indian bowlers hat trick in world cup: ਟੀਮ ਇੰਡੀਆ ਦੇ ਗੇਂਦਬਾਜ਼ ਮੁਹੰਮਦ ਸ਼ਮੀ ਨੇ ਪਿੱਛਲੇ ਸਾਲ ਇਸ ਦਿਨ ਵਰਲਡ ਕੱਪ 2019 ਟੂਰਨਾਮੈਂਟ ਵਿੱਚ ਹੈਟ੍ਰਿਕ ਲਈ ਸੀ। ਮੁਹੰਮਦ ਸ਼ਮੀ ਨੇ 22 ਜੂਨ 2019 ਨੂੰ ਅਫਗਾਨਿਸਤਾਨ ਖਿਲਾਫ ਮੈਚ ਵਿੱਚ ਇਹ ਕਾਰਨਾਮਾ ਕੀਤਾ ਸੀ। ਇਸ ਦੇ ਨਾਲ ਹੀ ਸ਼ਮੀ ਵਿਸ਼ਵ ਕੱਪ ਵਿੱਚ ਹੈਟ੍ਰਿਕ ਲੈਣ ਵਾਲਾ ਭਾਰਤ ਦਾ ਦੂਜਾ ਗੇਂਦਬਾਜ਼ ਬਣ ਗਿਆ। ਇਸਤੋਂ ਪਹਿਲਾਂ, ਚੇਤਨ ਸ਼ਰਮਾ ਨੇ 1987 ਦੇ ਵਿਸ਼ਵ ਕੱਪ ਵਿੱਚ ਨਿਊਜ਼ੀਲੈਂਡ ਖ਼ਿਲਾਫ਼ ਹੈਟ੍ਰਿਕ ਲਈ ਸੀ। 1987 ਦੇ ਵਿਸ਼ਵ ਕੱਪ ਵਿੱਚ ਨਾਗਪੁਰ ਦੇ ਵਿਦਰਭ ਕ੍ਰਿਕਟ ਐਸੋਸੀਏਸ਼ਨ ਦੇ ਮੈਦਾਨ ਵਿੱਚ ਚੇਤਨ ਸ਼ਰਮਾ ਦੇ ਸ਼ਿਕਾਰ ਕੇਨ ਰਦਰਫੋਰਡ, ਇਆਨ ਸਮਿੱਥ ਅਤੇ ਇਵਾਨ ਚੈਟਫੀਲਡ ਸਨ। ਚੇਤਨ ਨੇ ਤਿੰਨਾਂ ਨੂੰ ਕਲੀਨ ਬੋਲਡ ਕੀਤਾ ਸੀ। ਮੁਹੰਮਦ ਸ਼ਮੀ ਦੇ ਅੰਤਰਰਾਸ਼ਟਰੀ ਕਰੀਅਰ ਦੀ ਇਹ ਪਹਿਲੀ ਹੈਟ੍ਰਿਕ ਸੀ। ਸ਼ਮੀ ਵਿਸ਼ਵ ਕੱਪ ਵਿੱਚ ਹੈਟ੍ਰਿਕ ਬਣਾਉਣ ਵਾਲਾ ਵਿਸ਼ਵ ਦਾ ਨੌਵਾਂ ਗੇਂਦਬਾਜ਼ ਸੀ ਅਤੇ ਨਿਊਜ਼ੀਲੈਂਡ ਦਾ ਟ੍ਰੇਂਟ ਬੋਲਟ 10 ਵਾਂ ਗੇਂਦਬਾਜ਼ ਸੀ। ਵਿਸ਼ਵ ਕੱਪ ਵਿੱਚ ਹੁਣ ਤੱਕ 11 ਹੈਟ੍ਰਿਕਸ ਲਈਆਂ ਜਾ ਚੁੱਕੀਆਂ ਹਨ, ਜਿਨ੍ਹਾਂ ਵਿਚੋਂ ਦੋ ਹੈਟ੍ਰਿਕ ਸ਼੍ਰੀਲੰਕਾ ਦੇ ਲਸਿਥ ਮਲਿੰਗਾ ਨੇ ਲਾਈਆਂ ਹਨ। ਅਜਿਹਾ ਕਰਨ ਵਾਲਾ ਉਹ ਇਕਲੌਤਾ ਗੇਂਦਬਾਜ਼ ਹੈ।
