Kidney stone dal eating: ਅੱਜ ਕੱਲ੍ਹ ਹਰ ਦੂਜਾ ਵਿਅਕਤੀ ਪੱਥਰੀ ਤੋਂ ਪ੍ਰੇਸ਼ਾਨ ਹੈ। ਪੱਥਰੀ ਦਾ ਦਰਦ ਕਿਸੇ ਵੀ ਸਮੇਂ ਉੱਠ ਸਕਦਾ ਹੈ ਇਹ ਦਰਦ ਅਸਹਿ ਹੋ ਸਕਦਾ ਹੈ। ਪੱਥਰੀ ‘ਚ ਸਰੀਰ ‘ਚ ਖਣਿਜ ਅਤੇ ਲੂਣ ਤੋਂ ਬਣੇ ਸਖ਼ਤ ਪਦਾਰਥ ਜਮ੍ਹਾ ਹੋ ਜਾਂਦੇ ਹਨ। ਪੱਥਰੀ ਹੋਣ ਦੀ ਸੂਰਤ ‘ਚ ਖਾਣ-ਪੀਣ ਦਾ ਬਹੁਤ ਧਿਆਨ ਰੱਖਣਾ ਪੈਂਦਾ ਹੈ। ਸਹੀ ਭੋਜਨ ਖਾਣ ਨਾਲ ਤੁਸੀਂ ਪੱਥਰੀ ਦੇ ਦਰਦ ਤੋਂ ਵੀ ਬਚ ਸਕਦੇ ਹੋ। ਪੱਥਰੀ ‘ਚ ਕੁਝ ਚੀਜ਼ਾਂ ਨੂੰ ਖਾਣ ਦੀ ਸਲਾਹ ਦਿੱਤੀ ਜਾਂਦੀ ਹੈ ਜਦੋਂ ਕਿ ਕੁਝ ਚੀਜ਼ਾਂ ਤੋਂ ਬਚਣ ਲਈ ਕਿਹਾ ਜਾਂਦਾ ਹੈ। ਜ਼ਿਆਦਾਤਰ ਲੋਕ ਜਾਣਦੇ ਹੀ ਹਨ ਕਿ ਕਿਹੜੇ ਫਲ ਅਤੇ ਸਬਜ਼ੀਆਂ ਖਾਣੀਆਂ ਚਾਹੀਦੀਆਂ ਹਨ ਜਾਂ ਨਹੀਂ। ਪਰ ਇਹ ਜਾਣਨ ਲਈ ਪੜ੍ਹੋ ਕਿ ਕਿਹੜੀ ਦਾਲ ਪੱਥਰੀ ‘ਚ ਖਾਣੀ ਚਾਹੀਦੀ ਹੈ ਅਤੇ ਕਿਹੜੀਆਂ ਦਾਲਾਂ ਨੂੰ ਨਹੀਂ ਖਾਣਾ ਚਾਹੀਦਾ।
ਪੱਥਰੀ ‘ਚ ਕਿਹੜੀ ਦਾਲ ਖਾਈਏ: ਪੱਥਰੀ ‘ਚ ਕੁਲਥੀ ਦਾਲ ਮਿਲਾ ਕੇ ਖਾਣਾ ਬਹੁਤ ਫਾਇਦੇਮੰਦ ਹੁੰਦਾ ਹੈ। ਜੇਕਰ ਤੁਹਾਨੂੰ ਪੱਥਰੀ ਹੈ ਤਾਂ ਤੁਸੀਂ ਕੁਲਥੀ ਦਾਲ ਖਾ ਸਕਦੇ ਹੋ। ਕੁਲਥੀ ਦਾਲ ਪੱਥਰੀ ਨੂੰ ਛੋਟਾ ਕਰਨ ‘ਚ ਮਦਦ ਕਰਦੀ ਹੈ। ਇਸ ਨਾਲ ਪੱਥਰੀ ਛੋਟੀ ਹੋ ਜਾਂਦੀ ਹੈ ਅਤੇ ਹੌਲੀ-ਹੌਲੀ ਪਿਸ਼ਾਬ ਦੇ ਨਾਲ ਸਰੀਰ ਤੋਂ ਬਾਹਰ ਆਉਣ ਲੱਗਦੀ ਹੈ। ਜੇਕਰ ਤੁਹਾਨੂੰ ਪੱਥਰੀ ਹੈ ਤਾਂ ਤੁਸੀਂ ਕੁਲਥੀ ਦੀ ਦਾਲ ਨੂੰ ਆਪਣੀ ਰੈਗੂਲਰ ਡਾਈਟ ‘ਚ ਸ਼ਾਮਲ ਕਰ ਸਕਦੇ ਹੋ। 