ਹੁਸ਼ਿਆਰਪੁਰ ਜ਼ਿਲ੍ਹੇ ਦੇ ਮੁਕੇਰੀਆਂ ਦੇ ਇੱਕ ਪਿੰਡ ਦੇ ਖੇਤਾਂ ਵਿੱਚ ਇੱਕ ਤੇਂਦੂਆ ਦੇਖਿਆ ਗਿਆ, ਜਿਸ ਨਾਲ ਲੋਕਾਂ ਵਿਚ ਦਹਿਸ਼ਤ ਫੈਲ ਗਈ। ਤੇਂਦੂਆ ਖੇਤਾਂ ਵਿਚ ਤੜਫਦਾ ਦਿਖਾਈ ਦਿੱਤਾ। ਪਹਿਲਾਂ ਲੱਗਾ ਕਿ ਤੇਂਦੂਆ ਧੁੱਪ ਸੇਕਣ ਲਈ ਮਿੱਟੀ ਵਿਚ ਲਿਪਟ ਰਿਹਾ ਹੈ। ਜਦੋਂ ਲੋਕਾਂ ਨੇ ਮੋਬਾਈਲ ਰਾਹੀਂ ਦੂਰੋਂ ਇਸ ਨੂੰ ਕੈਪਚਰ ਕੀਤਾ ਤਾਂ ਪਤਾ ਲੱਗਾ ਿ ਇਹ ਤੜਫ ਰਿਹਾ ਹੈ।
ਇਹ ਘਟਨਾ ਵੀਰਵਾਰ ਦੀ ਹੈ। ਤੇਂਦੂਆ ਗੰਨੇ ਦੇ ਖੇਤ ਵਿੱਚ ਲੁਕਿਆ ਹੋਇਆ ਸੀ। ਜਿਵੇਂ ਹੀ ਉਹ ਨਿਕਲਿਆ ਇਹ ਸੂਰਾਂ ਨੂੰ ਫੜਨ ਲਈ ਲਗਾਏ ਗਏ ਜਾਲ ਵਿੱਚ ਫਸ ਗਿਆ, ਜਿਸ ਨਾਲ ਉਸਦੀ ਲੱਤ ਜ਼ਖਮੀ ਹੋ ਗਈ। ਮੁਕੇਰੀਆਂ ਦੇ ਗੁੱਜਰ ਕਟਰਾਲਾ ਪਿੰਡ ਦੇ ਇੱਕ ਕਿਸਾਨ ਅਨਿਲ ਕਟੋਲ ਨੇ ਕਿਹਾ ਕਿ ਉਹ ਕਣਕ ਬੀਜਣ ਤੋਂ ਬਾਅਦ ਆਪਣੇ ਖੇਤਾਂ ਨੂੰ ਪੱਧਰਾ ਕਰ ਰਿਹਾ ਸੀ ਜਦੋਂ ਉਸਨੇ ਤੇਂਦੂਆ ਦੇਖਿਆ।
ਗੁਜਰ ਕਟਰਾਲਾ ਪਿੰਡ ਦੇ ਸਰਪੰਚ ਮਦਨ ਲਾਲ ਨੇ ਕਿਹਾ ਕਿ ਕਿਸਾਨ ਅਨਿਲ ਕਟੋਚ ਨੇ ਤੇਂਦੂਏ ਨੂੰ ਵੇਖਦੇ ਹੀ ਉਨ੍ਹਾਂ ਨੂੰ ਸੁਚੇਤ ਕੀਤਾ। ਫਿਰ ਉਹ ਪਿੰਡ ਵਾਲਿਆਂ ਨਾਲ ਖੇਤਾਂ ਵਿੱਚ ਗਿਆ ਅਤੇ ਤੇਂਦੂਏ ਦੇ ਦਿਖਾਈ ਦੇਣ ਬਾਰੇ ਮੁਕੇਰੀਆਂ ਪੁਲਿਸ ਸਟੇਸ਼ਨ ਅਤੇ ਹੁਸ਼ਿਆਰਪੁਰ ਦੇ ਜੰਗਲੀ ਜੀਵ ਵਿਭਾਗ ਨੂੰ ਸੂਚਿਤ ਕੀਤਾ।
