ਹਿਮਾਚਲ ਪ੍ਰਦੇਸ਼ ਦੇ ਕਈ ਇਲਾਕਿਆਂ ‘ਚ ਸ਼ੁੱਕਰਵਾਰ ਰਾਤ ਤੋਂ ਹੀ ਭਾਰੀ ਬਾਰਿਸ਼ ਹੋ ਰਹੀ ਹੈ। ਰੋਹੜੂ ਵਿੱਚ ਬੱਦਲ ਫਟਣ ਕਾਰਨ ਲੈਲਾ ਖੱਡ ਵਿੱਚ ਤਬਾਹੀ ਮਚ ਗਈ ਅਤੇ ਇੱਕ ਢਾਬੇ ਸਮੇਤ ਇੱਕ ਘਰ ਹੜ੍ਹ ਵਿੱਚ ਵਹਿ ਗਿਆ। ਹੜ੍ਹ ਤੋਂ ਬਾਅਦ ਇਸ ਵਿਚ ਇਕ ਹੀ ਪਰਿਵਾਰ ਦੇ ਤਿੰਨ ਲੋਕ ਲਾਪਤਾ ਹਨ। ਅਜੇ ਤੱਕ ਉਨ੍ਹਾਂ ਦਾ ਕੋਈ ਸੁਰਾਗ ਨਹੀਂ ਮਿਲਿਆ ਹੈ। ਬੱਦਲ ਫਟਣ ਦੀ ਘਟਨਾ ਤੋਂ ਬਾਅਦ ਰਾਤ ਭਰ ਪਿੰਡ ਵਿਚ ਹਫੜਾ-ਦਫੜੀ ਮਚ ਗਈ।
ਦੱਸਿਆ ਜਾ ਰਿਹਾ ਹੈ ਕਿ ਜਗੋਟੀ ਦਾ ਰਹਿਣ ਵਾਲਾ ਰੋਸ਼ਨ ਲਾਲ ਆਪਣੀ ਪਤਨੀ ਭਾਗਾ ਦੇਬੀ ਲੈਲਾ ‘ਚ ਢਾਬਾ ਚਲਾਉਂਦਾ ਸੀ। ਬੀਤੀ ਰਾਤ ਉਸ ਦਾ ਪੋਤਾ ਕਾਰਤਿਕ ਵੀ ਉਸ ਦੇ ਨਾਲ ਸੀ। ਰਾਤ ਨੂੰ ਲੈਲਾ ਖੱਡ ਵਿਚ ਆਏ ਹੜ੍ਹ ਵਿਚ ਢਾਬਾ ਅਤੇ ਉਸ ਦਾ ਕਮਰਾ ਇਸ ਦੇ ਨਾਲ ਹੀ ਵਹਿ ਗਿਆ। ਪੁਲਿਸ ਅਤੇ ਸਥਾਨਕ ਪ੍ਰਸ਼ਾਸਨ ਰਾਹਤ ਅਤੇ ਬਚਾਅ ਕਾਰਜਾਂ ‘ਚ ਲੱਗੇ ਹੋਏ ਹਨ। ਇਸੇ ਤਰ੍ਹਾਂ ਪਿੰਡ ਜੁਬਲ, ਕੋਟਖਾਈ, ਥਿਓਗ, ਕੁਮਾਰਸੈਣ, ਕੋਟਗੜ੍ਹ, ਚੰਬਾ ਦੇ ਕਈ ਇਲਾਕਿਆਂ ਵਿੱਚ ਵੀ ਬੀਤੀ ਰਾਤ ਹੋਈ ਤੇਜ਼ ਬਾਰਿਸ਼ ਕਾਰਨ ਕਾਫੀ ਨੁਕਸਾਨ ਹੋਇਆ ਹੈ।
ਮੌਸਮ ਵਿਗਿਆਨ ਕੇਂਦਰ ਸ਼ਿਮਲਾ ਨੇ ਅੱਜ 8 ਜ਼ਿਲ੍ਹਿਆਂ ਵਿੱਚ ਭਾਰੀ ਬਾਰਿਸ਼ ਲਈ ਔਰੇਂਜ ਅਲਰਟ ਜਾਰੀ ਕੀਤਾ ਹੈ। ਇਸ ਦੌਰਾਨ ਕੁਝ ਥਾਵਾਂ ‘ਤੇ ਬੱਦਲ ਫਟਣ ਅਤੇ ਹੜ੍ਹ ਵਰਗੀਆਂ ਘਟਨਾਵਾਂ ਵਾਪਰ ਸਕਦੀਆਂ ਹਨ। ਇਸ ਦੇ ਮੱਦੇਨਜ਼ਰ ਲੋਕਾਂ ਨੂੰ ਸਾਵਧਾਨ ਰਹਿਣ, ਭਰੀਆਂ ਨਦੀਆਂ ਅਤੇ ਨਾਲਿਆਂ ਅਤੇ ਜ਼ਮੀਨ ਖਿਸਕਣ ਵਾਲੇ ਖੇਤਰਾਂ ਵਿੱਚ ਨਾ ਜਾਣ ਅਤੇ ਬੇਲੋੜੀ ਯਾਤਰਾ ਤੋਂ ਬਚਣ ਦੀ ਸਲਾਹ ਦਿੱਤੀ ਗਈ ਹੈ।
