subramanian swamy targets bjp it cell: ਨਵੀਂ ਦਿੱਲੀ: ਭਾਜਪਾ ਦੇ ਸੀਨੀਅਰ ਨੇਤਾ ਸੁਬਰਾਮਨੀਅਮ ਸਵਾਮੀ ਨੇ ਆਪਣੀ ਪਾਰਟੀ ਦੇ ਆਈ ਟੀ ਸੈੱਲ ‘ਤੇ ਗੰਭੀਰ ਦੋਸ਼ ਲਗਾਏ ਹਨ। ਸਵਾਮੀ ਨੇ ਦੋਸ਼ ਲਾਇਆ ਹੈ ਕਿ ਭਾਜਪਾ ਆਈ ਟੀ ਸੈੱਲ ਉਸ ਵਿਰੁੱਧ ਮੁਹਿੰਮ ਚਲਾ ਰਹੀ ਹੈ। ਉਨ੍ਹਾਂ ਨੇ ਇਹ ਵੀ ਕਿਹਾ ਕਿ ਆਈ ਟੀ ਸੈੱਲ ਦੀ ਤਰਫੋਂ ਸੋਸ਼ਲ ਮੀਡੀਆ ਉੱਤੇ ਲਗਾਤਾਰ ਨਿੱਜੀ ਹਮਲੇ ਹੁੰਦੇ ਰਹਿੰਦੇ ਹਨ। ਸੁਬਰਾਮਨੀਅਮ ਸਵਾਮੀ ਨੇ ਟਵਿੱਟਰ ‘ਤੇ ਆਈ ਟੀ ਸੈੱਲ ਖਿਲਾਫ ਆਪਣਾ ਗੁੱਸਾ ਕੱਢਿਆ ਹੈ। ਸਵਾਮੀ ਨੇ ਲਿਖਿਆ, “ਭਾਜਪਾ ਦਾ ਆਈ ਟੀ ਸੈੱਲ ਬੇਕਾਰ ਹੋ ਗਿਆ ਹੈ। ਕੁੱਝ ਮੈਂਬਰ ਜਾਅਲੀ ਆਈਡੀ ਬਣਾ ਕੇ ਮੇਰੇ ‘ਤੇ ਹਮਲਾ ਕਰ ਰਹੇ ਹਨ, ਜੇ ਮੇਰੇ ਪ੍ਰਸ਼ੰਸਕ ਅਜਿਹਾ ਕਰਨ ‘ਤੇ ਉਤਰ ਜਾਂਦੇ ਹਨ, ਤਾਂ ਮੈਂ ਉਸ ਲਈ ਜ਼ਿੰਮੇਵਾਰ ਨਹੀਂ ਹੋਵਾਂਗਾ। ਜਿਵੇਂ ਭਾਜਪਾ ਨੂੰ ਮੇਰੇ ‘ਤੇ ਹਮਲਾ ਕਰਨ ਲਈ ਜ਼ਿੰਮੇਵਾਰ ਨਹੀਂ ਠਹਿਰਾਇਆ ਜਾ ਸਕਦਾ।”
ਟਵਿੱਟਰ ‘ਤੇ ਇੱਕ ਉਪਭੋਗਤਾ ਨੇ ਸਵਾਮੀ ਨੂੰ ਅਜਿਹੇ ਲੋਕਾਂ ਅਤੇ ਹਮਲਿਆਂ ਨੂੰ ਨਜ਼ਰ ਅੰਦਾਜ਼ ਕਰਨ ਲਈ ਕਿਹਾ। ਸਵਾਮੀ ਨੇ ਇਸ ਦੇ ਜਵਾਬ ਵਿੱਚ ਕਿਹਾ ਕਿ ਮੈਂ ਉਨ੍ਹਾਂ ਨੂੰ ਨਜ਼ਰ ਅੰਦਾਜ਼ ਕਰ ਰਿਹਾ ਹਾਂ ਪਰ ਭਾਜਪਾ ਨੂੰ ਅਜਿਹੇ ਲੋਕਾਂ ਨੂੰ ਹਟਾ ਦੇਣਾ ਚਾਹੀਦਾ ਹੈ। ਸਵਾਮੀ ਨੇ ਭਾਜਪਾ ਆਈ ਟੀ ਸੈੱਲ ਦੇ ਮੁਖੀ ਅਮਿਤ ਮਾਲਵੀਆ ‘ਤੇ ਹਮਲਾ ਬੋਲਿਆ। ਉਨ੍ਹਾਂ ਨੇ ਕਿਹਾ ਕਿ ਇੱਕ ਮਾਲਵੀਆ ਪਾਤਰ ਇਹ ਸਾਰੀ ਗੜਬੜ ਚਲਾ ਰਿਹਾ ਹੈ। ਅਸੀਂ ਨਿਮਰਤਾ ਪੁਰਸ਼ੋਤਮ ਰਾਮ ਦੀ ਪਾਰਟੀ ਹਾਂ, ਰਾਵਣ ਜਾਂ ਦੁਸਾਸਣ ਦੀ ਨਹੀਂ। ਭਾਜਪਾ ਦੇ ਰਾਜ ਸਭਾ ਮੈਂਬਰ ਸੁਬਰਾਮਨੀਅਮ ਸਵਾਮੀ ਕਈ ਵਾਰ ਪਾਰਟੀ ਲਾਈਨ ਤੋਂ ਹੱਟ ਕੇ ਬਿਆਨ ਦੇ ਰਹੇ ਹਨ। ਸਵਾਮੀ ਨੇ ਕਈ ਵਾਰ ਆਰਥਿਕ ਨੀਤੀਆਂ ਨੂੰ ਲੈ ਕੇ ਮੋਦੀ ਸਰਕਾਰ ਦੀ ਆਲੋਚਨਾ ਵੀ ਕੀਤੀ ਹੈ। ਪਰ ਇਹ ਪਹਿਲਾ ਮੌਕਾ ਹੈ ਜਦੋਂ ਸਵਾਮੀ ਨੇ ਬੀਜੇਪੀ ਆਈ ਟੀ ਸੈੱਲ ਅਤੇ ਇਸਦੇ ਮੁਖੀ ਨੂੰ ਨਿਸ਼ਾਨਾ ਬਣਾਇਆ ਹੈ।
