ਤੇਲੰਗਾਨਾ ਸਰਕਾਰ ਨੇ ਨਾਬਾਲਗ ਮੁਸਲਿਮ ਲੜਕੀਆਂ ਦੇ ਵਿਆਹ ਕਰਵਾਉਣ ਵਾਲੇ ਕਾਜ਼ੀਆਂ ਵਿਰੁੱਧ ਸਖ਼ਤ ਕਾਰਵਾਈ ਕਰਨ ਦਾ ਫੈਸਲਾ ਕੀਤਾ ਹੈ। ਸਰਕਾਰ ਦੀ ਤਰਫੋਂ, ਵਕਫ ਬੋਰਡ ਨੂੰ ਵੀ ਸਾਰੇ ਵਿਆਹਾਂ ਦੇ ਵੇਰਵੇ ਆਨਲਾਈਨ ਦਰਜ ਕਰਨ ਦੇ ਨਿਰਦੇਸ਼ ਦਿੱਤੇ ਗਏ ਹਨ। ਕਾਜ਼ੀਆਂ ਨੂੰ ਇਹ ਪਛਾਣ ਕਰਨ ਲਈ ਕਿਹਾ ਜਾ ਰਿਹਾ ਹੈ ਕਿ ਲਾੜਾ-ਲਾੜੀ ਬਾਲਗ ਹਨ ਜਾਂ ਨਹੀਂ। ਜੇ ਲਾੜਾ-ਲਾੜੀ ਬਾਲਗ ਹਨ ਤਾਂ ਹੀ ਨਿਕਾਹ ਪੜ੍ਹਾਓ।
ਸਰਕਾਰ ਨੇ ਇਹ ਫੈਸਲਾ ਨਾਬਾਲਗ ਲੜਕੀਆਂ ਦੇ ਅਰਬ ਦੇ ਮਰਦਾਂ ਨਾਲ ਵਿਆਹ ਕਰਵਾਉਣ ਦੀਆਂ ਸ਼ਿਕਾਇਤਾਂ ਮਿਲਣ ਤੋਂ ਬਾਅਦ ਲਿਆ ਹੈ। ਸਰਕਾਰ ਵੱਲੋਂ ਬਾਲ ਵਿਆਹ ਦੀ ਰੋਕਥਾਮ ਨੂੰ ਯਕੀਨੀ ਬਣਾਉਣ ਲਈ ਵਿਆਹ ਲਈ ਲਾੜਾ-ਲਾੜੀ ਦਾ ਆਧਾਰ ਕਾਰਡ ਲਾਜ਼ਮੀ ਕਰ ਦਿੱਤਾ ਗਿਆ ਹੈ ਅਤੇ ਕਿਸੇ ਹੋਰ ਸ਼ਨਾਖਤੀ ਕਾਰਡ ਦੇ ਆਧਾਰ ‘ਤੇ ਵਿਆਹ ਕਰਵਾਉਣ ‘ਤੇ ਪਾਬੰਦੀ ਲਗਾ ਦਿੱਤੀ ਗਈ ਹੈ। ਖਾਸ ਤੌਰ ‘ਤੇ ਕਾਜ਼ੀਆਂ ਨੂੰ ਆਧਾਰ ਕਾਰਡ ਦੇ ਆਧਾਰ ‘ਤੇ ਇਹ ਪਛਾਣ ਕਰਨ ਲਈ ਕਿਹਾ ਗਿਆ ਹੈ ਕਿ ਲਾੜਾ-ਲਾੜੀ ਬਾਲਗ ਹਨ ਜਾਂ ਨਹੀਂ।
ਮੁਸਲਿਮ ਲੜਕੀਆਂ ਨੂੰ ਨਿਰਦੇਸ਼ ਦਿੱਤਾ ਗਿਆ ਹੈ ਕਿ ਉਹ ਨਿਕਾਹ ਤੋਂ ਤੁਰੰਤ ਬਾਅਦ ਵਕਫ਼ ਬੋਰਡ ਨੂੰ ਵਿਆਹ ਦੇ ਵੇਰਵੇ ਜਮ੍ਹਾਂ ਕਰਾਉਣ, ਅਜਿਹਾ ਨਾ ਕਰਨ ‘ਤੇ ਕਾਜ਼ੀਆਂ ਅਤੇ ਇਸ ਵਿਚ ਸ਼ਾਮਲ ਹੋਰ ਲੋਕਾਂ ਵਿਰੁੱਧ ਕਾਨੂੰਨੀ ਕਾਰਵਾਈ ਕੀਤੀ ਜਾ ਸਕਦੀ ਹੈ। ਇੰਨਾ ਹੀ ਨਹੀਂ ਸਰਕਾਰ ਨੇ ਕਾਜ਼ੀਆਂ ਦੀ ਨਿਯੁਕਤੀ ਨੂੰ ਲੈ ਕੇ ਵੀ ਬਦਲਾਅ ਕੀਤਾ ਹੈ। ਪਹਿਲਾਂ ਕਾਜ਼ੀਆਂ ਦੀ ਨਿਯੁਕਤੀ ਘੱਟ ਗਿਣਤੀ ਭਲਾਈ ਵਿਭਾਗ ਵੱਲੋਂ ਕੀਤੀ ਜਾਂਦੀ ਸੀ ਪਰ ਹੁਣ ਇਸ ਵਿੱਚ ਮਾਮੂਲੀ ਤਬਦੀਲੀ ਕੀਤੀ ਗਈ ਹੈ। ਹੁਣ ਜ਼ਿਲ੍ਹਾ ਕੁਲੈਕਟਰ ਅਰਜ਼ੀ ਦੀ ਸਮੀਖਿਆ ਕਰਨਗੇ ਅਤੇ ਵਿਭਾਗ ਨੂੰ ਆਪਣੀ ਸਿਫ਼ਾਰਸ਼ ਸੌਂਪਣਗੇ।
ਸਰਕਾਰ ਵੱਲੋਂ ਮੈਰਿਜ ਸਰਟੀਫਿਕੇਟ ਆਨਲਾਈਨ ਉਪਲਬਧ ਕਰਵਾਉਣ ਦੇ ਆਦੇਸ਼ ਵੀ ਜਾਰੀ ਕੀਤੇ ਗਏ ਹਨ। ਹੁਣ ਤੱਕ ਵਿਆਹ ਦੇ ਸਾਰੇ ਮਾਮਲੇ ਲਿਖਤੀ ਰੂਪ ਵਿੱਚ ਕੀਤੇ ਜਾਂਦੇ ਹਨ। ਜੇ ਰਾਜ ਵਿੱਚ ਕਿਤੇ ਵੀ ਵਿਆਹ ਹੁੰਦਾ ਹੈ, ਤਾਂ ਉਸਦਾ ਸਰਟੀਫਿਕੇਟ ਲੈਣ ਲਈ ਹੈਦਰਾਬਾਦ ਦੇ ਹੱਜ ਹਾਊਸ ਨਾਲ ਸੰਪਰਕ ਕਰਨਾ ਪੈਂਦਾ ਹੈ। ਹਾਲਾਂਕਿ ਹੁਣ ਜਦੋਂ ਮੈਰਿਜ ਸਰਟੀਫਿਕੇਟ ਆਨਲਾਈਨ ਉਪਲਬਧ ਹੋਣਗੇ ਤਾਂ ਲਾੜਾ-ਲਾੜੀ ਨੂੰ ਵੀ ਫਾਇਦਾ ਹੋਵੇਗਾ।
ਵਕਫ ਬੋਰਡ ਦੇ ਚੇਅਰਮੈਨ ਮੁਹੰਮਦ ਮਸੀਹਉੱਲ੍ਹਾ ਖਾਨ ਨੇ ਕਿਹਾ ਹੈ ਕਿ ਹੁਣ ਤੇਲੰਗਾਨਾ ਦੇਸ਼ ਦਾ ਇਕਲੌਤਾ ਰਾਜ ਹੈ ਜਿਥੇ ਮੁਸਲਿਮ ਵਿਆਹ ਦੇ ਸਾਰੇ ਵੇਰਵੇ ਆਨਲਾਈਨ ਰਜਿਸਟਰ ਕੀਤੇ ਜਾਣਗੇ। ਪਿਛਲੇ ਵਿਆਹਾਂ ਤੋਂ ਇਲਾਵਾ ਮੌਜੂਦਾ ਸਾਰੇ ਵਿਆਹਾਂ ਦਾ ਵੇਰਵਾ ਵਕਫ਼ ਬੋਰਡ ਕੋਲ ਹੋਵੇਗਾ। ਕਾਨੂੰਨੀ ਮਾਹਿਰਾਂ ਦਾ ਕਹਿਣਾ ਹੈ ਕਿ ਇਸ ਨਾਲ ਜਾਅਲਸਾਜ਼ੀ ਨੂੰ ਰੋਕਣ ਵਿਚ ਕਾਫੀ ਮਦਦ ਮਿਲੇਗੀ।
