ਚਿੰਤਪੁਰਨੀ ਤੋਂ ਜਵਾਲਾਜੀ ਜਾ ਰਹੇ ਪੰਜਾਬ ਦੇ ਸ਼ਰਧਾਲੂਆਂ ਨਾਲ ਵੱਡਾ ਹਾਦਸਾ, ਟਰਾਲਾ ਡਿੱਗਿਆ ਖਾਈ ‘ਚ

ਹਿਮਾਚਲ ਦੇ ਊਨਾ ‘ਚ ਚਿੰਤਪੁਰਨੀ ਨੇੜੇ ਸ਼ੀਤਲਾ ਮੰਦਰ ਨੇੜੇ ਪੰਜਾਬ ਤੋਂ ਸ਼ਰਧਾਲੂਆਂ ਨੂੰ ਲੈ ਕੇ ਜਾ ਰਹੀ ਟਰਾਲੀ ਖੱਡ ‘ਚ ਡਿੱਗ ਗਈ। ਹਾਦਸੇ ‘ਚ 10 ਤੋਂ 12 ਲੋਕ ਜ਼ਖਮੀ ਹੋ ਗਏ, ਜਿਨ੍ਹਾਂ ਨੂੰ ਇਲਾਜ ਲਈ ਚਿੰਤਪੁਰਨੀ ਹਸਪਤਾਲ ਲਿਆਂਦਾ ਗਿਆ। ਇਹ ਸਾਰੇ ਸ਼ਰਧਾਲੂ ਪੰਜਾਬ ਦੇ ਜਗਰਾਓਂ ਅਤੇ ਮੋਗਾ ਦੇ ਹਨ।

ਜਾਣਕਾਰੀ ਮੁਤਾਬਕ ਬੱਚਿਆਂ ਸਣੇ 20 ਤੋਂ 25 ਸ਼ਰਧਾਲੂ ਸ਼ਨੀਵਾਰ ਰਾਤ ਟਰਾਲੀ ‘ਚ ਸਵਾਰ ਹੋ ਕੇ ਚਿੰਤਪੁਰਨੀ ਮੰਦਰ ਪਹੁੰਚੇ ਸਨ। ਇੱਥੇ ਇੱਕ ਰਾਤ ਠਹਿਰਣ ਤੋਂ ਬਾਅਦ ਐਤਵਾਰ ਸਵੇਰੇ ਮਾਤਾ ਚਿੰਤਪੁਰਨੀ ਦੇ ਕਰਸ਼ਨ ਕਰਨ ਤੋਂ ਬਾਅਦ ਸ਼ੀਤਲਾ ਮੰਦਰ ਗਏ। ਇਸ ਤੋਂ ਬਾਅਦ ਉਹ ਜਵਾਲਾ ਦੇਵੀ ਮੰਦਰ ਦੇ ਦਰਸ਼ਨਾਂ ਲਈ ਜਾ ਰਹੇ ਸਨ। ਇਸੇ ਦੌਰਾਨ ਟਰਾਲਾ ਖਾਈ ਵਿੱਚ ਡਿੱਗ ਗਿਆ, ਜਿਸ ਕਰਕੇ ਕਰੀਬ 12 ਸ਼ਰਧਾਲੂ ਜ਼ਖਮੀ ਹੋ ਗਏ ਹਨ।

ਟਰਾਲੀ ਵਿੱਚ ਛੋਟੇ-ਛੋਟੇ ਬੱਚੇ ਵੀ ਸਨ, ਜਿਨ੍ਹਾਂ ਨੂੰ ਝਰੀਟ ਤੱਕ ਨਹੀਂ ਆਈ। ਹਾਦਸੇ ਤੋਂ ਬਾਅਦ ਨੇੜਲੇ ਪਿੰਡ ਦੇ ਲੋਕਾਂ ਨੇ 108 ਐਂਬੂਲੈਂਸ ਨੂੰ ਸੂਚਨਾ ਦਿੱਤੀ। ਜਿਸ ਤੋਂ ਬਾਅਦ ਚਿੰਤਪੁਰਨੀ, ਦੌਲਤਪੁਰ ਅਤੇ ਦਾਦਾਸੀਬਾ ਤੋਂ ਤਿੰਨ ਐਂਬੂਲੈਂਸਾਂ ਮੌਕੇ ‘ਤੇ ਪਹੁੰਚੀਆਂ। ਪਿੰਡ ਦੇ ਲੋਕਾਂ ਨੇ ਜ਼ਖਮੀ ਸ਼ਰਧਾਲੂਆਂ ਨੂੰ ਖਾਈ ‘ਚੋਂ ਕੱਢ ਕੇ ਤੁਰੰਤ ਐਂਬੂਲੈਂਸ ਰਾਹੀਂ ਇਲਾਜ ਲਈ ਚਿੰਤਪੁਰਨੀ ਹਸਪਤਾਲ ਪਹੁੰਚਾਇਆ।

