Annoyed by dowry harassment: ਖਰੜ ਦੀ ਛੱਜੂਮਾਜਰਾ ਕਲੋਨੀ ਦੀ ਰਹਿਣ ਵਾਲੀ ਇਕ ਵਿਆਹੁਤਾ ਮਹਿਲਾ ਵੱਲੋਂ ਫਾਹਾ ਲੈ ਖੁਦਕੁਸ਼ੀ ਕਰ ਲਏ ਜਾਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਮ੍ਰਿਤਕ ਮਹਿਲਾ ਲੁਧਿਆਣਾ ਜ਼ਿਲ੍ਹੇ ਦੇ ਜਗਰਾਉਂ ਸ਼ਹਿਰ ਨਾਲ ਸੰਬੰਧਤ ਦੱਸੀ ਜਾ ਰਹੀ ਹੈ। ਘਟਨਾ ਦਾ ਪਤਾ ਚਲਣ ਮਗਰੋਂ ਥਾਣਾ ਸਿਟੀ ਖਰੜ ਵਿਖੇ ਪੁੱਜੇ ਮ੍ਰਿਤਕ ਲੜਕੀ ਦੇ ਪਿਤਾ ਭੰਡਾਰੀ ਲਾਲ ਨੇ ਦੱਸਿਆ ਕਿ ਉਸਦੀ ਲੜਕੀ ਸ਼ਾਲੂ (28) ਦੀ ਸ਼ਾਦੀ ਅਕਤੂਬਰ 2018 ਵਿੱਚ ਇੱਥੋਂ ਦੇ ਰਾਕੇਸ਼ ਕੁਮਾਰ ਨਾਲ ਹੋਈ ਸੀ ਅਤੇ ਉਸਦੇ ਇਕ 11 ਮਹੀਨਿਆਂ ਦਾ ਬੇਟਾ ਵੀ ਹੈ।ਉਨ੍ਹਾਂ ਦੱਸਿਆ ਕਿ ਉਸ ਦੀ ਲੜਕੀ ਨੂੰ ਉਸਦੇ ਸਹੁਰੇ ਤੇ ਉਸਦਾ ਪਤੀ ਦਹੇਜ ਲਈ ਤੰਗ ਪ੍ਰੇਸ਼ਾਨ ਕਰਦੇ ਸੀ ਆਪਣੀ ਧੀ ਨੂੰ ਖੁਸ਼ ਦੇਖਣ ਲਈ ਆਪਣੀ ਲੜਕੀ ਨੂੰ ਉਹ ਕਦੇ ਵਿਆਜ ਤੇ ਜਾਂ ਕੋਈ ਸਮਾਨ ਵੇਚਕੇ ਪੈਸੇ ਭੇਜਦੇ ਰਹਿੰਦੇ ਸੀ ਹਾਲਾਂਕਿ ਉਹ ਖੁਦ ਆਪਣੇ ਪਰਿਵਾਰ ਦਾ ਗੁਜ਼ਾਰਾ ਬੜੀ ਮੁਸ਼ਕਲ ਦੇ ਨਾਲ ਚਲਾ ਰਹੇ ਹਨ।
ਉਨ੍ਹਾਂ ਕਿਹਾ ਕਿ ਅੱਜ ਉਨਾਂ ਦੀ ਲੜਕੀ ਨੇ ਦੁਪਹਿਰ ਸਮੇਂ ਆਪਣੀ ਛੋਟੀ ਭੈਣ ਨੇਹਾ ਨੂੰ ਫੋਨ ਕਰਕੇ ਦੱਸਿਆ ਸੀ ਕਿ ਉਸਦੇ ਸਹੁਰੇ ਉਸਨੂੰ ਹੋਰ ਪੈਸੇ ਲੈ ਕੇ ਆਉਣ ਦੀ ਮੰਗ ਕਰਦੇ ਹੋਏ ਕਾਫੀ ਤੰਗ ਕਰ ਰਹੇ ਹਨ। ਉਸਨੇ ਦੁਬਾਰਾ ਫੋਨ ਕਰਕੇ ਇਹ ਵੀ ਦੱਸਿਆ ਸੀ ਕਿ ਉਸਦੇ ਸਹੁਰੇ ਘਰ ਦੇ ਮੈਂਬਰ ਉਸਨੂੰ ਮਾਰਨ ਲੱਗੇ ਹਨ ਇਸ ਲਈ ਹੋ ਸਕੇ ਤਾਂ ਉਹ ਉਸਦੇ ਬੇਟੇ ਨੂੰ ਸਾਂਭ ਲੈਣ।ਜਿਸ ਤੋਂ ਬਾਅਦ ਉਨ੍ਹਾਂ ਨੇ ਪੁਲਸ ਦੇ 100 ਨੰਬਰ ਤੇ ਇਸ ਦੀ ਸੂਚਨਾ ਦਿੱਤੀ ਕਿ ਉਨ੍ਹਾਂ ਦੀ ਲੜਕੀ ਨੂੰ ਬਚਾਇਆ ਜਾਵੇ। ਪਰ ਇਸ ਦੇ ਮਗਰੋਂ ਉਨ੍ਹਾਂ ਨੂੰ ਛੱਜੂਮਾਜਰਾ ਤੋਂ ਉਨ੍ਹਾਂ ਦੀ ਲੜਕੀ ਦੀ ਮਾਸੀ ਸੱਸ ਨੇ ਫੋਨ ਕਰਕੇ ਦੱਸਿਆ ਕਿ ਤੁਹਾਡੀ ਲੜਕੀ ਦੀ ਮੌਤ ਹੋ ਗਈ ਹੈ ਤੁਸੀ ਜਲਦੀ ਆ ਜਾਓ।ਉਨ੍ਹਾਂ ਦੱਸਿਆ ਕਿ ਉਨ੍ਹਾਂ ਆਪਣੇ ਜਵਾਈ ਦੀ ਹਰ ਗੱਲ ਮੰਨੀ ਤੇ ਉਸਨੂੰ ਆਪਣੇ ਨਾਮ ਤੇ ਇਕ ਐਕਟੀਵਾ ਸਕੂਟਰ ਵੀ ਲੈਕੇ ਦਿੱਤਾ ਪਰ ਉਨ੍ਹਾਂ ਉਸਦੀ ਲੜਕੀ ਨੂੰ ਨਹੀਂ ਬਖਸ਼ਿਆ ਤੇ ਇਸਦਾ ਅੰਤ ਉਨ੍ਹਾਂ ਦੀ ਲੜਕੀ ਦੀ ਮੌਤ ਨਾਲ ਹੋਇਆ ਹੈ।