ਸ਼ਮੀ ਤੋਂ ਪਹਿਲਾਂ, ਚੇਤਨ ਸ਼ਰਮਾ ਨੇ 1987 ਵਿੱਚ ਭਾਰਤ ਲਈ ਵਿਸ਼ਵ ਕੱਪ ਵਿੱਚ ਪਹਿਲੀ ਹੈਟ੍ਰਿਕ ਬਣਾਈ ਸੀ। ਚੇਤਨ ਵਿਸ਼ਵ ਕੱਪ ‘ਚ ਹੈਟ੍ਰਿਕ ਲੈਣ ਵਾਲਾ ਪਹਿਲਾ ਗੇਂਦਬਾਜ਼ ਵੀ ਹੈ। ਉਨ੍ਹਾਂ ਤੋਂ 12 ਸਾਲ ਬਾਅਦ, ਪਾਕਿਸਤਾਨ ਦੇ ਸਕਲੇਨ ਮੁਸ਼ਤਾਕ ਨੇ 1999 ਵਿੱਚ ਇੰਗਲੈਂਡ ਵਿੱਚ ਖੇਡੇ ਗਏ ਵਿਸ਼ਵ ਕੱਪ ਵਿੱਚ ਜ਼ਿੰਬਾਬਵੇ ਖਿਲਾਫ ਹੈਟ੍ਰਿਕ ਮਾਰੀ ਸੀ। 2003 ਵਿੱਚ ਦੱਖਣੀ ਅਫਰੀਕਾ ‘ਚ ਖੇਡੇ ਗਏ ਵਿਸ਼ਵ ਕੱਪ ਵਿੱਚ ਦੋ ਹੈਟ੍ਰਿਕ ਸਨ। ਸ਼੍ਰੀਲੰਕਾ ਦੇ ਚਮਿੰਡਾ ਵਾਸ ਨੇ ਬੰਗਲਾਦੇਸ਼ ਖਿਲਾਫ ਅਤੇ ਬਰੈਟ ਲੀ ਨੇ ਕੀਨੀਆ ਵਿਰੁੱਧ ਹੈਟ੍ਰਿਕ ਮਾਰੀ ਸੀ। ਲਸਿਥ ਮਲਿੰਗਾ ਨੇ ਵੈਸਟਇੰਡੀਜ਼ ਵਿੱਚ 2007 ਦੇ ਵਿਸ਼ਵ ਕੱਪ ‘ਚ ਆਪਣੀ ਪਹਿਲੀ ਹੈਟ੍ਰਿਕ ਲਈ ਸੀ। ਉਸ ਨੇ ਇਹ ਕਾਰਨਾਮਾ ਦੱਖਣੀ ਅਫਰੀਕਾ ਦੇ ਖਿਲਾਫ ਕੀਤਾ ਸੀ। ਮਲਿੰਗਾ ਨੇ ਸਾਲ 2011 ਵਿੱਚ ਵੀ ਹੈਟ੍ਰਿਕ ਲਈ ਸੀ, ਪਰ ਇਸ ਵਾਰ ਸਾਹਮਣੇ ਕੀਨੀਆ ਸੀ। ਇਸੇ ਵਰਲਡ ਕੱਪ ਵਿੱਚ ਵੈਸਟਇੰਡੀਜ਼ ਦੇ ਕੇਮਾਰ ਰੋਚ ਨੇ ਵੀ ਨੀਦਰਲੈਂਡਜ਼ ਖ਼ਿਲਾਫ਼ ਹੈਟ੍ਰਿਕ ਮਾਰੀ ਸੀ। 