ਯੂਕਰੇਨ ਅੱਗੇ ‘ਕਸਾਈ’ ਵੀ ਹਾਰਿਆ! ਹੁਣ ਪੁਤਿਨ ਦੇ ਰਾਈਟ ਹੈਂਡ ਨੂੰ ਮਿਲੀ ਜੰਗ ਦੀ ਜ਼ਿੰਮੇਵਾਰੀ

ਰੂਸ ਤੇ ਯੂਕਰੇਨ ਵਿਚਾਲੇ ਜੰਗ ਨੂੰ ਇੱਕ ਸਾਲ ਹੋਣ ਵਾਲਾ ਹੈ, ਪਰ ਕੋਈ ਨਤੀਜਾ ਨਹੀਂ ਨਿਕਲ ਸਕਿਆ। ਪਹਿਲੇ ਕੁਝ ਹਫ਼ਤਿਆਂ ਵਿੱਚ ਰੂਸ ਦੇ ਜੰਗ ਜਿੱਤਣ ਦੇ ਆਸਾਰ ਸਨ, ਜੋ ਕਿ ਪੂਰੇ ਨਹੀਂ ਹੋਏ। ਰੂਸ ਦੇ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨੇ ਯੂਕਰੇਨ ਨਾਲੋਂ ਵੱਧ ‘ਸ਼ਕਤੀ’ ਹੋਣ ਦੇ ਬਾਵਜੂਦ ਜਿੱਤ ਨਾ ਮਿਲਣ ਕਾਰਨ ਹੁਣ ਨਵਾਂ ਕਦਮ ਚੁੱਕਿਆ ਹੈ।

ਉਨ੍ਹਾਂ ਨੇ ਯੂਕਰੇਨ ਜੰਗ ਲਈ ਤਿੰਨ ਮਹੀਨੇ ਪਹਿਲਾਂ ਨਿਯੁਕਤ ਕੀਤੇ ਗਏ ਚੋਟੀ ਦੇ ਕਮਾਂਡਰ ਸਰਗੇਈ ਸੁਰੋਵਿਕਿਨ ਨੂੰ ਹਟਾ ਦਿੱਤਾ ਸੀ। ਸਰਗੇਈ ਨੂੰ ਉਸ ਦੀਆਂ ਪਿਛਲੀਆਂ ਲੜਾਈਆਂ ਲੜਨ ਕਾਰਨ ‘ਕਸਾਈ’ ਵਜੋਂ ਜਾਣਿਆ ਜਾਂਦਾ ਸੀ। ਹੁਣ ਪੁਤਿਨ ਨੇ ਸਰਗੇਈ ਨੂੰ ਹਟਾ ਕੇ ਜਨਰਲ ਵੈਲੇਰੀ ਗੇਰਾਸਿਮੋਵ ਨੂੰ ‘ਸਪੈਸ਼ਲ ਮਿਲਟਰੀ ਆਪਰੇਸ਼ਨ’ ਲਈ ਨਿਯੁਕਤ ਕਰ ਦਿੱਤਾ ਹੈ।

ਰੂਸ ਨੂੰ ਪਿਛਲੇ ਕਈ ਮਹੀਨਿਆਂ ਤੋਂ ਯੂਕਰੇਨ ਤੋਂ ਸਖਤ ਟੱਕਰ ਮਿਲੀ ਹੈ। ਵਿੱਤੀ ਮਦਦ ਦੇ ਨਾਲ-ਨਾਲ ਯੂਕਰੇਨ ਨੂੰ ਪੱਛਮੀ ਦੇਸ਼ਾਂ ਤੋਂ ਹਥਿਆਰ ਵੀ ਮਿਲ ਰਹੇ ਹਨ। ਹਾਲਾਂਕਿ, ਰੂਸ ਦਾ ਦਾਅਵਾ ਹੈ ਕਿ ਉਸ ਨੇ ਹਾਲ ਹੀ ਵਿੱਚ ਪੂਰਬੀ ਯੂਕਰੇਨ ਵਿੱਚ ਤਰੱਕੀ ਕੀਤੀ ਹੈ ਅਤੇ ਹੋਰ ਸ਼ਕਤੀਸ਼ਾਲੀ ਹੋ ਗਿਆ ਹੈ। ਰੂਸ ਦੇ ਨਵੇਂ ਕਮਾਂਡਰ ਗੇਰਾਸਿਮੋਵ ਕੋਲ ਹੁਣ ਯੂਕਰੇਨ ਨੂੰ ਹਰਾਉਣ ਦੀ ਜ਼ਿੰਮੇਵਾਰੀ ਹੋਵੇਗੀ।

ਜਨਰਲ ਗੇਰਾਸਿਮੋਵ ਸੋਵੀਅਤ ਯੁੱਗ ਤੋਂ ਬਾਅਦ ਦੇ ਜਨਰਲ ਸਟਾਫ਼ ਦੇ ਸਭ ਤੋਂ ਲੰਬੇ ਸਮੇਂ ਤੱਕ ਸੇਵਾ ਕਰਨ ਵਾਲਾ ਰੂਸੀ ਚੀਫ਼ ਹੈ। ਰੂਸ ਦੇ ਰੱਖਿਆ ਮੰਤਰਾਲੇ ਦਾ ਕਹਿਣਾ ਹੈ ਕਿ ਜਨਰਲ ਸੁਰੋਵਿਕਿਨ ਨੂੰ ਬਦਲਣ ਦਾ ਫੈਸਲਾ ਹਥਿਆਰਬੰਦ ਬਲਾਂ ਦੀਆਂ ਵੱਖ-ਵੱਖ ਸ਼ਾਖਾਵਾਂ ਵਿਚਕਾਰ ਨਜ਼ਦੀਕੀ ਗੱਲਬਾਤ ਅਤੇ ਰੂਸੀ ਬਲਾਂ ਦੇ ਪ੍ਰਬੰਧਨ ਦੀ ਗੁਣਵੱਤਾ ਅਤੇ ਪ੍ਰਭਾਵ ਨੂੰ ਬਿਹਤਰ ਬਣਾਉਣ ਲਈ ਸੀ।

