ਸੁਪਰੀਮ ਕੋਰਟ ਭੜਕਾਊ ਭਾਸ਼ਣ ਦੇ ਮਾਮਲਿਆਂ ਨੂੰ ਲੈ ਕੇ ਕਾਫੀ ਸਖਤ ਨਜ਼ਰ ਆ ਰਹੀ ਹੈ। ਸ਼ੁੱਕਰਵਾਰ ਨੂੰ ਭੜਕਾਊ ਭਾਸ਼ਣ ਨਾਲ ਜੁੜੀਆਂ ਕਈ ਪਟੀਸ਼ਨਾਂ ‘ਤੇ ਸੁਣਵਾਈ ਕਰਦੇ ਹੋਏ ਅਦਾਲਤ ਨੇ ਟੀਵੀ ਚੈਨਲਾਂ ਦੇ ਕੰਮ ਕਰਨ ਦੇ ਤਰੀਕੇ ‘ਤੇ ਚਿੰਤਾ ਜ਼ਾਹਰ ਕੀਤੀ ਹੈ। ਅਦਾਲਤ ਨੇ ਕਿਹਾ ਹੈ ਕਿ ਸਭ ਕੁਝ ਟੀਆਰਪੀ ‘ਤੇ ਚੱਲਦਾ ਹੈ। ਚੈਨਲ ਇੱਕ-ਦੂਜੇ ਦਾ ਮੁਕਾਬਲਾ ਕਰ ਰਹੇ ਹਨ। ਅਦਾਲਤ ਨੇ ਸਖ਼ਤ ਸ਼ਬਦਾਂ ਵਿਚ ਕਿਹਾ ਕਿ ਨਫ਼ਰਤ ਫੈਲਾਉਣ ਵਾਲੇ ਐਂਕਰਾਂ ਨੂੰ ਆਫ਼ ਏਅਰ ਕੀਤਾ ਜਾਏ। ਮੀਡੀਆ ਸਮਾਜ ਨੂੰ ਵੰਡਣ ਦਾ ਕੰਮ ਨਹੀਂ ਕਰ ਸਕਦਾ।
ਸੁਣਵਾਈ ਦੌਰਾਨ ਜਸਟਿਸ ਜੋਸੇਫ ਨੇ ਕਿਹਾ, “ਉਹ ਇਸ ਨੂੰ ਸਨਸਨੀਖੇਜ਼ ਬਣਾਉਂਦੇ ਹਨ। ਤੁਸੀਂ ਨਜ਼ਰੀਏ ਕਰਕੇ ਸਮਾਜ ਵਿੱਚ ਵੰਡ ਪੈਦਾ ਕਰਦੇ ਹੋ। ਵਿਜ਼ੂਅਲ ਮਾਧਿਅਮ ਅਖ਼ਬਾਰਾਂ ਨਾਲੋਂ ਜ਼ਿਆਦਾ ਲੋਕਾਂ ਨੂੰ ਪ੍ਰਭਾਵਿਤ ਕਰਦਾ ਹੈ। ਸਾਡੇ ਦਰਸ਼ਕ, ਕੀ ਉਹ ਅਜਿਹੀ ਸਮੱਗਰੀ ਨੂੰ ਦੇਖਣ ਲਈ ਇੰਨੇ ਮੈਚਿਓਰ ਹਨ?” ਜਸਟਿਸ ਜੋਸੇਫ ਨੇ ਨਿਊਜ਼ ਬ੍ਰਾਡਕਾਸਟਰ ਅਤੇ ਡਿਜੀਟਲ ਐਸੋਸੀਏਸ਼ਨ ਦੀ ਨੁਮਾਇੰਦਗੀ ਕਰਨ ਵਾਲੇ ਵਕੀਲ ਨੂੰ ਪੁੱਛਿਆ, ਜੇ ਟੀਵੀ ਪ੍ਰੋਗਰਾਮਾਂ ਦੇ ਐਂਕਰ ਇਸ ਸਮੱਸਿਆ ਦਾ ਹਿੱਸਾ ਹਨ ਤਾਂ ਕੀ ਕੀਤਾ ਜਾ ਸਕਦਾ ਹੈ? NBSA ਨੂੰ ਪੱਖਪਾਤ ਨਹੀਂ ਕਰਨਾ ਚਾਹੀਦਾ। ਤੁਸੀਂ ਕਿੰਨੀ ਵਾਰ ਐਂਕਰ ਹਟਾਏ ਹਨ?