ਚੰਬਾ, ਕਾਂਗੜਾ, ਸ਼ਿਮਲਾ, ਕੁੱਲੂ, ਮੰਡੀ, ਬਿਲਾਸਪੁਰ, ਸੋਲਨ ਅਤੇ ਸਿਰਮੌਰ ‘ਚ ਭਾਰੀ ਮੀਂਹ ਦਾ ਆਰੇਂਜ ਅਲਰਟ ਦਿੱਤਾ ਗਿਆ ਹੈ। ਊਨਾ, ਹਮੀਰਪੁਰ, ਕਿਨੌਰ ਅਤੇ ਲਾਹੌਲ ਸਪਿਤੀ ਜ਼ਿਲ੍ਹਿਆਂ ਵਿੱਚ ਵੀ ਭਾਰੀ ਮੀਂਹ ਦੀ ਭਵਿੱਖਬਾਣੀ ਕੀਤੀ ਗਈ ਹੈ। ਮੌਸਮ ਵਿਭਾਗ ਮੁਤਾਬਕ 27 ਜੁਲਾਈ ਤੱਕ ਮਾਨਸੂਨ ਹੋਰ ਸਰਗਰਮ ਰਹੇਗਾ। ਕੱਲ੍ਹ ਤੋਂ 25 ਜੁਲਾਈ ਤੱਕ ਯੈਲੋ ਅਲਰਟ ਦਿੱਤਾ ਗਿਆ ਹੈ।
ਇਸ ਦੇ ਨਾਲ ਹੀ ਪਿਛਲੇ 24 ਘੰਟਿਆਂ ਦੌਰਾਨ ਭਾਰੀ ਮੀਂਹ ਨੇ ਕਈ ਇਲਾਕਿਆਂ ‘ਚ ਤਬਾਹੀ ਮਚਾਈ ਹੈ। ਖਾਸ ਤੌਰ ‘ਤੇ ਕੁੱਲੂ ਜ਼ਿਲੇ ‘ਚ 4 ਥਾਵਾਂ ‘ਤੇ ਬੱਦਲ ਫਟਣ ਕਾਰਨ ਕਾਫੀ ਤਬਾਹੀ ਹੋਈ ਹੈ। ਕੁੱਲੂ ਦੇ ਸਾਂਝ, ਪਿੰਡ ਪਾਸੀ, ਜਗਤਸੁਖ ਅਤੇ ਹਰੀਪੁਰ ਦੇ ਕਰਜਨ ਵਿੱਚ ਵੀ ਬੱਦਲ ਫਟਣ ਤੋਂ ਬਾਅਦ ਲੋਕ ਡਰ ਗਏ।
ਇਹ ਵੀ ਪੜ੍ਹੋ : ਟ੍ਰੇਨਿੰਗ ਲਈ 72 ਸਕੂਲਾਂ ਦੇ ਪ੍ਰਿੰਸੀਪਲ ਸਿੰਗਾਪੁਰ ਹੋਏ ਰਵਾਨਾ, CM ਮਾਨ ਨੇ ਦਿੱਤੀਆਂ ਸ਼ੁੱਭਕਾਮਨਾਵਾਂ
ਪਾਸੀ ਪਿੰਡ ਵਿੱਚ ਪਿੰਡ ਵਾਲਿਆਂ ਨੂੰ ਘਰ ਛੱਡ ਕੇ ਭੱਜਣਾ ਪਿਆ। ਜਗਤਸੁਖ ‘ਚ 6 ਵਾਹਨ ਨੁਕਸਾਨੇ ਗਏ। ਇਸ ਦੇ ਨਾਲ ਹੀ ਮਨਾਲੀ ਦਾ ਦੌਰਾ ਕਰਨ ਆਏ ਭਾਰਤੀ ਜਲ ਸੈਨਾ ਦੇ 3 ਅਧਿਕਾਰੀ ਤੇਜ਼ ਹੜ੍ਹ ‘ਚ ਰੁੜ੍ਹ ਗਏ। ਮਣੀਕਰਨ ਵਿੱਚ ਭਾਰੀ ਮੀਂਹ ਤੋਂ ਬਾਅਦ ਮਲਬਾ ਦੁਕਾਨਾਂ ਵਿੱਚ ਵੜ ਗਿਆ।
