Oxford covid 19 vaccine prompts: ਕੋਰੋਨਾ ਵਾਇਰਸ ਸੰਕਟ ਨਾਲ ਜੂਝ ਰਹੀ ਦੁਨੀਆ ਲਈ ਇੱਕ ਰਾਹਤ ਭਰੀ ਖ਼ਬਰ ਮਿਲੀ ਹੈ। ਆਕਸਫੋਰਡ ਯੂਨੀਵਰਸਿਟੀ ਵੱਲੋਂ ਜਿਸ ਕੋਰੋਨਾ ਵੈਕਸੀਨ ਦਾ ਟ੍ਰਾਇਲ ਕੀਤਾ ਜਾ ਰਿਹਾ ਹੈ, ਉਸਨੇ ਕੁਝ ਵਧੀਆ ਸੰਕੇਤ ਦਿੱਤੇ ਹਨ। ਵੈਕਸੀਨ ਰਾਹੀਂ ਨਾ ਸਿਰਫ ਨੌਜਵਾਨ, ਬਲਕਿ ਬਜ਼ੁਰਗਾਂ ਦਾ ਵੀ ਇਮਿਊਨ ਸਿਸਟਮ ਮਜ਼ਬੂਤ ਹੋਇਆ ਹੈ, ਜੋ ਕੋਰੋਨਾ ਦੇ ਵਿਰੁੱਧ ਲੜਾਈ ਵਿੱਚ ਕਾਰਗਰ ਸਿੱਧ ਹੋ ਸਕਦੇ ਹਨ। ਆਕਸਫੋਰਡ ਯੂਨੀਵਰਸਿਟੀ ਅਤੇ ਐਸਟਰਾਜ਼ੇਨੇਕਾ ਮਿਲ ਕੇ ਇਸ ਵੈਕਸੀਨ ਦਾ ਵਿਕਾਸ ਕਰ ਰਹੇ ਹਨ, ਜੋ ਕਿ ਹਾਲ ਹੀ ਵਿੱਚ ਬਜ਼ੁਰਗਾਂ ‘ਤੇ ਕੀਤਾ ਗਿਆ ਸੀ, ਜੋ ਇਮਿਊਨਿਟੀ ਪੱਧਰ ਦੇ ਪੈਮਾਨੇ ‘ਤੇ ਖਰਾ ਉਤਰਿਆ ਹੈ।
ਐਸਟਰਾਜ਼ੇਨੇਕਾ ਵਲੋਂ ਜਾਰੀ ਬਿਆਨ ਵਿੱਚ ਕਿਹਾ ਗਿਆ ਹੈ, “ਇਹ ਚੰਗਾ ਨਤੀਜਾ ਹੈ ਕਿ ਨੌਜਵਾਨ ਅਤੇ ਬਜ਼ੁਰਗ ਦੋਵਾਂ ਵਿੱਚ ਹੀ ਇਮਿਊਨਿਟੀ ਨੂੰ ਲੈ ਕੇ ਰਿਸਪੌਂਸ ਇੱਕੋ ਜਿਹਾ ਰਿਹਾ ਹੈ, ਜਦੋਂ ਕਿ ਬਜ਼ੁਰਗਾਂ ਨੂੰ ਪ੍ਰਤੀਕ੍ਰਿਆ ਦੀ ਯੋਗਤਾ ਦੀ ਘੱਟ ਉਮੀਦ ਸੀ ਜਿਸ ਨਾਲ ਉਨ੍ਹਾਂ ‘ਤੇ ਕੋਰੋਨਾ ਦਾ ਜੋਖਮ ਵਧਿਆ, ਪਰ ਟ੍ਰਾਇਲ ਸਫਲ ਰਿਹਾ। ਇਹ ਨਤੀਜੇ ਬਾਅਦ ਵਿੱਚ AZD1222 ਲਈ ਚੰਗੇ ਨਤੀਜੇ ਦਿਖਾ ਸਕਦੇ ਹਨ।
