ਪ੍ਰੀਤੀ ਗਾਂਧੀ ਵੱਲੋਂ ਅਦਾਕਾਰਾ ਦਾ ਹੱਥ ਫੜੇ ਰਾਹੁਲ ਦੀ ਫੋਟੋ ਸ਼ੇਅਰ, ਭੜਕੇ ਲੋਕ ਬੋਲੇ- ‘ਇੰਨੀ ਘਟੀਆ ਸੋਚ’

ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਅਤੇ ਕੇਰਲ ਦੇ ਵਾਇਨਾਡ ਤੋਂ ਸੰਸਦ ਮੈਂਬਰ ਰਾਹੁਲ ਗਾਂਧੀ ਦੀ ਭਾਰਤ ਜੋੜੋ ਯਾਤਰਾ ਤੇਲੰਗਾਨਾ ਤੋਂ ਹੋ ਕੇ ਲੰਘ ਰਹੀ ਹੈ। ਇਸ ਦੌਰਾਨ ਰਾਹੁਲ ਕਈ ਲੋਕਾਂ ਨਾਲ ਮੁਲਾਕਾਤ ਵੀ ਕਰ ਰਹੇ ਹਨ। ਇਸ ਮੁਲਾਕਾਤ ‘ਚ ਰਾਹੁਲ ਗਾਂਧੀ ਦੀ ਅਜਿਹੀ ਤਸਵੀਰ ਸਾਹਮਣੇ ਆਈ ਸੀ, ਜੋ ਸੋਸ਼ਲ ਮੀਡੀਆ ‘ਤੇ ਚਰਚਾ ਦਾ ਵਿਸ਼ਾ ਬਣ ਗਈ।

ਦਰਅਸਲ ਰਾਹੁਲ ਗਾਂਧੀ ਅਦਾਕਾਰਾ ਅਤੇ ਕਾਰਕੁਨ ਪੂਨਮ ਕੌਰ ਨਾਲ ਇੱਕ ਤਸਵੀਰ ਵਿੱਚ ਨਜ਼ਰ ਆਏ। ਇਸ ਦੌਰਾਨ ਉਨ੍ਹਾਂ ਨੇ ਪੂਨਮ ਦਾ ਹੱਥ ਵੀ ਫੜ ਲਿਆ। ਭਾਜਪਾ ਦੀ ਪ੍ਰੀਤੀ ਗਾਂਧੀ ਵੱਲੋਂ ਟਵਿੱਟਰ ‘ਤੇ ਇਹ ਤਸਵੀਰ ਪੋਸਟ ਕਰਨ ਤੋਂ ਬਾਅਦ ਮਾਈਕ੍ਰੋ ਬਲੌਗਿੰਗ ਸਾਈਟ ‘ਤੇ ਉਬਾਲ ਜਿਹਾ ਮਚ ਗਿਆ। ਉਨ੍ਹਾਂ ਨੇ ਤਸਵੀਰ ਦੇ ਨਾਲ ਕੈਪਸ਼ਨ ਲਿਖਿਆ, ਜਿਸ ‘ਤੇ ਪੂਨਮ ਸਮੇਤ ਸਾਰੇ ਨੇਤਾਵਾਂ ਨੇ ਇਤਰਾਜ਼ ਜਤਾਇਆ।

ਰਾਹੁਲ ਗਾਂਧੀ ਅਤੇ ਪੂਨਮ ਕੌਰ ਦੀ ਤਸਵੀਰ ਸ਼ੇਅਰ ਕਰਦੇ ਹੋਏ ਪ੍ਰੀਤੀ ਗਾਂਧੀ ਨੇ ਲਿਖਿਆ, ”ਆਪਣੇ ਪੜਦਾਦਾ ਜੀ ਦੇ ਨਕਸ਼ੇ ਕਦਮਾਂ ‘ਤੇ ਚੱਲਦੇ ਹੋਏ।” ਇਸ ਤਰ੍ਹਾਂ ਦੀ ਕੈਪਸ਼ਨ ਲਿਖਣ ਤੋਂ ਬਾਅਦ ਜਿੱਥੇ ਕਈ ਕਾਂਗਰਸੀ ਨੇਤਾਵਾਂ ਨੇ ਪ੍ਰੀਤੀ ‘ਤੇ ਹਮਲਾ ਬੋਲਿਆ, ਉਥੇ ਪੂਨਮ ਕੌਰ ਨੇ ਕਿਹਾ, ”ਇਹ ਬੇਇੱਜ਼ਤੀ ਕਰਨ ਵਰਗਾ ਹੈ। ਯਾਦ ਰਹੇ ਪ੍ਰਧਾਨ ਮੰਤਰੀ ਨੇ ਨਾਰੀ ਸ਼ਕਤੀ ਦੀ ਗੱਲ ਕੀਤੀ ਸੀ। ਮੈਂ ਲਗਭਗ ਫਿਸਲ ਗਈ ਸੀ ਅਤੇ ਡਿੱਗਣ ਹੀ ਵਾਲੀ ਸੀ ਜਦੋਂ ਸਰ ਨੇ ਮੇਰਾ ਹੱਥ ਫੜ ਲਿਆ।”