ਗੇਰਾਸਿਮੋਵ ਨੂੰ ਰੂਸੀ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਦਾ ਰਾਈਟ ਹੈਂਡ (ਸੱਜਾ ਹੱਥ) ਮੰਨਿਆ ਜਾਂਦਾ ਹੈ। ਉਹ ਪੁਤਿਨ ਦੇ ਬਹੁਤ ਕਰੀਬ ਹੈ। ਉਸ ਦੀ ਅਹਿਮੀਅਤ ਦਾ ਅੰਦਾਜ਼ਾ ਇਸ ਤੱਥ ਤੋਂ ਲਗਾਇਆ ਜਾ ਸਕਦਾ ਹੈ ਕਿ ਰੂਸੀ ਰਾਸ਼ਟਰਪਤੀ ਪੁਤਿਨ, ਰੱਖਿਆ ਮੰਤਰੀ ਅਤੇ ਗੇਰਾਸਿਮੋਵ ਉਨ੍ਹਾਂ ਲੋਕਾਂ ਵਿੱਚ ਸ਼ਾਮਲ ਸਨ ਜਿਨ੍ਹਾਂ ਨੇ ਯੂਕਰੇਨ ਦੇ ਖਿਲਾਫ ਜੰਗ ਵਿੱਚ ਜਾਣ ਦਾ ਫੈਸਲਾ ਕੀਤਾ ਸੀ। ਉਹ ਦੂਜੇ ਚੇਚਨ ਯੁੱਧ ਦਾ ਇੱਕ ਤਜਰਬੇਕਾਰ ਕਮਾਂਡਰ ਹੈ, ਜੋ ਪਹਿਲਾਂ ਜਨਰਲ ਨਿਕੋਲਾਈ ਮਾਕਾਰੋਵ ਦੇ ਡਿਪਟੀ ਵਜੋਂ ਸੇਵਾ ਕਰ ਰਿਹਾ ਸੀ।

ਇਹ ਵੀ ਪੜ੍ਹੋ : ‘ਭਾਰਤ ਜੋੜੋ ਯਾਤਰਾ’, ਆਪਣੇ ਹਮਸ਼ਕਲ ਨੂੰ ਮਿਲ ਰਾਹੁਲ ਵੀ ਹੋ ਗਏ ਹੈਰਾਨ, ਜਾਣੋ ਕੌਣ ਹੈ ਇਹ ਸ਼ਖਸ

ਗੇਰਾਸਿਮੋਵ ਨੇ ਕਥਿਤ ਤੌਰ ‘ਤੇ ਮਈ ਵਿੱਚ ਪੂਰਬੀ ਡੋਨਬਾਸ ਖੇਤਰ ਵਿੱਚ ਫਰੰਟਲਾਈਨ ਦਾ ਦੌਰਾ ਕੀਤਾ ਸੀ। ਉਸ ਵੇਲੇ ਯੂਕਰੇਨ ਦੇ ਜਵਾਬੀ ਹਮਲੇ ਕਾਰਨ ਰੂਸੀ ਸੈਨਿਕਾਂ ਦਾ ਮਨੋਬਲ ਬਹੁਤ ਟੁੱਟ ਗਿਆ ਸੀ। ਨਵੰਬਰ ਵਿੱਚ ਪੋਲੀਟਿਕੋ ਨੇ ਰੂਸ ਦੀ ਅਗਵਾਈ ਵਿੱਚ ਦੋ ਮੁੱਖ ਗਠਜੋੜਾਂ ਦੇ ਨਾਲ ਇੱਕ ਅੰਦਰੂਨੀ ਸ਼ਕਤੀ ਸੰਘਰਸ਼ ਦੀ ਰਿਪੋਰਟ ਕੀਤੀ। ਇੱਕ ਪਾਸੇ ਰੂਸੀ ਸੁਰੱਖਿਆ ਏਜੰਸੀਆਂ, ਰੱਖਿਆ ਮੰਤਰੀ ਸਰਗੇਈ ਸ਼ੋਇਗੂ ਅਤੇ ਚੀਫ਼ ਆਫ਼ ਦਾ ਜਨਰਲ ਸਟਾਫ਼ ਵੈਲੇਰੀ ਗੇਰਾਸਿਮੋਵ ਸਨ ਅਤੇ ਦੂਜੇ ਪਾਸੇ ਚੇਚਨ ਆਗੂ ਰਮਜ਼ਾਨ ਕਾਦਿਰੋਵ ਅਤੇ ਵੈਗਨਰ ਗਰੁੱਪ ਦੇ ਸੰਸਥਾਪਕ ਪ੍ਰਿਗੋਜਿਨ ਸਨ।

ਵੀਡੀਓ ਲਈ ਕਲਿੱਕ ਕਰੋ -:

“‘ਮੈਂ ਆਪਣੇ ਪਿਓ ਦੀ 11 ਮਹੀਨੇ ਤੋਂ ਆਵਾਜ਼ ਵੀ ਨਹੀਂ ਸੁਣੀ, ਜੇ ਤੁਸੀਂ ਕੁਝ ਨਹੀਂ ਕਰਨਾ ਤਾਂ ਮੈਨੂੰ ਦਵੋ ਇਜਾਜ਼ਤ’ “