ਇਹ ਪਹਿਲੀ ਵਾਰ ਸੀ ਜਦੋਂ ਪਿੰਡ ਵਿੱਚ ਤੇਂਦੂਆ ਦੇਖਿਆ ਗਿਆ ਸੀ। ਬਹੁਤ ਸਾਰੇ ਨੌਜਵਾਨ ਖੇਤਾਂ ਵਿੱਚ ਪਹੁੰਚੇ, ਪਰ ਖੁਸ਼ਕਿਸਮਤੀ ਨਾਲ, ਕੋਈ ਵੀ ਨੁਕਸਾਨ ਨਹੀਂ ਹੋਇਆ। ਤੇਂਦੂਆ ਆਪਣੇ ਫਸਣ ਕਾਰਨ ਕਾਫ਼ੀ ਹਮਲਾਵਰ ਦਿਖਾਈ ਦੇ ਰਿਹਾ ਸੀ। ਜੇ ਇਹ ਛੁੱਟ ਜਾਂਦਾ ਤਾਂ ਇਹ ਕਾਫ਼ੀ ਨੁਕਸਾਨ ਕਰ ਸਕਦਾ ਸੀ।
ਸਰਪੰਚ ਨੇ ਦੱਸਿਆ ਕਿ ਪੁਲਿਸ ਅਤੇ ਜੰਗਲਾਤ ਵਿਭਾਗ ਦੀ ਟੀਮ ਨੇ ਤੇਂਦੂਏ ਦਾ ਬੇਹੋਸ਼ ਕਰਕੇ ਰੇਸਕਿਊ ਕਰ ਲਿਆ, ਜਿਸ ਨਾਲ ਲੋਕਾਂ ਨੇ ਚੈਨ ਦਾ ਸਾਹ ਲਿਆ। ਪਹਿਲਾਂ, ਉਨ੍ਹਾਂ ਨੇ ਪ੍ਰਸ਼ਾਸਨ ਨੂੰ ਅਪੀਲ ਕੀਤੀ ਸੀ ਕਿ ਕਿਸੇ ਵੀ ਜਾਨੀ ਨੁਕਸਾਨ ਤੋਂ ਬਚਣ ਲਈ ਤੇਂਦੂਏ ਨੂੰ ਜਲਦੀ ਤੋਂ ਜਲਦੀ ਫੜਿਆ ਜਾਵੇ।
ਇਹ ਵੀ ਪੜ੍ਹੋ : ਬਰਖਾਸਤ ਮਹਿਲਾ ਕਾਂਸਟੇਬਲ ਅਮਨਦੀਪ ਕੌਰ ਨੂੰ ਵੱਡੀ ਰਾਹਤ, ਹਾਈਕੋਰਟ ਤੋਂ ਮਿਲੀ ਜ਼ਮਾਨਤ
ਜਿਹੜੇ ਲੋਕ ਤੇਂਦੂਏ ਨੂੰ ਦੇਖਣ ਲਈ ਖੇਤਾਂ ਵਿੱਚ ਪਹੁੰਚੇ ਸਨ, ਉਨ੍ਹਾਂ ਨੇ ਕਿਹਾ ਕਿ ਉਹ ਤੇਂਦੂਏ ਨੂੰ ਫੜਨ ਤੱਕ ਡਰੇ ਹੋਏ ਸਨ। ਪਿੰਡ ਵਾਸੀਆਂ ਨੂੰ ਇਹ ਵੀ ਕਿਹਾ ਗਿਆ ਸੀ ਕਿ ਉਹ ਆਪਣੇ ਘਰਾਂ ਤੋਂ ਬਾਹਰ ਨਾ ਨਿਕਲਣ ਨਾ ਹੀ ਆਪਣੇ ਬੱਚਿਆਂ ਨੂੰ ਬਾਹਰ ਜਾਣ ਦੇਣ। ਉਨ੍ਹਾਂ ਦੱਸਿਆ ਕਿ ਤੇਂਦੂਏ ਰਾਤ ਨੂੰ ਵੀ ਖੇਤਾਂ ਵਿੱਚ ਆਉਂਦਾ ਹੈ, ਇਸ ਲਈ ਇਥੇ ਲੋਕਾਂ ਵਿਚ ਸਹਿਮ ਦਾ ਮਾਹੌਲ ਹੈ।