ਇਹ ਵੀ ਪੜ੍ਹੋ : ਮਾਰੇ ਗਏ ਸ਼ਾਰਪਸ਼ੂਟਰ ਰੂਪਾ ਤੇ ਮੰਨੂ ਬਾਰੇ ਵੱਡਾ ਖੁਲਾਸਾ, ਸਰੈਂਡਰ ਕਰਨਾ ਚਾਹੁੰਦੇ ਸਨ, ਫਿਰ ਅਚਾਨਕ…

ਟਰਾਲਾ ਡਰਾਈਵਰ ਮੁਤਾਬਕ ਸੜਕ ਤੰਗ ਹੋਣ ਕਰਕੇ ਉਲਟ ਪਾਸਿਓਂ ਆ ਰਹੀ ਆਲਟੋ ਗੱਡੀ ਦੇ ਲੰਘਣ ਨਾਲ ਟਰਾਲਾ ਖਾਈ ਵਿੱਚ ਜਾ ਡਿੱਗਾ। ਦੂਜੇ ਪਾਸੇ ਐਤਵਾਰ ਦੀ ਛੁੱਟੀ ਹੋਣ ਦੇ ਬਾਵਜੂਦ ਹਸਪਤਾਲ ਦੀ ਡਾਕਟਰ ਮੋਨਿਕਾ, ਡਾਕਟਰ ਸ਼ਿਵਾ ਲਖਨਪਾਲ ਅਤੇ ਹਸਪਤਾਲ ਦਾ ਸਟਾਫ਼ ਤੁਰੰਤ ਜ਼ਖ਼ਮੀਆਂ ਦੀ ਮੁੱਢਲੀ ਸਹਾਇਤਾ ਵਿੱਚ ਜੁੱਟ ਗਿਆ।

ਚਿੰਤਪੁਰਨੀ ਹਸਪਤਾਲ ਵਿੱਚ ਤਾਇਨਾਤ ਡਾਕਟਰ ਮੋਨਿਕਾ ਅਤੇ ਸ਼ਿਵਾ ਲਖਨਪਾਲ ਨੇ ਦੱਸਿਆ ਕਿ ਇੱਕ ਦਰਜਨ ਦੇ ਕਰੀਬ ਸ਼ਰਧਾਲੂਆਂ ਨੂੰ ਗੰਭੀਰ ਸੱਟਾਂ ਲੱਗੀਆਂ ਹਨ। 3 ਸ਼ਰਧਾਲੂਆਂ ਦੀਆਂ ਹੱਡੀਆਂ ਵੀ ਟੁੱਟ ਗਈਆਂ ਹਨ, ਜਿਨ੍ਹਾਂ ਨੂੰ ਮੁੱਢਲੀ ਸਹਾਇਤਾ ਤੋਂ ਬਾਅਦ ਟਾਂਡਾ ਮੈਡੀਕਲ ਹਸਪਤਾਲ ਰੈਫਰ ਕਰ ਦਿੱਤਾ ਗਿਆ। ਘਟਨਾ ਦੁਪਹਿਰ 12 ਵਜੇ ਦੀ ਦੱਸੀ ਜਾ ਰਹੀ ਹੈ। ਦੂਜੇ ਪਾਸੇ ਦਾਦਸੀਬਾ ਚੌਕੀ ਦੇ ਇੰਚਾਰਜ ਰਾਜੇਸ਼ ਦਿਵੇਦੀ ਸੂਚਨਾ ਮਿਲਣ ‘ਤੇ ਟੀਮ ਸਣੇ ਮੌਕੇ ‘ਤੇ ਪਹੁੰਚੇ ਅਤੇ ਜਾਂਚ ਸ਼ੁਰੂ ਕਰ ਦਿੱਤੀ।

ਵੀਡੀਓ ਲਈ ਕਲਿੱਕ ਕਰੋ -:

“Fastway ਨੂੰ ਲਗਾ ਗਏ ਲੱਖਾਂ ਦਾ ਚੂਨਾ, ਭਰੋਸਾ ਜਿੱਤਣ ਤੋਂ ਬਾਅਦ ਸੁਣੋ ਕਿਵੇਂ ਕੀਤਾ Fraud, ਪਰ ਹੁਣ ਵਾਪਿਸ ਕਰਨਾ ਪੈਣਾ “