John Abraham Tehran Movie: ਜਾਨ ਅਬ੍ਰਾਹਮ ਨੇ ਹੁਣ ਆਪਣੀ ਨਵੀਂ ਫਿਲਮ ਦਾ ਐਲਾਨ ਕਰ ਦਿੱਤਾ ਹੈ। ਫਿਲਮ ਦਾ ਨਾਂ ‘Tehran’ ਹੈ ਜੋ ਕਿ ਐਕਸ਼ਨ ਥ੍ਰਿਲਰ ਫਿਲਮ ਹੋਵੇਗੀ। ਇਸ ਤੋਂ ਪਹਿਲਾਂ ਵੀ ਜੌਨ ਅਬ੍ਰਾਹਮ ਨੂੰ ਐਕਸ਼ਨ ਕਰਦੇ ਦੇਖਿਆ ਗਿਆ ਹੈ ਅਤੇ ਪਸੰਦ ਵੀ ਕੀਤਾ ਗਿਆ ਹੈ ਅਤੇ ਹੁਣ ਇਕ ਵਾਰ ਫਿਰ ਜੌਨ ਉਸੇ ਅਵਤਾਰ ‘ਚ ਨਜ਼ਰ ਆਉਣਗੇ।
ਇਸ ਫਿਲਮ ਦਾ ਪਹਿਲਾ ਪੋਸਟਰ ਆਪਣੇ ਇੰਸਟਾਗ੍ਰਾਮ ‘ਤੇ ਸ਼ੇਅਰ ਕਰਦੇ ਹੋਏ ਜਾਨ ਅਬ੍ਰਾਹਮ ਨੇ ਫਿਲਮ ਨਾਲ ਜੁੜੀ ਕੁਝ ਜਾਣਕਾਰੀ ਵੀ ਦਿੱਤੀ ਹੈ। ਫਿਲਮ ‘ਚ ਜੌਨ ਮੁੱਖ ਭੂਮਿਕਾ ਨਿਭਾਉਣਗੇ, ਜਦਕਿ ਇਸ ਦਾ ਨਿਰਦੇਸ਼ਨ ਅਰੁਣ ਗੋਪਾਲਨ ਕਰਨਗੇ। ਹਾਲਾਂਕਿ ਇਹ ਫਿਲਮ ਇਕ ਸੱਚੀ ਘਟਨਾ ‘ਤੇ ਆਧਾਰਿਤ ਹੈ, ਪਰ ਇਸ ਨੂੰ ਕਹਾਣੀ ਦੇ ਰੂਪ ‘ਚ ਪੇਸ਼ ਕਰਨ ਦਾ ਕੰਮ ਆਸ਼ੀਸ਼ ਪੀ ਵਰਮਾ ਨੇ ਕੀਤਾ ਹੈ। ਫਿਲਮ ਦੇ ਪਹਿਲੇ ਪੋਸਟਰ ਦੇ ਨਾਲ ਹੀ ਇਸ ਦੀ ਰਿਲੀਜ਼ ਡੇਟ ਦਾ ਵੀ ਐਲਾਨ ਕਰ ਦਿੱਤਾ ਗਿਆ ਹੈ। ‘Tehran’ ਫਿਲਮ ਅਗਲੇ ਸਾਲ ਦੇ ਪਹਿਲੇ ਮਹੀਨੇ ਰਿਲੀਜ਼ ਹੋਵੇਗੀ। ਇਹ ਫਿਲਮ ਗਣਤੰਤਰ ਦਿਵਸ ਦੇ ਮੌਕੇ ‘ਤੇ 26 ਜਨਵਰੀ, 2023 ਨੂੰ ਰਿਲੀਜ਼ ਹੋਵੇਗੀ।
ਜਾਨ ਅਬ੍ਰਾਹਮ ਬਾਲੀਵੁੱਡ ਦੇ ਉਨ੍ਹਾਂ ਕਲਾਕਾਰਾਂ ‘ਚੋਂ ਇਕ ਹਨ, ਜਿਨ੍ਹਾਂ ਨੇ ਪਿਛਲੇ ਸਮੇਂ ‘ਚ ਐਕਸ਼ਨ ਰਾਹੀਂ ਲੋਕਾਂ ਦਾ ਮਨੋਰੰਜਨ ਕੀਤਾ ਹੈ ਅਤੇ ਸਫਲ ਵੀ ਰਹੇ ਹਨ। ਜੇਕਰ ਅਸੀਂ ਉਨ੍ਹਾਂ ਦੀਆਂ ਪਿਛਲੀਆਂ ਰਿਲੀਜ਼ ਹੋਈਆਂ ਐਕਸ਼ਨ ਫਿਲਮਾਂ ਦੀ ਗੱਲ ਕਰੀਏ ਤਾਂ ਇਸ ਸੂਚੀ ‘ਚ ‘ਮੁੰਬਈ ਸਾਗਾ’, ‘ਬਾਟਲਾ ਹਾਊਸ’, ‘ਸਤਿਆਮੇਵ ਜਯਤੇ’, ‘ਢੀਸ਼ੂਮ’, ‘ਫੋਰਸ’,’ ਫੋਰਸ 2′ ਵਰਗੀਆਂ ਹਿੱਟ ਫਿਲਮਾਂ ਸ਼ਾਮਲ ਹਨ। ਇਨ੍ਹਾਂ ਫਿਲਮਾਂ ਨੂੰ ਨਾ ਸਿਰਫ ਪਸੰਦ ਕੀਤਾ ਗਿਆ ਸੀ, ਸਗੋਂ ਇਨ੍ਹਾਂ ਵਿਚ ਜੌਨ ਦੇ ਕੰਮ ਦੀ ਵੀ ਕਾਫੀ ਤਾਰੀਫ ਹੋਈ ਸੀ। ਵੈਸੇ ‘Tehran’ ਤੋਂ ਇਲਾਵਾ ਵੀ ਜਾਨ ਦੇ ਕੋਲ ਕਈ ਪ੍ਰੋਜੈਕਟ ਹਨ। ਇਸ ਸਾਲ ਜੌਨ ਦੀਆਂ ਤਿੰਨ ਵੱਡੀਆਂ ਫਿਲਮਾਂ ਰਿਲੀਜ਼ ਹੋ ਸਕਦੀਆਂ ਹਨ। ਇਨ੍ਹਾਂ ‘ਚ ‘ਅਟੈਕ’, ‘ਏਕ ਵਿਲੇਨ 2’ ਅਤੇ ‘ਪਠਾਨ’ ਸ਼ਾਮਲ ਹਨ। ਪਠਾਨ ‘ਚ ਜਾਨ ਦਾ ਕਿਰਦਾਰ ਨੈਗੇਟਿਵ ਹੈ, ਜਦਕਿ ਸ਼ਾਹਰੁਖ ਖਾਨ ਮੁੱਖ ਭੂਮਿਕਾ ਨਿਭਾਅ ਰਹੇ ਹਨ। ਰਿਪੋਰਟਾਂ ਮੁਤਾਬਕ ਜਾਨ ਨੇ ‘ਪਠਾਨ’ ਲਈ ਕਾਫੀ ਚਾਰਜ ਕੀਤਾ ਹੈ।
