ ਦੇ ਚੋਟੀ ਦੇ ਖਿਡਾਰੀ ਸੁਮਿਤ ਨਾਗਲ ਨੇ ਪ੍ਰਾਗ ਓਪਨ ਟੈਨਿਸ ਟੂਰਨਾਮੈਂਟ ਦੇ ਕੁਆਰਟਰ ਫਾਈਨਲ ਵਿੱਚ ਜਗ੍ਹਾ ਬਣਾ ਲਈ ਹੈ। ਸੁਮਿਤ ਨੇ ਪਹਿਲਾ ਸੈੱਟ ਗੁਆਉਣ ਤੋਂ ਬਾਅਦ ਸ਼ਾਨਦਾਰ ਵਾਪਸੀ ਕੀਤੀ ਅਤੇ ਸਥਾਨਕ ਖਿਡਾਰੀ ਜਿਰੀ ਲੇਹੇਕਾ ਨੂੰ ਹਰਾਇਆ। ਦੁਨੀਆ ਦੇ 127 ਨੰਬਰ ਦੇ ਅਤੇ ਛੇਵਾਂ ਦਰਜਾ ਪ੍ਰਾਪਤ ਨਾਗਾਲ ਨੇ 137,560 ਯੂਰੋ ਇਨਾਮ ਦੇ ਕਲੇਅਰਕੋਰਟ ਟੂਰਨਾਮੈਂਟ ਦੇ ਦੂਜੇ ਗੇੜ ਵਿੱਚ ਦੋ ਘੰਟੇ 21 ਮਿੰਟ ਤੱਕ ਚੱਲੇ ਮੈਚ ਵਿੱਚ 5-7, 7-6 (4), 6-3 ਨਾਲ ਜਿੱਤ ਪ੍ਰਾਪਤ ਕੀਤੀ ਹੈ।
ਨਾਗਲ ਦਾ ਸਾਹਮਣਾ ਅਗਲੇ ਗੇੜ ਵਿੱਚ ਵੀਰਵਾਰ ਨੂੰ ਤਿੰਨ ਵਾਰ ਦੇ ਗ੍ਰੈਂਡ ਸਲੈਮ ਜੇਤੂ ਸਟੈਨ ਵਾਵਰਿੰਕਾ ਨਾਲ ਹੋਵੇਗਾ। ਸਵਿੱਟਜਰਲੈਂਡ ਦੇ ਖਿਡਾਰੀ ਨੇ ਦੂਜੇ ਗੇੜ ਵਿੱਚ ਜਰਮਨੀ ਦੇ ਆਸਕਰ ਓਟੇ ਨੂੰ 3-6, 7-5, 6-1 ਨਾਲ ਹਰਾਇਆ। ਨਾਗਲ ਟੂਰਨਾਮੈਂਟ ਦੇ ਡਬਲਜ਼ ‘ਚ ਵੀ ਹਿੱਸਾ ਲੈ ਰਿਹਾ ਹੈ। ਉਨ੍ਹਾਂ ਤੋਂ ਇਲਾਵਾ ਦਿਵਿਜ ਸ਼ਰਨ ਅਤੇ ਐਨ ਸ਼੍ਰੀਰਾਮ ਬਾਲਾਜੀ ਵੀ ਡਬਲਜ਼ ਵਿੱਚ ਹਿੱਸਾ ਲੈ ਰਹੇ ਹਨ।
