Threats made on social media : ਗੈਂਗਸਟਰ ਦਵਿੰਦਰ ਬੰਬੀਹਾ ਗਰੁੱਪ ਵੱਲੋਂ ਫੇਸਬੁੱਕ ’ਤੇ ਪੋਸਟ ਪਾ ਕੇ ਲਾਰੈਂਸ ਬਿਸ਼ਨੋਈ ਦੇ ਨੇੜਲੇ ਸੋਪੂ ਆਗੂ ਗੁਰਲਾਲ ਬਰਾੜ ਦੇ ਕਤਲ ਦੀ ਜ਼ਿੰਮੇਵਾਰੀ ਲੈਣ ਤੋਂ ਬਾਅਦ ਦੂਜੇ ਗੈਂਗਸ ਵੀ ਸੋਸ਼ਲ ਮੀਡੀਆ ‘ਤੇ ਸਰਗਰਮ ਹੋ ਗਏ ਹਨ ਅਤੇ ਇਸ ਕਤਲ ਦਾ ਬਦਲਾ ਲੈਣ ਦੀ ਧਮਕੀ ਦਿੱਤੀ ਹੈ। ਅਜਿਹੀ ਸਥਿਤੀ ਵਿੱਚ ਚੰਡੀਗੜ੍ਹ ਸਮੇਤ ਟਰਾਈਸਿਟੀ ਵਿੱਚ ਇੱਕ ਵਾਰ ਫਿਰ ਵੱਡੀ ਵਾਰਦਾਤ ਦੀ ਸੰਭਾਵਨਾ ਵੱਧ ਗਈ ਹੈ। ਇਨ੍ਹਾਂ ਗੈਂਗਸਟਰਾਂ ਦੀ ਗੈਂਗਵਾਰ ਨੂੰ ਰੋਕਣ ਦੀ ਚੁਣੌਤੀ ਹੁਣ ਚੰਡੀਗੜ੍ਹ ਪੁਲਿਸ ਦੇ ਸਾਹਮਣੇ ਹੈ।
ਸੋਮਵਾਰ ਨੂੰ ਗੈਂਗਸਟਰ ਲਾਰੈਂਸ ਬਿਸ਼ਨੋਈ ਦੇ ਨਾਂ ’ਤੇ ਚੱਲ ਰਹੇ ਫੇਸਬੁੱਕ ਪ੍ਰੋਫਾਈਲ ਤੋਂ ਮ੍ਰਿਤਕ ਸੋਪੂ ਨੇਤਾ ਗੁਰਲਾਲ ਬਰਾੜ ਦੀ ਫੋਟੋ ਅਪਲੋਡ ਕਰਕੇ ਇੱਕ ਪੋਸਟ ਪਾਈ ਗਈ। ਇਸ ਵਿਚ ਕਿਹਾ ਗਿਆ ਸੀ ਕਿ ‘ਇਹ ਸਮਾਂ ਦੱਸੇਗਾ ਕਿ ਮੈਂ ਕਿੰਨਾ ਨੇੜੇ ਸੀ ਮੇਰੇ’, ਜਦੋਂਕਿ ਲਾਰੈਂਸ ਦੇ ਦੂਜੇ ਫੇਸਬੁੱਕ ਪ੍ਰੋਫਾਈਲ ਤੋਂ ਇਕ ਪੋਸਟ ਲਿਖੀ ਗਈ ਸੀ ਕਿ ‘ਨਵੀਂ ਲੜਾਈ ਸ਼ੁਰੂ ਹੋ ਰਹੀ ਹੈ ਜੋ ਸਾਡੇ ਨਾਲ ਨਹੀਂ ਹੈ, ਹੁਣ ਤੋਂ ਆਪਣਾ ਸਾਰਾ ਧਿਆਨ ਰੱਖ ਲਓ, ਹੁਣ ਇਸ ਲੜਾਈ ਵਿਚ ਕੋਈ ਸੁਰੱਖਿਅਤ ਨਹੀਂ, ਕੋਈ ਜਾਇਜ਼ ਹੋਵੇ ਜਾਂ ਨਹੀਂ ਅੱਜ ਤੋਂ ਸੜਕਾਂ ‘ਤੇ ਖੂਨ ਨਹੀਂ ਸੁੱਕੇਗਾ। ਜੰਗ ਦੇ ਨਿਯਮ ਬਦਲ ਚੁੱਕੇ ਹਨ, ਨਵੇਂ ਨਿਯਮ ਦੀ ਪਾਲਣਾ ਕਰਦੇ ਹੋਏ ਜੋਵੀ ਜਿਥੇ ਮਿਲਿਆ ਬਸ…’ ਲਗਾਤਾਰ ਅਪਡੇਟਾਂ ਤੋਂ ਬਾਅਦ, ਗੈਂਗਸਟਰ ਲਾਰੈਂਸ ਬਿਸ਼ਨੋਈ ਦੇ ਸ਼ੂਟਰ ਭੋਲਾ ਨੇ ਆਪਣੇ ਫੇਸਬੁੱਕ ਪ੍ਰੋਫਾਈਲ ‘ਤੇ ਲਿਖਿਆ ਹੈ’ ’ਇਹ ਜਿਹੜੀ ਬਾਜ਼ੀ ਚੜ੍ਹਾਈ ਹੈ ਬਹੁਤ ਛੇਤੀ ਵਿਆਜ ਸਣੇ ਮੋੜਾਂਗੇ।’ ਲਗਾਤਾਰ ਹੋ ਰਹੇ ਸੋਸ਼ਲ ਮੀਡੀਆ ‘ਤੇ ਲਗਾਤਾਰ ਹੋਏ ਗੈਂਗਵਾਰ ਤੋਂ ਬਾਅਦ ਹੁਣ ਇਸ ਨੇ ਚੰਡੀਗੜ੍ਹ ਪੁਲਿਸ ਦਾ ਸਿਰਦਰਦੀ ਵੀ ਵਧਾ ਦਿੱਤਾ ਹੈ।
ਦੱਸਣਯੋਗ ਹੈ ਕਿ ਬੀਤੇ ਸ਼ਨੀਵਾਰ ਰਾਤ ਨੂੰ ਗੁਰਲਾਲ ਬਰਾੜ ਦਾ ਗੋਲੀਆਂ ਮਾਰ ਕੇ ਇੰਡਸਟਰੀਅਲ ਏਰੀਆ ਫੇਸ-1 ਵਿੱਚ ਕਤਲ ਕਰ ਦਿੱਤਾ ਗਿਆ ਸੀ। ਇਸ ਕਤਲ ਤੋਂ ਪੰਜ ਘੰਟੇ ਬਾਅਦ ਗੈਂਗਸਟਰ ਦਵਿੰਦਰ ਬੰਬੀਹਾ ਗਰੁੱਪ ਨੇ ਫੇਸਬੁੱਕ ‘ਤੇ ਇਕ ਪੋਸਟ ਪਾ ਕੇ ਇਸ ਦੀ ਜ਼ਿੰਮੇਵਾਰੀ ਲਈ ਅਤੇ ਕਿਹਾ ਕਿ ਲਵੀ ਦਿਓੜਾ ਕੋਟਕਪੂਰਾ ਦੇ ਕਤਲ ਦੇ ਤਿੰਨ ਸਾਲਾਂ ਬਾਅਦ ਬਦਲਾ ਲਿਆ ਗਿਆ ਹੈ। ਤੁਹਾਨੂੰ ਦੱਸ ਦਈਏ ਕਿ ਦਵਿੰਦਰ ਬੰਬੀਹਾ ਦਾ ਸਾਲ 2016 ਵਿੱਚ ਐਨਕਾਊਂਟਰ ਕਰ ਦਿੱਤਾ ਗਿਆ ਸੀ। ਉਸ ਤੋਂ ਬਾਅਦ ਵੀ ਫੇਸਬੁੱਕ ‘ਤੇ ਲਗਾਤਾਰ ਪੋਸਟਾਂ ਪਾਈਆਂ ਜਾ ਰਹੀਆਂ ਹਨ। ਪੁਲਿਸ ਮੂਕਦਰਸ਼ਕ ਬਣ ਕੇ ਰਹਿ ਗਈ ਹੈ। ਇਸ ਗੈਂਗ ਨੇ ਮਾਰਚ 2020 ਨੂੰ ਬਾਊਂਸਰ ਸੁਰਜੀਤ ਦੇ ਕਤਲ ਦੀ ਜ਼ਿੰਮੇਵਾਰੀ ਵੀ ਲਈ ਸੀ। ਪਰ ਘਟਨਾ ਦੇ ਸੱਤ ਮਹੀਨੇ ਬਾਅਦ ਵੀ ਪੁਲਿਸ ਦੇ ਹੱਥ ਖਾਲੀ ਹਨ।