ਰਿਪੋਰਟਾਂ ਮੁਤਾਬਕ ਉਨ੍ਹਾਂ ਅੱਗੇ ਕਿਹਾ, “ਇੱਕ ਲਾਈਵ ਪ੍ਰੋਗਰਾਮ ਵਿੱਚ ਐਂਕਰ ਪ੍ਰੋਗਰਾਮ ਦੀ ਨਿਰਪੱਖਤਾ ਦੀ ਕੁੰਜੀ ਰੱਖਦਾ ਹੈ। ਜੇ ਐਂਕਰ ਨਿਰਪੱਖ ਨਹੀਂ ਹੈ… ਐਂਕਰ ਇੱਕ ਪਾਸੇ ਨੂੰ ਪੇਸ਼ ਕਰਨਾ ਚਾਹੇਗਾ, ਉਹ ਦੂਜੇ ਪਾਸੇ ਨੂੰ ਚੁੱਪ ਕਰਾ ਦੇਵੇਗਾ, ਕਿਸੇ ਇੱਕ ਪੱਖ ‘ਤੇ ਸਵਾਲ ਨਹੀਂ ਉਠਾਏਗਾ। ਇਹ ਪੱਖਪਾਤ ਦਾ ਪ੍ਰਤੀਕ ਹੈ। ਮੀਡੀਆ ਵਾਲਿਆਂ ਨੂੰ ਸਿੱਖਣਾ ਚਾਹੀਦਾ ਹੈ…ਉਨ੍ਹਾਂ ਨੂੰ ਇਹ ਦੇਖਣਾ ਚਾਹੀਦਾ ਹੈ ਕਿ ਉਹ ਮਹਾਨ ਸ਼ਕਤੀ ਦੇ ਅਹੁਦੇ ‘ਤੇ ਬਿਰਾਜਮਾਨ ਹਨ ਅਤੇ ਜੋ ਉਹ ਕਹਿ ਰਹੇ ਹਨ, ਉਸ ਦਾ ਅਸਰ ਪੂਰੇ ਦੇਸ਼ ‘ਤੇ ਪੈਂਦਾ ਹੈ।” ਜਸਟਿਸ ਨੇ ਕਿਹਾ ਕਿ ਉਲੰਘਣਾ ਕਰਨ ਵਾਲੇ ਐਂਕਰਾਂ ਨੂੰ ਏਅਰ ਆਫ਼ ਕਰ ਦਿੱਤਾ ਜਾਣਾ ਚਾਹੀਦਾ ਹੈ ਅਤੇ ਉਨ੍ਹਾਂ ਚੈਨਲਾਂ ‘ਤੇ ਭਾਰੀ ਜੁਰਮਾਨਾ ਲਗਾਇਆ ਜਾਣਾ ਚਾਹੀਦਾ ਹੈ ਜੋ ਪ੍ਰੋਗਰਾਮ ਕੋਡ ਦੀ ਉਲੰਘਣਾ ਕਰ ਰਹੇ ਹਨ। ਜਿੱਥੇ ਵੀ ਸੰਭਵ ਹੋਵੇ, ਤੁਸੀਂ ਉਨ੍ਹਾਂ ਨੂੰ ਵਿੱਤੀ ਤੌਰ ‘ਤੇ ਨੁਕਸਾਨ ਪਹੁੰਚਾਓ।
ਇਹ ਵੀ ਪੜ੍ਹੋ : ‘ਸਰ-ਮੈਡਮ ਨਹੀਂ, ਸਿਰਫ ਟੀਚਰ’, ਭੇਦਭਾਵ ਖ਼ਤਮ ਕਰਨ ਲਈ ਇਸ ਸੂਬੇ ਦੇ ਸਕੂਲਾਂ ‘ਚ ਲਿਆ ਗਿਆ ਫ਼ੈਸਲਾ