ਉਨ੍ਹਾਂ ਨੇ ਤੇਲੰਗਾਨਾ ਕਾਂਗਰਸ ਵੱਲੋਂ ਸ਼ੇਅਰ ਕੀਤੀ ਗਈ ਇਸੇ ਫੋਟੋ ‘ਤੇ ਰਾਹੁਲ ਗਾਂਧੀ ਦੀ ਤਾਰੀਫ ਕਰਦੇ ਹੋਏ ਕਿਹਾ ਕਿ ਮਹਿਲਾ ਪ੍ਰਤੀ ਉਨ੍ਹਾਂ ਦੀ ਚਿੰਤਾ, ਸਨਮਾਨ ਅਤੇ ਸੁਰੱਖਿਆਤਮਕ ਸੁਭਾਅ ਕੁਝ ਅਜਿਹਾ ਹੈ ਜੋ ਮੇਰੇ ਦਿਲ ਨੂੰ ਛੂਹ ਗਿਆ। ਮੈਂ ਬੁਣਕਰਾਂ ਦੀ ਟੀਮ ਦੇ ਨਾਲ ਰਾਹੁਲ ਗਾਂਧੀ ਨੂੰ ਬੁਣਕਰ ਮੁੱਦਿਆਂ ਨੂੰ ਸੁਣਨ ਲਈ ਦਿਲੋਂ ਧੰਨਵਾਦ ਦਿੰਦੀ ਹਾਂ।

ਇਹ ਵੀ ਪੜ੍ਹੋ : ਫੌਜਾ ਸਿੰਘ ਸਰਾਰੀ ਦੇ ਡੇਰਾ ਸੱਚਾ ਸੌਦਾ ਜਾਣ ‘ਤੇ ਹੰਗਾਮਾ, ਮੰਤਰੀ ਨੇ ਦਿੱਤੀ ਸਫ਼ਾਈ

ਪ੍ਰੀਤੀ ਗਾਂਧੀ ਵੱਲੋਂ ਤਸਵੀਰ ਸ਼ੇਅਰ ਕੀਤੇ ਜਾਣ ਤੋਂ ਬਾਅਦ ਟਵਿੱਟਰ ‘ਤੇ ਵੱਡੀ ਗਿਣਤੀ ‘ਚ ਯੂਜ਼ਰਸ ਨੂੰ ਨਿਸ਼ਾਨਾ ਬਣਾਇਆ ਗਿਆ। ਉਸ ਨੇ ਇਸ ਨੂੰ ਇਤਰਾਜ਼ਯੋਗ ਦੱਸਿਆ। ਪ੍ਰੀਤੀ ਦੇ ਇਸ ਪੋਸਟ ‘ਤੇ ਕਾਂਗਰਸ ਨੇਤਾ ਅਭਿਸ਼ੇਕ ਦੱਤ ਨੇ ਕਿਹਾ ਕਿ ਮੈਨੂੰ ਤੁਹਾਡੇ ਪਤੀ ਅਤੇ ਬੱਚਿਆਂ ਲਈ ਬੁਰਾ ਲੱਗਦਾ ਹੈ। ਤੁਹਾਡੀ ਮਾੜੀ ਮਾਨਸਿਕਤਾ ਕਾਰਨ ਗਰੀਬ ਆਦਮੀ ਸ਼ਰਮਿੰਦਾ ਹੋ ਰਿਹਾ ਹੋਵੇਗਾ। ਇਸ ਦੇ ਨਾਲ ਹੀ ਕਾਂਗਰਸ ਵਿਧਾਇਕ ਦੀਪਿਕਾ ਪਾਂਡੇ ਨੇ ਕਿਹਾ, ”ਮਹਿਲਾ ਹੋਣ ਦੇ ਨਾਤੇ ਅਜਿਹੀ ਘਟੀਆ ਸੋਚ। ਇਹ ਤਾਂ ਭਾਜਪਾ ਵਿੱਚ ਹੀ ਸਿਖਾਇਆ ਜਾਂਦਾ ਹੈ। ਘੱਟੋ-ਘੱਟ ਉਹ ਆਪਣੇ ਪੁਰਖਿਆਂ ਦੇ ਨਕਸ਼ੇ-ਕਦਮਾਂ ‘ਤੇ ਚੱਲ ਕੇ ਭਾਰਤ ਨੂੰ ਇਕਜੁੱਟ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ। ਪਰ ਤੁਹਾਡੀ ਪਾਰਟੀ ਦੇ ਕਈ ਸੰਸਦ ਮੈਂਬਰਾਂ ਅਤੇ ਵਿਧਾਇਕਾਂ ਖਿਲਾਫ ਬਲਾਤਕਾਰ ਅਤੇ ਤਸ਼ੱਦਦ ਦੇ ਮਾਮਲੇ ਦਰਜ ਹਨ। ਦੱਸੋ ਸਾਰਿਆਂ ਦਾ ਨਾਂ ਲਿਖਦਾ ਹਾਂ।” ਪ੍ਰੀਤੀ ਗਾਂਧੀ ਦਾ ਇਹ ਟਵੀਟ ਕੁਝ ਹੀ ਸਮੇਂ ‘ਚ ਵਾਇਰਲ ਹੋ ਗਿਆ, ਜਿਸ ‘ਚ ਜ਼ਿਆਦਾਤਰ ਯੂਜ਼ਰਸ ਉਸ ਨੂੰ ਨਿਸ਼ਾਨਾ ਬਣਾ ਰਹੇ ਹਨ। ਉੱਤਰ ਪ੍ਰਦੇਸ਼ ਕਾਂਗਰਸ ਸੇਵਾ ਦਲ ਨੇ ਟਵੀਟ ਕੀਤਾ ਕਿ ਮਹਿਲਾ ਵਿਰੋਧੀ ਸੋਚ ਸੰਘੀਆਂ ਦੀ ਰਿਵਾਇਤ ਹੈ।

