Aakash Chopra Urges Raina: ਭਾਰਤੀ ਟੀਮ ਦੇ ਸਾਬਕਾ ਬੱਲੇਬਾਜ਼ ਅਤੇ ਹੁਣ ਕੁਮੈਂਟੇਟਰ ਆਕਾਸ਼ ਚੋਪੜਾ ਨੇ ਕਿਹਾ ਹੈ ਕਿ ਉਹ ਸੁਰੇਸ਼ ਰੈਨਾ ਦੇ ਸੰਨਿਆਸ ਲੈਣ ਦੇ ਫੈਸਲੇ ਤੋਂ ਕਾਫ਼ੀ ਹੈਰਾਨ ਸੀ । ਚੋਪੜਾ ਨੇ ਕਿਹਾ ਕਿ ਰੈਨਾ ਕੋਲ ਅਜੇ ਵੀ ਅਗਲੇ ਸਾਲ ਹੋਣ ਵਾਲੇ ਟੀ-20 ਵਿਸ਼ਵ ਕੱਪ ਤੋਂ ਪਹਿਲਾਂ ਆਪਣੇ ਲਈ ਫੈਸਲਾ ਕਰਨ ਦਾ ਸਮਾਂ ਸੀ ਅਤੇ ਉਨ੍ਹਾਂ ਨੇ ਰੈਨਾ ਨੂੰ ਸ਼ਾਹਿਦ ਅਫਰੀਦੀ ਬਣਨ ਅਤੇ ਫੈਸਲਾ ਵਾਪਸ ਲੈਣ ਦੀ ਅਪੀਲ ਕੀਤੀ ਹੈ। ਚੋਪੜਾ ਨੇ ਕਿਹਾ, ‘ਮੈਂ ਉਨ੍ਹਾਂ ਨੂੰ ਕਹਿਣਾ ਚਾਹੁੰਦਾ ਹਾਂ ਕਿ ਤੁਸੀਂ ਅਫਰੀਦੀ ਬਣ ਜਾਓ ਅਤੇ ਸੰਨਿਆਸ ਤੋਂ ਬਾਹਰ ਆ ਜਾਓ।’
ਚੋਪੜਾ ਨੇ ਕਿਹਾ, ‘ਮੇਰਾ ਮੰਨਣਾ ਹੈ ਕਿ ਰੈਨਾ 2020 ਅਤੇ 2021 ਦੇ ਆਈਪੀਐਲ ਸੀਜ਼ਨ ਵਿੱਚ ਬਿਹਤਰ ਪ੍ਰਦਰਸ਼ਨ ਕਰਕੇ ਟੀ -20 ਵਿਸ਼ਵ ਕੱਪ ਵਿੱਚ ਭਾਰਤੀ ਟੀਮ ਵਿੱਚ ਸ਼ਾਮਲ ਹੋ ਸਕਦਾ ਸੀ। ਇਹ ਸੰਭਵ ਹੈ। ਮੈਂ ਨਿਸ਼ਚਤ ਤੌਰ ‘ਤੇ ਵਿਸ਼ਵਾਸ ਕਰਦਾ ਹਾਂ ਇਹ ਸੰਭਵ ਹੈ। ਜ਼ਿਕਰਯੋਗ ਹੈ ਕਿ ਸਾਬਕਾ ਕਪਤਾਨ ਮਹਿੰਦਰ ਸਿੰਘ ਧੋਨੀ ਨੇ ਅੰਤਰਰਾਸ਼ਟਰੀ ਕ੍ਰਿਕਟ ਤੋਂ ਸੰਨਿਆਸ ਲੈਣ ਤੋਂ ਤੁਰੰਤ ਬਾਅਦ ਰੈਨਾ 15 ਅਗਸਤ ਨੂੰ ਸੰਨਿਆਸ ਲੈ ਲਿਆ ਸੀ। ਰੈਨਾ ਅਤੇ ਧੋਨੀ ਹੁਣ ਆਈਪੀਐਲ ਦੇ 2020 ਸੀਜ਼ਨ ਵਿੱਚ ਚੇੱਨਈ ਸੁਪਰ ਕਿੰਗਜ਼ ਲਈ ਖੇਡਣ ਲਈ ਤਿਆਰ ਹਨ।
ਚੋਪੜਾ ਨੇ ਕਿਹਾ, “ਰੈਨਾ ਹਾਲੇ ਹੋਰ ਖੇਡ ਸਕਦੇ ਸੀ, ਉਨ੍ਹਾਂ ਨੂੰ ਅਜੇ ਰਿਟਾਇਰ ਹੋਣ ਦੀ ਜ਼ਰੂਰਤ ਨਹੀਂ ਸੀ। ਉਹ ਹਾਲੇ 33 ਸਾਲਾਂ ਦੇ ਹਨ। ਹਾਂ, ਮੈਂ ਸਹਿਮਤ ਹਾਂ ਕਿ ਸੱਟ ਲੱਗਣਾ ਇੱਕ ਸਮੱਸਿਆ ਸੀ, ਪਰ ਕਿਹੜੇ ਖਿਡਾਰੀ ਨੂੰ ਅਜਿਹੀ ਸਮੱਸਿਆ ਨਹੀਂ ਹੁੰਦੀ। ਉਹ ਸਰਜਰੀ ਤੋਂ ਬਾਅਦ ਤੰਦਰੁਸਤ ਅਤੇ ਮਜ਼ਬੂਤ ਸੀ। ਮੈਨੂੰ ਲੱਗਦਾ ਹੈ ਕਿ ਰੈਨਾ ਮੈਦਾਨ ‘ਤੇ ਪਰਤਣ ਲਈ ਉਤਸੁਕ ਸੀ।
ਚੋਪੜਾ ਨੇ ਕਿਹਾ, ‘ਧੋਨੀ ਦੇ ਮਾਮਲੇ ਨੂੰ ਸਮਝਿਆ ਜਾ ਸਕਦਾ ਹੈ। ਜੇ ਆਈਪੀਐਲ ਅਪ੍ਰੈਲ-ਮਈ ਅਤੇ ਟੀ -20 ਵਰਲਡ ਕੱਪ ਅਕਤੂਬਰ-ਨਵੰਬਰ ਵਿੱਚ ਹੁੰਦਾ ਤਾਂ ਸ਼ਾਇਦ ਧੋਨੀ ਟੀਮ ਵਿੱਚ ਸ਼ਾਮਿਲ ਹੋ ਸਕਦੇ ਸਨ, ਪਰ ਟੀ-20 ਵਰਲਡ ਕੱਪ ਦਾ ਮੁਲਤਵੀ ਹੋਣਾ ਸ਼ਾਇਦ ਧੋਨੀ ਦੇ ਸੰਨਿਆਸ ਲੈਣ ਦਾ ਇੱਕ ਮੁੱਖ ਕਾਰਨ ਹੋ ਸਕਦਾ ਹੈ।