2015 ਵਿਸ਼ਵ ਕੱਪ ਵਿੱਚ ਵੀ ਦੋ ਹੈਟ੍ਰਿਕ ਸਨ। ਇੱਥੇ ਇੰਗਲੈਂਡ ਦੇ ਸਟੀਵਨ ਫਿਨ ਨੇ ਆਸਟ੍ਰੇਲੀਆ ਖਿਲਾਫ ਅਤੇ ਦੱਖਣੀ ਅਫਰੀਕਾ ਦੇ ਜੇ ਪੀ ਡੁਮਿਨੀ ਨੇ ਸ੍ਰੀਲੰਕਾ ਖਿਲਾਫ ਹੈਟ੍ਰਿਕ ਲਈ ਸੀ। ਮਲਿੰਗਾ ਦਾ ਵਿਸ਼ਵ ਕੱਪ ਵਿੱਚ ਇੱਕ ਤੋਂ ਵੱਧ ਹੈਟ੍ਰਿਕ ਲੈਣ ਦਾ ਰਿਕਾਰਡ ਹੈ।
ਅਫਗਾਨਿਸਤਾਨ ਖਿਲਾਫ ਵਿਸ਼ਵ ਕੱਪ 2019 ਦੇ ਮੈਚ ਵਿੱਚ ਮੁਹੰਮਦ ਸ਼ਮੀ ਨੇ ਅਫਗਾਨਿਸਤਾਨ ਖਿਲਾਫ 11 ਦੌੜਾਂ ਨਾਲ ਭਾਰਤ ਨੂੰ ਦਿਲਚਸਪ ਜਿੱਤ ਦਿਵਾਈ ਸੀ। ਸ਼ਮੀ ਨੇ ਇਸ ਮੈਚ ਵਿੱਚ 9.5 ਓਵਰਾਂ ‘ਚ 40 ਦੌੜਾਂ ਦੇ ਕੇ 4 ਵਿਕਟਾਂ ਲਈਆਂ ਸੀ। ਮੁਹੰਮਦ ਸ਼ਮੀ ਨੇ ਆਈਸੀਸੀ ਕ੍ਰਿਕਟ ਵਰਲਡ ਕੱਪ 2019 ਦੇ ਮੈਚ ਵਿੱਚ ਆਖਰੀ ਓਵਰ ਵਿੱਚ ਇੱਕ ਹੈਟ੍ਰਿਕ ਲਗਾ ਕੇ ਮੁਹੰਮਦ ਨਬੀ ਦੀ 52 ਦੌੜਾਂ ਦੀ ਸਰਬੋਤਮ ਪਾਰੀ ਤੇ ਪਾਣੀ ਫੇਰ ਦਿੱਤਾ ਸੀ। ਭਾਰਤ ਦੇ 225 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਦਿਆਂ, ਅਫਗਾਨਿਸਤਾਨ ਨੂੰ ਆਖਰੀ ਓਵਰ ਵਿੱਚ 16 ਦੌੜਾਂ ਦੀ ਜ਼ਰੂਰਤ ਸੀ, ਪਰ ਸ਼ਮੀ ਨੇ ਆਖਰੀ ਓਵਰ ਵਿੱਚ ਮੁਹੰਮਦ ਨਬੀ, ਆਫਤਾਬ ਆਲਮ ਅਤੇ ਮੁਜੀਬ ਉਰ ਰਹਿਮਾਨ ਨੂੰ ਲਗਾਤਾਰ ਤਿੰਨ ਗੇਂਦਾਂ ਵਿੱਚ ਆਊਟ ਕੀਤਾ, ਜੋ ਸ਼ਮੀ ਦੇ ਵਨਡੇ ਕਰੀਅਰ ਦੀ ਪਹਿਲੀ ਹੈਟ੍ਰਿਕ ਸੀ। ਅਫਗਾਨਿਸਤਾਨ ਦੀ ਟੀਮ 49.5 ਓਵਰਾਂ ਵਿੱਚ 213 ਦੌੜਾਂ ‘ਤੇ ਢੇਰ ਹੋ ਗਈ ਸੀ।