3 ਤੋਂ 4 ਮਹੀਨੇ ਲਗਾਤਾਰ ਕੁਲਥੀ ਦਾਲ ਖਾਣ ਨਾਲ ਪੱਥਰੀ ਤੋਂ ਛੁਟਕਾਰਾ ਮਿਲ ਸਕਦਾ ਹੈ। ਇਸ ਤੋਂ ਇਲਾਵਾ ਕੁਲਥੀ ਦਾਲ ‘ਚ ਫਾਈਬਰ, ਆਇਰਨ ਅਤੇ ਵਿਟਾਮਿਨ ਸੀ ਵੀ ਪਾਇਆ ਜਾਂਦਾ ਹੈ। ਅਜਿਹੇ ‘ਚ ਇਹ ਦਾਲ ਸਿਹਤ ਲਈ ਵੀ ਬਹੁਤ ਫਾਇਦੇਮੰਦ ਹੁੰਦੀ ਹੈ। ਇਸ ਲਈ ਹਰ ਵਿਅਕਤੀ ਨੂੰ ਆਪਣੀ ਡਾਇਟ ‘ਚ ਕੁਲਥੀ ਦਾਲ ਜ਼ਰੂਰ ਸ਼ਾਮਲ ਕਰਨੀ ਚਾਹੀਦੀ ਹੈ।
ਪੱਥਰੀ ‘ਚ ਕਿਹੜੀ ਦਾਲ ਨਾ ਖਾਈਏ: ਪੱਥਰੀ ਦੀ ਹਾਲਤ ‘ਚ ਜਿਸ ਤਰੀਕੇ ਨਾਲ ਕੁਲਥੀ ਦਾਲ ਖਾਣ ਨਾਲ ਫਾਇਦਾ ਹੁੰਦਾ ਹੈ। ਇਸੇ ਤਰ੍ਹਾਂ ਪੱਥਰੀ ਦੇ ਮਰੀਜ਼ਾਂ ਲਈ ਕੁਝ ਕਿਸਮ ਦੀਆਂ ਦਾਲਾਂ ਵੀ ਨੁਕਸਾਨਦੇਹ ਹੋ ਸਕਦੀਆਂ ਹਨ। ਇਸ ਲਈ ਪੱਥਰੀ ਹੋਣ ‘ਤੇ ਇਨ੍ਹਾਂ ਦਾਲਾਂ ਦਾ ਸੇਵਨ ਬਿਲਕੁਲ ਵੀ ਨਹੀਂ ਕਰਨਾ ਚਾਹੀਦਾ।
ਉੜਦ ਦਾਲ: ਪੱਥਰੀ ਦੇ ਮਰੀਜ਼ਾਂ ਨੂੰ ਉੜਦ ਦੀ ਦਾਲ ਦਾ ਸੇਵਨ ਬਿਲਕੁਲ ਨਹੀਂ ਕਰਨਾ ਚਾਹੀਦਾ। ਉੜਦ ਦੀ ਦਾਲ ਖਾਣ ਨਾਲ ਸਰੀਰ ‘ਚ ਮੌਜੂਦ ਪੱਥਰੀ ਵਧ ਸਕਦੀ ਹੈ। ਅਜਿਹੇ ‘ਚ ਤੁਹਾਨੂੰ ਤੇਜ਼ ਦਰਦ ਵੀ ਹੋ ਸਕਦਾ ਹੈ। ਉੜਦ ਦੀ ਦਾਲ ਖਾਣ ਨਾਲ ਕਿਡਨੀ ‘ਚ ਗੰਦਗੀ ਜਮ੍ਹਾ ਹੋ ਜਾਂਦੀ ਹੈ ਅਤੇ ਪੱਥਰੀ ਵਧ ਜਾਂਦੀ ਹੈ। ਪੱਥਰੀ ‘ਚ ਖਾਸ ਕਰਕੇ ਰਾਤ ਨੂੰ ਕਾਲੀ ਉੜਦ ਦੀ ਦਾਲ ਦਾ ਸੇਵਨ ਭੁੱਲ ਕੇ ਵੀ ਨਹੀਂ ਕਰਨਾ ਚਾਹੀਦਾ।