ਦਰਅਸਲ, ਦੁਨੀਆ ਕੋਰੋਨਾ ਸੰਕਟ ਦੇ ਵਿਰੁੱਧ ਲੜਾਈ ਲੜ ਰਹੀ ਹੈ। ਇਹ ਵਾਇਰਸ ਇੱਕ ਸਾਲ ਪੁਰਾਣਾ ਹੋਣ ਵਾਲਾ ਹੈ ਅਤੇ ਲੱਖਾਂ ਲੋਕ ਆਪਣੀਆਂ ਜਾਨਾਂ ਗੁਆ ਚੁੱਕੇ ਹਨ। ਵਾਇਰਸ ਨੂੰ ਹਰਾਉਣ ਲਈ ਵਿਸ਼ਵ ਦੇ ਵੱਖ-ਵੱਖ ਦੇਸ਼ਾਂ ਵਿੱਚ ਵੈਕਸੀਨ ਬਣਾਈ ਜਾ ਰਹੀ ਹੈ । ਇਨ੍ਹਾਂ ਵਿਚੋਂ ਆਕਸਫੋਰਡ / ਐਸਟਰਾਜ਼ੇਨੇਕਾ ਦੀ ਵੈਕਸੀਨ ਮਨਜ਼ੂਰੀ ਦੇ ਬਹੁਤ ਨੇੜੇ ਹੈ, ਜਦੋਂ ਕਿ ਪੀ-ਫਾਈਜ਼ਰ ਅਤੇ ਬਾਇਓਨੋਟੈਕ ਦੀ ਵੈਕਸੀਨ ਵੀ ਤੇਜ਼ੀ ਨਾਲ ਪ੍ਰਵਾਨਗੀ ਵੱਲ ਵੱਧ ਰਹੇ ਹਨ।
ਕੋਰੋਨਾ ਨਾਲ ਜਾਰੀ ਲੜਾਈ ਦੇ ਵਿਚਕਾਰ ਆਕਸਫੋਰਡ ਦੀ ਵੈਕਸੀਨ ਬਾਰੇ ਨਵਾਂ ਅਪਡੇਟ ਇਸ ਲਈ ਵੀ ਮਹੱਤਵਪੂਰਣ ਹੈ ਕਿਉਂਕਿ ਹੁਣ ਤੱਕ ਇਹ ਦੇਖਿਆ ਗਿਆ ਸੀ ਕਿ ਬਜ਼ੁਰਗ ਮਰੀਜ਼ਾਂ ਦਾ ਇਮਿਊਨ ਸਿਸਟਮ ਕਮਜ਼ੋਰ ਹੈ ਅਤੇ ਇਸੇ ਕਾਰਨ ਕੋਰੋਨਾ ਕਾਰਨ ਜ਼ਿਆਦਾ ਮੌਤਾਂ ਹੋਈਆਂ ਹਨ । ਅਜਿਹੀ ਸਥਿਤੀ ਵਿੱਚ ਜੇ ਇਹ ਵੈਕਸੀਨ ਸਹੀ ਤਰ੍ਹਾਂ ਕੰਮ ਕਰਦੀ ਹੈ ਤਾਂ ਕੋਰੋਨਾ ਦੇ ਪ੍ਰਭਾਵ ਨੂੰ ਕਾਬੂ ਕਰਨਾ ਸੌਖਾ ਹੋ ਸਕਦਾ ਹੈ।
ਦੱਸ ਦੇਈਏ ਕਿ ਬ੍ਰਿਟਿਸ਼ ਸਿਹਤ ਸਕੱਤਰ ਦੇ ਅਨੁਸਾਰ ਵੈਕਸੀਨ ਅਜੇ ਤਿਆਰ ਨਹੀਂ ਹੈ, ਪਰ 2021 ਦੇ ਪਹਿਲੇ ਅੱਧ ਵਿੱਚ ਅਸੀਂ ਇਸ ਨਾਲ ਸਬੰਧਤ ਸਾਰੀਆਂ ਤਿਆਰੀਆਂ ਨੂੰ ਪੂਰਾ ਕਰ ਸਕਦੇ ਹਾਂ ਤਾਂ ਜੋ ਸ਼ੁਰੂਆਤੀ ਸਮੇਂ ਕੋਈ ਮੁਸ਼ਕਿਲ ਨਾ ਆਵੇ। ਆਕਸਫੋਰਡ ਯੂਨੀਵਰਸਿਟੀ ਨੇ ਇਸ ਸਾਲ ਜਨਵਰੀ ਵਿੱਚ ਟੀਕੇ ‘ਤੇ ਕੰਮ ਸ਼ੁਰੂ ਕਰ ਦਿੱਤਾ ਸੀ, ਜਿਸਦਾ ਅਰਥ ਹੈ ਕਿ ਹੁਣ ਲਗਭਗ ਦਸ ਮਹੀਨੇ ਹੋ ਗਏ ਹਨ। ਵਿਸ਼ਵ ਸਿਹਤ ਸੰਗਠਨ ਨੂੰ ਉਮੀਦ ਹੈ ਕਿ ਕੁਝ ਵੈਕਸੀਨ 2021 ਤੱਕ ਬਾਜ਼ਾਰ ਵਿੱਚ ਆਉਣ ਨੂੰ ਉਪਲਬਧ ਹੋ ਸਕਦੀ ਹੈ।