ਜਸਟਿਸ ਜੋਸੇਫ ਨੇ ਏਅਰ ਇੰਡੀਆ ਦੀ ਫਲਾਈਟ ‘ਚ ਪਿਸ਼ਾਬ ਕਰਨ ਦੇ ਦੋਸ਼ੀ ਸ਼ੰਕਰ ਮਿਸ਼ਰਾ ਖਿਲਾਫ ਟੀਵੀ ਚੈਨਲਾਂ ਦੁਆਰਾ ਸ਼ਬਦਾਂ ਦੀ ਵਰਤੋਂ ਦੀ ਵੀ ਆਲੋਚਨਾ ਕੀਤੀ। ਉਨ੍ਹਾਂ ਕਿਹਾ, ”ਕਿਸੇ ਦਾ ਅਪਮਾਨ ਨਹੀਂ ਹੋਣਾ ਚਾਹੀਦਾ। ਹਰ ਕਿਸੇ ਨੂੰ ਸਨਮਾਨ ਦਾ ਅਧਿਕਾਰ ਹੈ।” ਜਸਟਿਸ ਕੇ.ਐੱਮ. ਜੋਸੇਫ ਅਤੇ ਬੀ.ਵੀ. ਨਗਰਰਤਨ ਦੀ ਬੈਂਚ ਭੜਕਾਊ ਭਾਸ਼ਣ ਖਿਲਾਫ ਕਾਰਵਾਈ ਦੀ ਮੰਗ ਕਰਨ ਵਾਲੀਆਂ ਪਟੀਸ਼ਨਾਂ ਦੇ ਬੈਚ ਦੀ ਸੁਣਵਾਈ ਕਰ ਰਹੀ ਸੀ।
ਇਹ ਪਟੀਸ਼ਨਾਂ ਸੁਦਰਸ਼ਨ ਨਿਊਜ਼ ਟੀਵੀ ਦੁਆਰਾ ‘UPSC ਜਿਹਾਦ’ ਮੁਹਿੰਮ, ਤਬਲੀਗੀ ਜਮਾਤ ਦੇ ਮੁੱਦੇ ਦੇ ਮੱਦੇਨਜ਼ਰ ‘ਕੋਰੋਨਾ ਜਿਹਾਦ’ ਮੁਹਿੰਮ, ਧਰਮ ਸੰਸਦ ਦੀਆਂ ਮੀਟਿੰਗਾਂ ਅਤੇ ਨਫ਼ਰਤ ਭਰੇ ਭਾਸ਼ਣ ‘ਤੇ ਪਾਬੰਦੀ ਲਗਾਉਣ ਲਈ ਦਿਸ਼ਾ-ਨਿਰਦੇਸ਼ ਜਾਰੀ ਕਰਨ ਦੇ ਸਬੰਧ ਵਿੱਚ ਦਾਇਰ ਕੀਤੀਆਂ ਗਈਆਂ ਸਨ।
ਵੀਡੀਓ ਲਈ ਕਲਿੱਕ ਕਰੋ -:
“‘ਮੈਂ ਆਪਣੇ ਪਿਓ ਦੀ 11 ਮਹੀਨੇ ਤੋਂ ਆਵਾਜ਼ ਵੀ ਨਹੀਂ ਸੁਣੀ, ਜੇ ਤੁਸੀਂ ਕੁਝ ਨਹੀਂ ਕਰਨਾ ਤਾਂ ਮੈਨੂੰ ਦਵੋ ਇਜਾਜ਼ਤ’ “