ਛੋਲਿਆਂ ਦੀ ਦਾਲ: ਛੋਲਿਆਂ ਦੀ ਦਾਲ ਪੱਥਰੀ ਦੇ ਮਰੀਜ਼ਾਂ ਨੂੰ ਵੀ ਨੁਕਸਾਨ ਪਹੁੰਚਾ ਸਕਦੀ ਹੈ। ਪੇਟ, ਪਿੱਤੇ ਜਾਂ ਕਿਡਨੀ ‘ਚ ਪੱਥਰੀ ਹੈ ਤਾਂ ਛੋਲਿਆਂ ਦੀ ਦਾਲ ਤੋਂ ਪਰਹੇਜ਼ ਕਰਨਾ ਚਾਹੀਦਾ ਹੈ। ਛੋਲਿਆਂ ਦੀ ਦਾਲ ਖਾਣ ਨਾਲ ਪੱਥਰੀ ਦੀ ਸਮੱਸਿਆ ਵੱਧ ਸਕਦੀ ਹੈ।
ਸੁੱਕੇ ਬੀਨਜ਼: ਜੇਕਰ ਤੁਹਾਨੂੰ ਪੱਥਰੀ ਹੈ ਤਾਂ ਤੁਹਾਨੂੰ ਸੁੱਕੇ ਬੀਨਜ਼ ਦਾ ਸੇਵਨ ਕਰਨ ਤੋਂ ਵੀ ਪਰਹੇਜ਼ ਕਰਨਾ ਚਾਹੀਦਾ ਹੈ। ਸੁੱਕੇ ਬੀਨਜ਼ ਖਾਣ ਨਾਲ ਪੱਥਰੀ ਦੀ ਸਮੱਸਿਆ ਵੱਧ ਸਕਦੀ ਹੈ। ਪੱਥਰੀ ‘ਚ ਸੁੱਕੇ ਬੀਨਜ਼ ਖਾਣ ਤੋਂ ਬਾਅਦ ਤੁਹਾਨੂੰ ਦਰਦ ਮਹਿਸੂਸ ਹੋ ਸਕਦਾ ਹੈ। ਇਸ ਲਈ ਇਸ ਨੂੰ ਖਾਣ ਤੋਂ ਪਰਹੇਜ਼ ਕਰੋ।
ਰਾਜਮਾ: ਰਾਜਮਾ ਪ੍ਰੋਟੀਨ ਦਾ ਵਧੀਆ ਸਰੋਤ ਹੈ। ਇਸ ਲਈ ਪੱਥਰੀ ਦੇ ਮਰੀਜ਼ਾਂ ਨੂੰ ਰਾਜਮਾ ਖਾਣ ਤੋਂ ਪਰਹੇਜ਼ ਕਰਨਾ ਚਾਹੀਦਾ ਹੈ। ਬਹੁਤ ਜ਼ਿਆਦਾ ਪ੍ਰੋਟੀਨ ਦਾ ਸੇਵਨ ਪੱਥਰੀ ਦੇ ਮਰੀਜ਼ਾਂ ਲਈ ਨੁਕਸਾਨਦੇਹ ਹੋ ਸਕਦਾ ਹੈ। ਜੇਕਰ ਪੱਥਰੀ ਹੈ ਤਾਂ ਪ੍ਰੋਟੀਨ ਦਾ ਸੇਵਨ ਸੀਮਤ ਮਾਤਰਾ ‘ਚ ਕਰਨਾ ਚਾਹੀਦਾ ਹੈ।
ਇਸ ਤੋਂ ਇਲਾਵਾ ਪੱਥਰੀ ‘ਚ ਕੱਚੇ ਚੌਲ, ਟਮਾਟਰ, ਬੈਂਗਣ, ਸ਼ਿਮਲਾ ਮਿਰਚ, ਭਿੰਡੀ, ਮੀਟ ਅਤੇ ਜ਼ਿਆਦਾ ਮਸਾਲੇਦਾਰ ਭੋਜਨ ਖਾਣ ਤੋਂ ਵੀ ਪਰਹੇਜ਼ ਕਰਨਾ ਚਾਹੀਦਾ ਹੈ। ਵੈਸੇ ਤਾਂ ਸਹੀ ਖਾਣ-ਪੀਣ ਨਾਲ ਪੱਥਰੀ ਨੂੰ ਕੰਟਰੋਲ ‘ਚ ਰੱਖਿਆ ਜਾ ਸਕਦਾ ਹੈ। ਪਰ ਜੇਕਰ ਤੁਹਾਨੂੰ ਵਾਰ-ਵਾਰ ਪੱਥਰੀ ਦਾ ਤੇਜ਼ ਦਰਦ ਹੁੰਦਾ ਹੈ ਤਾਂ ਅਜਿਹੇ ‘ਚ ਡਾਕਟਰ ਸਰਜਰੀ ਦੀ ਸਲਾਹ ਵੀ ਦੇ ਸਕਦਾ ਹੈ।