ਕੌਣ ਹੈ ਪੂਨਮ ਕੌਰ
ਦੱਸ ਦੇਈਏ ਕਿ ਅਦਾਕਾਰਾ ਪੂਨਮ ਦਾ ਜਨਮ ਹੈਦਰਾਬਾਦ ਵਿੱਚ ਹੋਇਆ ਅਤੇ ਫਿਰ ਉੱਥੇ ਹੀ ਵੱਡੀ ਹੋਈ। ਇਸ ਤੋਂ ਬਾਅਦ ਉਸ ਨੇ ਹੈਦਰਾਬਾਦ ਪਬਲਿਕ ਸਕੂਲ ਤੋਂ ਪੜ੍ਹਾਈ ਕੀਤੀ। ਉਸ ਨੇ ਨੈਸ਼ਨਲ ਇੰਸਟੀਚਿਊਟ ਆਫ ਫੈਸ਼ਨ ਟੈਕਨਾਲੋਜੀ (NIFT), ਦਿੱਲੀ ਤੋਂ ਫੈਸ਼ਨ ਡਿਜ਼ਾਈਨਿੰਗ ਦਾ ਕੋਰਸ ਕੀਤਾ ਹੈ। 2006 ਵਿੱਚ ਆਪਣੀ ਪੜ੍ਹਾਈ ਤੋਂ ਬਾਅਦ ਉਹ ਫਿਲਮਾਂ ਵੱਲ ਮੁੜੀ। ਪੂਨਮ ਕੌਰ ਤੇਲਗੂ ਫਿਲਮ ‘ਮਾਯਾਜਲਮ’ ਵਿੱਚ ਨਜ਼ਰ ਆ ਚੁੱਕੀ ਹੈ। ਇਸ ਤੋਂ ਇਲਾਵਾ ‘ਨਿੱਕੀ’ ਅਤੇ ‘ਨੀਰਜ’ ਆਦਿ ‘ਚ ਵੀ ਨਜ਼ਰ ਆ ਚੁੱਕੀ ਹੈ। ਉਸਨੂੰ ਸਾਲ 2008 ਵਿੱਚ ਸਰਵੋਤਮ ਸਹਾਇਕ ਅਭਿਨੇਤਰੀ ਦਾ ਪੁਰਸਕਾਰ ਵੀ ਮਿਲ ਚੁੱਕਾ ਹੈ।

ਵੀਡੀਓ ਲਈ ਕਲਿੱਕ ਕਰੋ -:

“ਮੂਸੇਵਾਲਾ ਦੀ ਮੌਤ ਤੇ ਰੋਇਆ ਸੀ ਪੂਰਾ ਕਸ਼ਮੀਰ ! ਇਹਨਾਂ ਦੇ ਦਿਲਾਂ ‘ਚ ਪੰਜਾਬੀਆਂ ਪ੍ਰਤੀ ਪਿਆਰ ਦੇਖ ਹੋ ਜਾਓਂਗੇ ਹੈਰਾਨ ! “